E Na’o Tusiga Faatekinolosi
Filemu ia Iesu Keriso—Savali Lata Mai Nei mai Perofeta ma Aposetolo
Tagai i mea na aoao mai talu ai nei e perofeta soifua i luga o ala o faasalalauga faaagafesootai e uiga i le filemu ia Iesu Keriso.
Ata na tusia e James Johnson
I le konafesi aoao ia Oketopa 2022, sa saunoa ai Peresitene Russell M. Nelson e uiga i le mana o Iesu Keriso e aumaia le filemu, faamoemoe, ma le malologa i o tatou olaga: “E mafai ona e faatoilaloina mala faavaivai faaleagaga ma faalelagona o le lalolagi, e aofia ai le faasaunoa, faamaualuga, ita, ola le mama, inoino, matapeapea, lotoleaga, ma le fefe. E ui i mea faalavefau ma mea leaga ua siomia ai i tatou, e mafai lava ona e mauaina lemalologa—o lona uiga, o le mapusaga ma le filemu—e oo lava i le lotolotoi o ou faafitauli sili ona faigata.”1
Na saunoa uso o le Au Peresitene Sili ma le Korama a Aposetolo e Toasefululua i le konafesi aoao e uiga i le ala e mafai ai e Iesu Keriso ona aumaia ia i tatou le filemu, mafanafana, ma le malologa. Ua latou faasoa mai foi ni savali e uiga i nei autu i luga o ala o faasalalauga faaleagafesootai, e aofia ai mea nei:
Faasoa Atu le Malamalama o Iesu Keriso
“Ona o le toatele o i tatou o loo tauivi ma luitau o le tausaga ua tuanai ma isi, e mafai ona faigata ona iloa le mea e mafai ona tatou liliu atu i ai mo le filemu.
“ … Ou te valaaulia outou e faasoa atu le malamalama o le Faaola o Iesu Keriso ia i latou o siomiaina outou. OLonamalamalama maLonaalofa o le a faamaloloina ai o tatou loto … i luitau uma o le olaga.
Peresitene Russell M. Nelson, Facebook,Tes. 16, 2021, facebook.com/russell.m.nelson.
Mulimuli i le Faataitaiga a Iesu Keriso.
“Sa tatou feagai uma lava ma mea maoae ma e lei faamoemoeina.
“I le totonugalemu o lena le mautonu, e na o le tasi lava le auala e lagona ai le filemu—o le filemu moni lea e maua ai le malamalama uma. O lena filemu e maua i le faatuatua i le Alii o Iesu Keriso.
“I lenei Aso Sa o le Lau Pama, ou te valaaulia outou ina ia faapaiaina moni lenei vaiaso a sau e ala i le manatuaina—e le na o alofilima na talotalo mai e faamamalu ai le faitotoa o Iesu i Ierusalema—ae e ala i le manatuaina o alofilima o Ona alofilima.
“I le mavae o mea uma na faia e Iesu Keriso mo outou, ou te valaaulia outou e faia se mea i lenei vaiaso e mulimuli ai i Ana aoaoga. E mafai ona e faia au tatalo ia sili atu le naunautai. E mafai ona e faamagalo atu i se tasi pe fesoasoani i se uo o manaomia le fesoasoani. E mafai ona e amata i le asō i se sailiga fou faaleagaga.”
Peresitene Russell M. Nelson, Facebook, Mat. 28, 2021, facebook.com/russell.m.nelson.
Saili le Olioli E Faavavau
“Ua tatou ola i taimi faigata: o taua ma tala o taua, mafuie, asiosio, galulolo, ma atonu o faalavelave tautupe. O le mea e sili atu ona taua, o tulaga faatauaina ma tulaga faatonuina ua faamamaluina mo le faitau afe o tausaga ua teenaina nei pe ua lafoai ese. O le manatu faapito ua suia ai le auaunaga. Ua ta’ua le leaga o le lelei, ma ua ta’ua le lelei o le leaga.
“E ui ina toilalo loto o tagata, ae e tatau ona e lototele. Sa i ai lava taimi faigata i taimi uma. O i matou, o augatupulaga o o outou augatuaa, na sao mai i ni luitau ogaoga, ma o le a faapena foi outou. O le tali i nei luitau uma e tutusa lava e pei ona sa i ai i taimi uma. Ua i ai so tatou Faaola, ma ua Ia aoaoina i tatou i mea e tatau ona tatou faia.
“Ua Ou fai atu nei mea ia te outou, ina ia outou maua le manuia ia te au. “E maua foi outou e le puapuaga i le lalolagi: a ia outou loto tetele; ua ou manumalo i le lalolagi” (Ioane 16:33).
“Ua aoao mai le Tusi a Mamona o loo i ai fanau a le Atua ina ia latou maua le olioli (2 Nifae 2:25). O lena upumoni maoae e taua i la tatou filosofia o le olaga. O le ituaiga o olioli o loo faasino i ai i tusitusiga paia e le o le fiafia lea tatou te maua i faananati le tumau o le fiafia. O le olioli na foafoaina ai i tatou e tumau.
“Ou te talitonu o lo tatou olioli silisili e maua e ala i le talalelei a Iesu Keriso, lea e faamalamalama ai lo tatou tupuaga o ni agaga, o le foafoaga o le lalolagi, o lo tatou faamoemoega i le olaga nei, ma lo tatou taunuuga i le faavavau.
“Teu ma faalautele ou sootaga faaleaiga. Ia faapelepele ma faaaoga ou avanoa mo le foafoaga i le faaipoipoga e faavavau. Ma faataua au faauoga ma avanoa mo le aoaoina ma le auauna atu, aua o na taumafaiga e mafai foi ona taitai atu ai i le olioli e faavavau.”
Peresitene Dallin H. Oaks, Facebook, Fep. 8, 2022, facebook.com/dallin.h.oaks.
Faatuatuaina le Tama Faalelagi ma Iesu Keriso
“Ou te fia faasoa atu se savali ia te outou o e talavou. Ou te alofa ia te outou. Ou te fia fesoasoani ia te outou. O taimi nei tatou te manaomia uma ai le alofa ma lona popolega mo isi. O faapefea ona e taulimaina ma lau tupulaga le tele o luitau o loo feagai ma oe?
“O faamata’uga patino ma aafiaga faaleaoaoga ma faaletamaoaiga o le KOVITI-19 e mautinoa lava le faateleina o le popole o tagata uma, ma, e pei ona outou silafia, o le popole i isi mataupu e faatusatusa foi i le maualuga o tagata talavou.
“Po o le a lava le mafuaaga o le faateleina tele o le popole ma e fesootai ma le soifua maloloina faalemafaufau, o lo tatou laina muamua lava o le puipuiga o lo tatou faatuatua lea i le Alii o Iesu Keriso. Tatou te talitonu i Ana folafolaga o le filemu ma i le faamamaina lea ua mafai ona o Lana Togiola. Nai lo le tafia faatasi atu i le popole ma le fefe o uiga ia o la outou tupulaga, ia faalagolago i faamautinoaga a se Tama Faalelagi alofa. O fautuaga faapolofesa e tatau foi ona o faatasi ma lenei faagasologa pe a talafeagai ai.
“Ou te uunaia outou ia faalagolago i le fautuaga a Lona Alo alofa, o se Faaola o le na faamautinoa mai ia i tatou e faapea ‘afai ua outou saunia o le a outou le matatau lava’ (Mataupu Faavae ma Feagaiga 38:30).”
Peresitene Dallin H. Oaks, Facebook, Nov. 10, 2020, facebook.com/dallin.h.oaks
Tausi Poloaiga
“E oo lava i lenei taimi faigata, o mataupu faavae o i tatou o taitai o le Ekalesia ua faamoemoe o le a outou malamalama i ai o faavae lava ia o le faatuatua ia Iesu Keriso ma le usiusitai i Lana talalelei sa tatou aoaoina i taimi uma.
“A tatou usiusitai i poloaiga, ua folafola mai e le Alii ia i tatou, “Ou te avatu ia te outou le manuia: ou te le avatu ia te outou faapei ona avatu e le lalolagi. Aua le atuatuvale o outou loto, aua foi tou te matatau” (Ioane 14:27).
“O le filemu ma le faaeaga o aafiaga folafolaina ia o le tausia o poloaiga ma le faalagolago i le Alii.
“O le ala i luma e manino: ‘Ia e faatuatua ia Ieova ma lou loto atoa; a e aua le faalagolago i lou lava atamai.’ Ia e manatua o ia i ou ala uma, ona faatonuina ai lea e ia lava ou ala” (Faataoto 3:5–6).”
Peresitene Dallin H. Oaks, Facebook, Sete. 10, 2021, facebook.com/dallin.h.oaks
Auauna Atu i le Tasi ma le Isi
“Ua tatou ola i se lalolagi o le le mautonu, lavelave, ma le fenumiai. O manaoga o le olaga i aso uma e mafai ona faavaivaia ai i tatou. Ou te talitonu e i ai se mataupu faavae faigofie se tasi ae loloto e mafai ona fesoasoani ia i tatou e faasaoloto ai i tatou lava mai lenei felavesaiga lavelave o luitau e maua ai le filemu o le mafaufau ma le fiafia: auauna atu i le tasi ma le isi.
“E tele auala laiti ma faatauvaa ma tulaga e mafai ai ona tatou auauna atu ma alolofa i isi i le aiga, i le lotu, ma i o tatou nuu.
“O mea tetele e tutupu e ala i faatinoga faigofie ma laiti o le agalelei ma le auauna atu. O le a faaputuputu e avea o se olaga e faatumulia i le alofa mo le Tama Faalelagi, ma tuuto atu i le galuega a le Alii o Iesu Keriso, ma se lagona o le filemu ma le fiafia i taimi uma lava tatou te aapa atu ai le tasi i le isi.”
Peresitene M. Russell Ballard, Facebook, Sept. 1, 2022, facebook.com/mrussell.ballard
Liliu atu i le Alii mo le Auai
“O le Toetu o lo tatou Faaola o Iesu Keriso ua tuuina mai ai ia te au ma i latou uma o e talitonu i Lona suafa le faamoemoe e faavavau e ui lava i luitau tatou te feagai i le olaga. E pei o lena taeao muamua o le Eseta, e mafai ona tatou ala mai i se olaga fou ia Keriso, faatasi ai ma avanoa fou ma le ofoofogia ma mea moni fou a o tatou liliu atu i le Alii mo le auai.”
Peresitene M. Russell Ballard, Facebook, Apr. 17, 2022, facebook.com/mrussell.ballard
Tatalo e lē Aunoa
“Pe a vāvao mea uma, e pei ona i ai i o tatou taimi i aso nei, e finagalo le Alii ia tatou liliu atu ia te Ia i le tatalo.
“E tele taimi ou te mafaufau ai ia te outou o loo puapuagatia, popole, fefefe, pe o lagonaina le tuua toatasi. Ou te faamautinoa atu ia te outou taitoatasi o loo silafia oe e le Alii, Na te silafia oe ma ou atugaluga ma mafatiaga, ma e alofa o Ia ia te oe—māfana patino, e loloto ma faavavau. Faamolemole ia tatalo e le aunoa ma ia faailoa atu i lou Tama oi le Lagi lagona o lou loto.
“I po taitasi pe a ou tatalo, ou te ole ai lava i le Alii ia faamanuia i latou uma o e o mafatia i le loto faavauvau, tiga, tuulafoaiina, ma le faanoanoa. Ou te iloa o le tatalo foi lea a isi taitai o le Ekalesia. E avatu o matou loto, taitoatasi ma soofaatasi ia te outou, ae ava’e a matou tatalo i le Atua mo outou.
“E pei lava ona ou tuuina atu se valaau mo se tatalo i le konafesi aoao ia Oketopa 2020, ou te toe ta’ua foi lena valaaulia i le asō. E le afaina pe faapefea ona e tatalo pe o ai foi e te tatalo i ai, ae faamolemole faaali lou faatuatua—po o le a lava lou faatuatua—ma tatalo mo lou atunuu ma mo taitai faalemalo. E leai se isi mea e sili atu ona taua i le taimi nei nai lo tagata o atunuu uma o loo tatalo mo musumusuga ma taitaiga faalelagi.”
Peresitene M. Russell Ballard, Facebook, Me. 6, 2021, facebook.com/mrussell.ballard.
Taumafai Malosi e Mulimuli ia te Ia
“E sili atu i lo mea uma, ou te faafetai mo le Alii o Iesu Keriso ma Lana faataitaiga ia te au. A o tatou taumafai malosi e mulimuli ia te Ia ma avea ma Ona soo faamaoni, e mafai ona tatou maua le filemu, olioli, ma le fiafia e ui i faafitauli faalelalolagi o loo siomia ai i tatou.”
Peresitene M. Russell Ballard, Facebook, Nov. 27, 2020, facebook.com/mrussell.ballard
Ole Atu mo Faamanuiaga ma le Taitaiga
“Ua ou iloa le mamana o le tatalo mai i o’u lava aafiaga. Talu ai nei, sa ou i ai na o a’u i lo’u ofisa. E le’i leva ona uma se togafitiga faafoma’i o lo’u lima. Sa uno’oa ma totolia, fula, ma sa tiga tele. A o ou saofai ai i la’u kesi, sa le mafai ona ou taula’i atu i mataupu taua ma le tatau aua sa faalavelave mai le tiga lea.
“Sa ou tootuli i le tatalo ma ole atu i le Alii e fesoasoani mai ia mafai ona ou taula’i atu e faatino la’u galuega. Sa ou tu a’e i luga ma toe foi i le faaputuga o pepa sa i luga o la’u kesi. Toetoe o le taimi lava lea, sa oo mai le manino ma le matala o lo’u mafaufau, ma sa mafai ona ou faamae’aina mataupu fitā sa i o’u luma.
“O le tulaga gaogaosa o i ai nei le lalolagi e ono foliga taufaafefe pe a tatou mafaufau i le anoanoai o faafitauli ma luitau. Ae o la’u molimau faamaoni e faapea, afai o le a tatou tatalo ma ole atu i le Tama Faalelagi mo faamanuiaga ma le taitaiga moomia, o le a oo ina tatou iloa e mafai ona faamanuiaina o tatou aiga, tuaoi, nuu, e oo lava i atunuu o loo tatou nonofo ai.”
Peresitene M. Russell Ballard, Facebook, Oke. 26, 2020, facebook.com/mrussell.ballard
Lagolago le Tasi Ma le Isi
“E mafai ona luitauina le olaga … ae a o tatou lagolagoina le tasi ma le isi ma a o tatou faalagolago atu ia Iesu Keriso, o le a Ia fesoasoani ia i tatou i taimi o tofotofoga o le olaga.”
Elder Jeffrey R. Holland, Twitter, Sete. 14, 2022, twitter.com/HollandJeffreyR.
Liliu Atu ia Iesu Keriso
“O le suesueina o le soifuaga o lo tatou Faaola tatou te latalata atili atu ai ia te Ia. … Ou te valaaulia outou ia faaalu se taimi e iloa ai le Alii o le Filemu—Lona soifua mai, soifuaga, savali, ma le toetu. O le tele o lo tatou aoao e uiga ia te Ia ma mulimuli i Lana faataitaiga, o le tele foi lea o le filemu e mafai ona tatou lagonaina i taimi faigata.”
Elder Jeffrey R. Holland, Facebook, Tes. 20, 2021, facebook.com/jeffreyr.holland.
“Talu mai le konafesi aoao, ua faaauau pea ona ou mafaufau loloto e uiga i le auala e mafai ona tatou maua ai le mafanafana faaleAtua a o tatou i ai i lenei lalolagi faaletino. Uso e ma tuafafine, ua tele naua feteenaiga ua tatou vaaia, fefinauai, ma le lē mafaufau o loo vagaia ai i tatou. O le mea e lelei ai, e le o i ai i lenei tupulaga se Taua Lona Tolu a le Lalolagi e tau ai, pe o tatou oo foi i se faaletonu faaletamaoaiga i le lalolagi e pei o le 1929 lea na oo atu ai i se Pa’ū Tele o le Tamaoaiga.
“Ae o loo tatou feagai ma se ituaiga o Taua Lona Tolu a le Lalolagi, e lē o se taua e olopala ai o tatou fili, ae o se faamalosiga faafitafita o fanau a le Atua ina ia agaalofa atili e uiga i le tasi ma le isi, ma ia fesoasoani e faamalolo manu’a tatou te maua i se lalolagi ua matuai fe’aina’i naua. O le Pa’ū Tele o le lalolagi ua tatou feagai nei e itiiti lava se faiā ma se toilalo va’aia o a tatou tupe teu, ae tele atu le faiā i le galoma atu o le talitonuina o oe lava, ma le gau moni o le faatuatua, faamoemoe, ma le alofa moni o siomia atoa ai tatou.
“Peitai o meafaigaluega tatou te moomia e fatu ai se aso sili ona susulu ma totō ai se tamaoaiga o le agalelei faamaoni i faapotopotoga e tele ua saunia ma maua mai i le talalelei a Iesu Keriso. O lea la, i se lalolagi ‘ua felafoai i afa, ma ua le faamafanafanaina,’ e pei ona fetalai mai ai Ieova o le a faapena ona fai, e faapefea ona tatou maua le mea na Ia ta’ua ‘o le feagaiga o le … filemu’? Tatou te maua i lo tatou liliu atu ia te Ia o lē na fetalai mai o le a Ia faia, i aso e gata ai, ‘faatasi ma le agalelei tumau-faavavau’ ma o le a aumaia le filemu i a tatou fanau (tagai Isaia 54:8,10–11, 13).”
Elder Jeffrey R. Holland, Facebook, Aok. 10, 2021, facebook.com/jeffreyr.holland.
Faataitai le Filemu i se Auala Patino
“O lea la, e ui i valo’aga taufaamata’u ma mau faapopoleina o loo ta’utino mai ai o le a aveesea le filemu mai le lalolagi lautele, ae sa a’oa’o mai e perofeta, e aofia ai ma lo tatou lava pele o Russell M. Nelson e lē faapea e ao ina aveese mai ia i tatou ta’ito’atasi!
“Ia, … tatou taumafai e atia’e le filemu i se ala patino, e faaaoga ai le alofa tunoa ma le pulupāsama faamalolo o le Togiola a le Alii o Iesu Keriso ia i tatou lava ma i latou o loo siomia ai i tatou ma o tatou aiga.
“I le lotolotoi o i tatou, o le toatele o loo tauivi ma soo se aofaiga o luitau—faaletino pe faalelagona, faaleagafesootai pe faaletupe, po o le tele o isi ituaiga o faafitauli. Ae o le tele o nei mea e lē lava lo tatou malosi e taulimaina ai e i tatou lava, ona o le fesoasoani ma le filemu tatou te manaomia e le o le ituaiga lea e ‘aumai e le lalolagi’ (Ioane 14:27). Leai, mo faafitauli moni faigata tatou te manaomia i tusitusiga paia ua ta’ua ‘o mana o le lagi’ (Mataupu Faavae ma Feagaiga 121:36).
“E ui i le faalataina ma tiga, e ui i le agaleagaina ma uiga pa’ā’ā, a o tauaveina agasala ua faula’i a le aiga atoa o le tagata, na silasila ifo le Alo o le Atua soifua i lalo i le ala umi o le olaga faaletino, silasila mai ia i tatou i le faaiuga o lenei vaiaso, ma fetalai mai: ‘Ou te tuuina atu ia te outou le [filemu], o lo’u [filemu] ou te avatu ai ia te outou: ou te le avatu ia te outou faapei ona avatu e le lalolagi. Aua le atuatuvale o outou loto, aua foi tou te matatau’ (Ioane 14:27).”
Elder Jeffrey R. Holland, Facebook, Apr. 3, 2021, facebook.com/jeffreyr.holland.
Tuu Atu Atoa le Faatuatuaga ia Iesu Keriso
“E faanoanoa lo’u loto mo le tiga o le tuuatoatasi ma le atuatuvale atonu o loo e oo i ai i lenei taimi. Peitai, ona o le taulaga a lo tatou Togiola pele, ua leai ai se tui o le oti, ua leai ai se manumalo o le tuugamau, o le a faasa’oina mea sese, ma e leai se mana tumau o Satani.
“E afe ane le tagi i le afiafi, a o le alaga fiafia i le taeao” (Salamo 30:5).
“O le alofa atoatoa, loloto, ma le faavavau o Keriso ua tatou maua ai le mautinoa e fetaomi atu ai i o tatou popolega. Ona o Lona Toetu mamalu, ua mafai ai ona tatou tuu atu lo tatou faatuatuaga atoa ia te Ia, e oo lava i taimi sili ona faigata.
“‘O le Atua o lo tatou sulufaiga ma le malosi’ (Salamo 46:1).
“Ia filemu ma ia iloa o a’u lava o le Atua’ (Salamo 46:10).”
Elder Dieter F. Uchtdorf, Facebook, Apr. 17, 2022, facebook.com/dieterf.uchtdorf
Sau ia Iloa le Faaola
“Atonu e talitonu nisi o outou o Iesu Keriso o le Alo o le Atua ma sa Ia ofoina mai se taulaga togiola e le iu ma faavavau. Ae atonu foi e te talitonu o Lana Togiola e aoga mo isi tagata uma—ae le o oe. E te faatinoina le faatuatua i le Faaola ae atonu e le talitonu o Ana faamanuiaga folafolaina uma o loo avanoa mo oe pe e mafai foi ona faagaoioia i lou olaga. Ou te valaaulia oe ia le gata ina e iloa e uiga i le Alii, ae ia e iloa foi o Ia.
“Sa apoapoai mai le Faaola ia i tatou ina ia avea e faapei o Ia. E oo ina tatou iloa le Alii pe a tatou saili atu e ala i le mana o Lana Togiola ia avea ai e pei o Ia. E oo ina tatou iloa le Alii pe a tatou auauna atu ma galulue i Lona malo. E oo ina tatou iloa atili le Alii pe a le gata ina tatou talitonu ia te Ia ae talitonu foi ia te Ia ma Ana faamautinoaga.
“O le talitonu ia te Ia—taliaina o le moni o Lona mana ma folafolaga—e valaaulia ai se vaaiga, filemu, ma le olioli i o tatou olaga. O Lana Togiola e maioio; e patino lava. Ma e mo i tatou foi taitoatasi.”
Elder David A. Bednar, Facebook, Mat. 14, 2021, facebook.com/davida.bednar.
Mulimuli i le Malamalama ma Faataitaiga a le Faaola
“I lenei vaitau matagofie o le Eseta, tatou te olioli i mea uma lava ua faia e le Faaola mo i tatou. Na Ia tuuina mai Lona soifua o se Togiola sui, faatoilaloina o le oti ma le tuuina atu o le togiola mo tagata uma. Ou te folafola atu o le mulimuli i Lona malamalama ma faataitaiga o le a aumaia ia i tatou le olioli sili atu, fiafia, ma le filemu i lenei olaga nai lo se isi lava mea.”
Elder Quentin L. Cook, Facebook, Ape. 17, 2022, facebook.com/quentin.lcook.
Ia Talitonu Maua’i ia Iesu Keriso
“Sa faamamaluina i maua ma Rosana e talanoa talu ai nei ma tamaiti aoga i le BYU–Idaho. Sa matou faaaluina sina taimi e talanoaina ai popolega ua faaalia e le toatele o tagata talavou e uiga i auala e mafai ona e lagonaina ai le mautinoa ma le filemu e uiga i le lumanai pe a le foliga mai tulaga o le lalolagi i lena folafolaga.
“Ou te faamautinoa atu ia te outou o lo tatou talitonuga i lo tatou Faaola o Iesu Keriso o le a faamalosia ai i tatou e faaauau pea ona agai i luma i le olaga, e ui lava i luitau tatou te oo i ai.
“O le o mai ia te Ia e le nonoaina ai i tatou i lalo pe faatapulaa ai lo tatou saolotoga! Ae, tatou te maua ai le mafuaaga mo le faamoemoe mausali ma tuuina mai ai se taula mautu i o tatou agaga, e tuuina mai ai ia i tatou se filemu tumau i totonu lea e manaomia ona tatou ola ai i nei aso ma maua ai le malologa ia te Ia.
“Afai tatou te le liliuese mai le malamalama tatou te maua mai le Faaola, o le a tatou le maua se lagona le lelei o le gaogao i o tatou olaga ae o se atoaga e faatumulia ai afeafe aupito i totonu o o tatou agaga.
“E ala mai i le Faaola o Iesu Keriso ma Lana taulaga togiola faamalolo ua mafai ai ona tatou tutu maualuga ma malolosi, e ui lava i le feagai ai ma faigata. O le mana faamalolo a le Faaola e faatumulia ai o tatou agaga i le filemu, susulu, malamalama, olioli, ma le alofa.”
Elder Ulisses Soares, Facebook, Me 20, 2021, facebook.com/soares.u.