“O Lo’u Manuia Ou Te Avatu Ai ia Te Outou,” Liahona, Mat. 2023.
“O Lo’u Manuia Ou Te Avatu Ai ia Te Outou”
O upu lava na fetalai atu ai Iesu i le Sami o Kalilaia i lena po afā, ua Ia fetalai mai ai ia i tatou i taimi o afā o ō tatou olaga: Faalologo ia, ina malū ia.”
Atapue mai le Getty Images
Mo a’u ma lo’u aiga, o le taumalulu malulu o le 1944 sa o se taimi o le fefe ma le lē mautonu. Faatasi ai ma le mamao o lo’u tamā i le itu i sisifo, sa tauivi lo’u tina e fafaga ma faamafanafana lana fanau e toafa a o faamata’u mai le taua i lo matou fale i Siekisolovakia.
O aso taitasi e latalata atili mai ai le tulaga lamatia. Mulimuli ane, sa filifili lo’u tinā e sola i le fale o ona mātua i Siamani i sasae. I se isi itu, sa mafai ona ia aveina uma i matou i se tasi o nofoaafi mulimuli o le au sulufai e agai atu i sisifo. O pa’ō o vaega pāpā lata ane, o foliga popole, ma le mole manava na faamanatu maia i tagata uma i luga o le nofoaafi sa matou malaga atu i se sone o taua.
I se tasi po ina ua tu le matou nofoaafi mo sapalai, sa faanatinati atu lo’u tinā i fafo e saili mo ni meaai. Ina ua ia toe foi mai, o se tulaga na matua ia fefe ai, ua leai se nofoaafi sa i ai i matou le fanau!
I le tumu i le popole, sa ia liliu atu ai i le Atua i se tatalo faatauanau ona amata ai lea ona saili ma le popole i le nofoaga pogisa o nofoaafi. Sa ia tamoe mai lea auala i lea auala ma mai lea nofoaafi i lea nofoaafi. Sa ia iloa afai e aluese atu lana nofoaafi ae na te le’i mauaina, atonu o le a ia lē toe vaai lava ia i matou.
Afā i o Tatou Olaga
I le taimi o le galuega a le Faaola i le olaga nei, sa aoao ai e Ona soo e mafai ona Ia faatoafilemuina afā i o tatou olaga. I se tasi afiafi, ina ua mavae se aso atoa o le aoao atu i tafatafa o le sami, sa fautuaina e le Alii ia latou “o atu ia i le tasi itu” o le Sami o Kalilaia (Mareko 4:35).
Ina ua latou tuumuli atu, sa maua e Iesu se nofoaga e malolo ai i luga o le vaa ma tofā ai. E le’i umi ae pouliuligia le lagi, “ona to mai lea o le afā, o le matagi tele lava, ona fati mai ai lea o peau i totonu o le vaa, ua tumu ai” (tagai Mareko 4:37–38).
Tatou te lē iloa po o le a le umi na tauivi ai le au soo e faaopeopea le vaa, ae na iu lava ina lē mafai ona latou toe faatali. I le popole, sa latou alalaga atu ai, “Le Aoao e, e te le manatu mai ea ia te i matou a fano?” (Mareko 4:38).
Tatou te feagai uma lava ma afā faafuasei. I lo tatou olaga faaletino o faaosoosoga ma tofotofoga, atonu tatou te lagonaina le faanoanoa, lotovaivai, ma le lē fiafia. E nutimomoia o tatou loto mo i tatou lava ma i latou tatou te alolofa i ai. Tatou te popole ma fefefe ma o nisi taimi e leai ai se faamoemoe. I taimi faapena, atonu tatou te alalaga atu foi, “Le Aoao e, e te lē manatu mai ea ia te a’u a fano?”
I lo’u talavou, o se tasi o viiga e sili ona ou fiafia i ai o le “Matai e, Ua Sou le Vasa.”1 Sa mafai ona ou vaai faalemafaufau ia te a’u lava i totonu o le vaa ina “ua tele [lava] le afa.” O le vaega taua ma sili ona matagofie o le viiga o loo mulimuli mai: “Matagi ma galu malū ia oe: Filemu, filemu.” Ona oo mai lea o le sāvali tāua: “Leai o se sami na te malua le vaa e tofa ai o Ia, le Pule o lalo nei ma luga.”
Afai tatou te talia Iesu Keriso, le Alii o le Filemu, i totonu o lo tatou vaa, e lē tatau ona tatou fefefe. O le a tatou iloa e mafai ona tatou maua le filemu i le lotolotoi o afā o loo taavilivili i totonu o i tatou ma siomia ai i tatou. Ina ua uma ona alalaga Atu Ona soo mo se fesoasoani, sa “tulai [Iesu], ma na vavao atu i le matagi, ua fetalai atu foi i le vai, Faalologo ia, ina malū ia. Ona mate lea o le matagi, i le ua matuā malū” (Mareko 4:39).
O upu lava ia na fetalai atu ai Iesu i le Sami o Kalilaia i lena po afā, ua Ia fetalai mai ai ia i tatou i taimi o afā o ō tatou olaga: “Faalologo ia, ina malū ia.”
“[Ou te] lē Avatu Faapei ona Avatu e le Lalolagi”
Faatasi ai ma le au soo, atonu tatou te fesili, “Po o ai lava lenei, ina ua faalogo lava le matagi ma le vai ia te ia?” (Mareko 4:41).
O Iesu o se tagata e lē pei o se isi. I le avea ai ma Alo o le Atua, sa valaauina o Ia e faataunuu se misiona e lē mafai e se isi ona faataunuuina.
E ala i Lana Togiola, ma i se ala e lē mafai ona tatou malamalama atoatoa i ai, na tauave ai e le Faaola i Ona lava luga “tiga ma puapuaga ma faaosoosoga o ituaiga eseese uma” (Alema 7:11) ma “le mamafa tuufaatasi o agasala uma faaletino.”2
E ui e le’i nofo aitalafu o Ia i le faamasinoga tonu, ae sa Ia mafatia “atoa … [i] manaoga o le faamasinotonu” (Alema 34:16). I upu a Peresitene Boyd K. Packer (1924–2015), Peresitene o le Korama a Aposetolo e Toasefululua, “E leai sana mea sese na fai. Peitai, o le tauaofaiga uma o le tausalaga, o le faanoanoa ma le faavauvau, o tiga ma le faamaasiasia, o mafatiaga uma faalemafaufau, lagona, ma faaletino i le tagata—Na Ia oo i nei mea uma.”3 Ma sa Ia faatoilaloina i latou uma.
Na valoia e Alema o le Faaola “o le a ia ave i ona luga le oti, ina ia mafai ona ia tatalaina fusi o le oti ia ua noatia ai ona tagata; ma o le a ia ave i ona luga o latou vaivaiga, ina ia mafai ona faatumuina ona loto i le alofa mutimutivale, e tusa ai ma la le tino, ina ia mafai ona ia silafia e tusa ai ma la le tino, le ala e fesoasoani ai i ona tagata, e tusa ma o latou vaivaiga (Alema 7:12).
E ala mai i se faaeega paia na fanau mai i le tiga matautia, ma ona o le alofa mo i tatou, na totogi ai e Iesu Keriso le tau e togiola ai i tatou, e faamalosia ai i tatou, ma laveai ai i tatou. Ua na o le Togiola lava e mafai ai ona tatou maua le filemu lea tatou te faananau lava i ai ma manaomia i lenei olaga. E pei ona sa folafola mai e le Faaola, “Ou te tuuina atu ia te outou le manuia, o lo’u manuia ou te avatu ai ia te outou: ou te le avatu ia te outou faapei ona avatu e le lalolagi. Aua le atuatuvale o outou loto, aua foi tou te matatau” (Ioane 14:27).
O le soifuaga ma aoaoga a Iesu Keriso tatou te maua ai auala e lagona ai Lona filemu pe afai tatou te liliu atu ia te Ia.
Ata o Keriso, saunia e Heinrich Hofmann
Auala i le Filemu
O Iesu Keriso, o lē e puleaina elemene, e mafai foi ona faamāmāina a tatou avega. Ua ia te Ia le mana e faamalolo ai tagata taitoatasi ma malo. Ua Ia faaali mai ia i tatou le ala i le filemu moni, auā o Ia “O Le Alii o le Filemu” (Isaia 9:6). O le filemu ua ofoina mai e le Faaola e mafai ona suia uma ai le olaga faaletagata pe afai e faatagaina e fanau a le Atua. O Lona soifuaga ma aoaoga tatou te maua ai auala e lagona ai Lona filemu pe afai tatou te liliu atu ia te Ia.
“Aoao mai ia te a’u, ma faalogo mai i a’u upu; savali i le agamalu o lo’u Agaga, ma o le a e maua ai le filemu ia te a’u” (Mataupu Faavae ma Feagaiga 19:23).
Tatou te aoao e uiga ia te Ia a o tatou siitia o tatou agaga i le tatalo, suesue i Lona soifuaga ma aoaoga, ma “tutu … i nofoaga paia,” e aofia ai le malumalu (Mataupu Faavae ma Feagaiga 87:8; tagai foi i le 45:32). Auai soo i le maota o le Alii i le tele e te mafaia ai. O le malumalu o se sulufaiga toafilemu mai afā faatupulaia o ō tatou aso.
Na aoao mai la’u uo pele o Peresitene Thomas S. Monson (1927–2018): “A o tatou o atu i le [malumalu], a o tatou manatuaina feagaiga ua tatou osia ai i totonu, o le a mafai ona tatou onosaia tofotofoga uma ma faatoilaloina faaosoosoga taitasi. E aumai e le malumalu faamoemoega mo o tatou olaga. E aumaia le filemu i o tatou agaga—e lē o le filemu e aumai e tagata ae o le filemu lea na folafola mai e le Alo o le Atua.”4
Tatou te faalogo i Ana afioga a o tatou uai atu i Ana aoaoga i tusitusiga paia ma mai Ana perofeta soifua, faataitai i Ana faataitaiga, ma o mai i Lana Ekalesia, lea e faaaumeaina ai i tatou, aoao, ma fafagaina i le afioga lelei a le Atua.
Tatou te savavali i le agamalu o Lona Agaga a o tatou alolofa atu e pei ona Ia alofa mai, faamagalo atu a o Ia faamagalo mai, salamo, ma faia o tatou aiga ma nofoaga e mafai ona tatou lagonaina ai Lona Agaga. Tatou te savavali foi i le agamalu o Lona Agaga a o tatou fesoasoani atu i isi, auauna atu ma le olioli i le Atua, ma taumafai ia avea ma “soo fifilemu o Keriso” (Moronae 7:3).
O nei laasaga o le faatuatua ma galuega e taitai atu ai i le amiotonu, faamanuia ai i tatou i la tatou faigamalaga o le avea ma soo, ma aumaia ai ia i tatou le filemu ma le faamoemoe.
“Ina Ia Outou Maua le Manuia Ia Te Au”
I se po pogisa i se nofoaga faatali nofoaafi i le tele o tausaga ua mavae, sa feagai ai lo’u tinā ma se filifiliga. Sa mafai ona nofo o ia ma faavauvau i le mala o le maliliu o lana fanau, pe mafai foi ona ia faatinoina lona faatuatua ma lona faamoemoe. Ou te faafetai i le faatoilaloina ai e lona faatuatua o lona fefe ma o lona faamoemoe na faatoilaloina lona popole.
Mulimuli ane, i se vaega mamao o lea nofoaga, sa ia mauaina ai le matou nofoaafi. O iina, mulimuli ane, na matou toe faatasia ai. I lena po, ma i le tele o ao ma po afā o le a oo mai, o le faataitaiga a lo’u tinā o le faatinoina o le faatuatua na faamalosia ai i matou a o matou faamoemoe ma galulue mo se lumanai manuia.
O le asō, o le toatele o fanau a le Atua ua latou iloa foi ua masii ese foi la latou nofoaafi. O ō latou faamoemoega ma miti mo le lumanai ua aveesea e taua, faama’i pipisi, ma le leai o se soifua maloloina, galuega, avanoa faaleaoaoga, ma ē pele. Ua latou lotovaivai, tuuatoatasi, tuulafoaiina.
Uso e ma tuafafine, uo pele, ua tatou ola i aso faigata. Ua i ai faafatiatama’iga o atunuu, ua i ai le faamasinoga i luga o le laueleele, ma ua aveesea le filemu mai le lalolagi (tagai Mataupu Faavae ma Feagaiga 1:35; 88:79). Ae e lē tatau ona aveesea le filemu mai o tatou loto, e tusa lava pe tatau ona tatou mafatia, faavauvau, ma faatalitali i le Alii.
Ona o Iesu Keriso ma Lana Togiola, o le a taliina ai a tatou tatalo. O le taimi e ā le Atua ia, ae ou te molimau atu o ō tatou manaoga amiotonu o le a i ai se aso e faataunuu ai ma o a outou mea uma e leiloloa o le a toe faatutumu mai ia i tatou, pe afai tatou te faaaogaina le meaalofa paia o le salamo ma tumau faamaoni.5
O le a faamaloloina i tatou—faaletino ma faaleagaga.
O le a tatou tutū ma le mama ma le paia i luma o le pa faamasino.
O le a toe faatasia i tatou ma ē pele i se toetutu mamalu.
O le taimi nei, tau ina ia faamafanafanaina i tatou ma faamalosiauina a o tatou faalagolago i le folafolaga a le Faaola: “Ina ia outou maua le manuia ia te au” (Ioane 16:33).