E Na’o Tusiga Faatekinolosi: Autalavou Matutua
Auala na Fesoasoani ai le A’otauina—ma le Faatuatua—ia te A’u e Taulima ai le Le Mautonu
Ina ua masae lo’u ACL, sa ou le mautinoa pe na faapei foliga o le lumanai, ae o lena aafiaga na taitai atu ai a’u i le tele o mea nai lo le mea sa mafai ona ou mafaufauina.
Ou te manatua lo’u sau i le fale mai le falemai i lena aso. Sa fesoasoani o’u matua ia te a’u mai le taavale, i le fale, ma luga o lo’u moega. Ou te manatua lo’u taooto ai iina, ma le lagonaina o le leai o se faamoemoe mo le taimi muamua i lo’u olaga.
Sa ou ola a’e ma taalo i taaloga. Sa ou faamoemoe foi ou te tamoe i miliga i le kolisi i se aso. Ae i le taufaaiuiuga o le aoga maualuga, sa masae ai lo’u (ACL) i lo’u tulivae—mo le taimi lona lua. O lenei mea na manaomia ai ni taotoga ma le silia ma se tausaga o le faamalolo ma toe toleni ia mafai ona toe gaioi e faaleleia ai. O la’u taotoga muamua lava sa faia ae ou te lei faauu, ma sa tatau ona ou nofo i le fale a o amata e a’u uo le isi mataupu o o latou olaga i le suesueina o kolisi fou, auauna atu i misiona, ma siitia atu i aai fiafia. O lo’u lumanai, sa i ai se taimi na mautinoa ai, ua tumu nei i le le mautonu.
Ou te ioe, sa ou iloa o nei luitau e le tulaga ese pe maoae, ae oo’uluitau—ma sa faigata! O la’u tali vave atu o le aapa atu lea mo soo se lagona o le mautinoa ma fatuina ni fuafuaga mo lo’u lumanai. Ae i lena faagasologa o le taumafai mo le faamautinoaga faaletagata lava ia po o le saogalemu, o se faagasologa o loo faaauau pea i le asō, ua ou aoaoina ai ni nai mea.
Avanoa i le Le Mautonu
Sa ta’u mai e se epikopo atamai ia te a’u i se tasi taimi, “O se tasi o faamoemoega o le talalelei e le o le aveesea lea o o tatou luitau ae ia fesoasoani ia i tatou e faatoilaloina.”
Afai tatou te saili e aoao mai le le mautonu, nai lo le aloese mai ai, o o tatou aafiaga e mafai ona fesoasoani tatou te latalata atili atu ai i le Faaola. Ua fautuaina foi e fomai o le mafaufau e faapea o le ola ai ma le le mautonu feoloolo o le nofoaga sili lea e avea ai mo le tuputupu a’e faaletagata lava ia.1 Ae i le iuga, tatou te taulimaina ma le le mautonu e ala i le taliaina ma le faatuatua.
Na saunoa mai le Peresitene o le BYU–Pathway Worldwide Brian K. Ashton: “Agai i luma i le faatuatua. Afai e le mafai ona e vaaia le tali i ou faafitauli i le taimi nei, talitonu o le a oo mai na vaifofo a o e agai i luma pe afai o e faia le mea e finagalo le Atua e te faia.”2 O le le mautonu e sili ona taulimaina pe a tatou galulue ma le mautinoa, aoao ao tatou o, a o faatuatua o le a fesoasoani mai le Atua ia i tatou pe a tatou faalagolago atu ia te Ia.
O Aoaoga e Mafai Ona Atili Mautinoa ai o Tatou Lumanai
Sa i ai se matafaioi taua a le aoga i le fesoasoani mai ia te a’u ia malamalama i le le mautonu. A o o’u manuia mai le taotoga, sa amata ona ou aveina kosi o le Iunivesite Polika Iaga–Idaho i luga o le initoneti. Sa ou le mautinoa muamua pe sa sa’o le aoaoina i luga o le initoneti mo a’u, ae o aafiaga ofoofogia sa vave ona suia ai lo’u manatu.
Sa ou aoaoina ni mea se tele mai tagata o la’u vasega sa i ai i ni tulaga eseese. O la’u aoga na fesoasoani ia te a’u e mafaufau ese ai e uiga ia te a’u lava ia ma le lalolagi o siomia a’u, ma sa amata ona suia a’u mea e faamuamua. Sa amata ona ou fiafia e aoao nai lo le tau lava ina alu i le aoga, ma sa sili atu le taua o le talalelei a Iesu Keriso i lo’u olaga.
A aunoa ma la’u aoga, o le a le avea a’u ma tagata ua avea ai a’u i le asō. Ou te talitonu o la’u filifiliga e auauna atu i se misiona talai sa mafua ona o na kosi. Ou te talitonu sa taialaina a’u e le Atua ma o le a faaauau pea ona galue faatasi ma a’u e pei ona ou faatuatua ia te Ia.
Vaaia O Le Ata Tele Atu
E ui o loo faatumulia pea le lumanai i le le mautonu, ae ua ou le toe popole ai. Ua faamalosia e o’u aafiaga la’u sootaga ma le Atua ma fesoasoani ia te a’u e suia lo’u auala i le olaga. Nai lo le soona mafaufau i mea uma (o se mea ou te lelei tele ai), ua ou iloaina o nisi taimi e manaomia ona ou faatinoina. E le o se uiga taufaafefe lenei, ae o le mautinoa ua ou iloa nei o le a fesoasoani mai le Tama Faalelagi ia te a’u, musuia a’u, ma tatala faitotoa o avanoa mo a’u a o o’u laa atu i luma i le faatuatua.
Sa saunoa talu ai nei Peresitene Russell M. Nelson, “O le galuega lelei faaleagaga o le a faatumauina ai lo tatou agai i luma i le lotolotoi … fefe ma le le mautonu.”3 Faatasi ai ma le lototele ua ou mauaina, ua suia le ao o le le mautonu i se faamoemoe susulu mo le lumanai. A toe tepa i tua, ua ou iloa ai sa faatasi le Atua ma a’u—atonu e le o auala sa ou faamoemoeina, ae sa i ai pea o Ia iina i le ala sa sili ona ou manaomia ai o Ia.