Ina ua Pogisa Lo’u Lalolagi, sa Ou Liliu Atu ia Keriso

Saunia e Maria Celeste Ramirez Mendoza

Faatasi ai ma le tele o mea pogisa na tutupu i o’u tafatafa, sa ou lē mautinoa po o le a le uiga o le i ai o se faavae ia Keriso.

Ata

tamaitai o loo tilotilo agai atu i se malamalama

Ata mai le Getty Images, faatinoina e le tagata e faataitaia

I se sāvali talu ai nei o le konafesi aoao, sa saunoa ai Peresitene Henry B. Eyring, Fesoasoani Lua i le Au Peresitene Sili, e uiga i taimi faigata i le lalolagi: “Sa tusi atu le Aposetolo o Paulo ia Timoteo, ‘A e ia e iloa e oe lenei mea, o ona aso e gata ai e oo mai ai aso faigata’ (2 Timoteo 3:1).

“… Ma o lea o le a faasolo faigata atili, e lē faigofie, le faamamaluina o feagaiga e tatau ona tatou osia ma tausia ia ola ai i le talalelei a Iesu Keriso.”¹

A o o’u faalogo atu i nei upu, sa ou lagona le popole. Sa ou feagai ma luitau i lo’u aiga i Venesuela. O lea la o fesili e pei o le, “E mafai faapefea ona ou tumau i le faamoemoe pe a matuā pogisa le lalolagi?” ma le “E mafai faapefea ona ou tulimatai atu i se lumanai manuia i se taimi pogisa faapena?” sa i ai i lo’u loto i lena taimi.

Ae na ofoina mai e Peresitene Eyring le fofō. Sa ia sii maia le Helamana 5:12, lea o loo talanoa e uiga i le fausiaina o lo tatou faavae “i luga lava o le papa o lo tatou Togiola, o le o Keriso lea.”

Sa ou talitonu lava i taimi uma e moni lenei mau, ae o le fausiaina o lou faavae i luga o le Faaola na foliga mai e sili atu ona faigofie ona faaleoina nai lo le faatinoina. Ae ui i lea, a o o’u latalata atili atu ia Keriso, ua ou vaaia ai, e galulue faatasi mea uma mo lo outou lelei pe a mausali lo outou faatuatua ia te Ia (tagai Mataupu Faavae ma Feagaiga 90:24).

Lagonaina o le Tuulafoaiina

I le lua masina talu ai, sa ou maua ai se tala faanoanoa mai lo’u aiga. Sa foliga mai na nutililii lo’u lalolagi i o’u luma. Sa ou lagona le vaivai, lē mautonu, ma le popole tele lea na ou ma’i ai!

Sa ou lē malamalama pe aisea na matou feagai ai ma na faigata a o o’u taumafai e faamaoni. Sa ou mafaufau pe na ou faia se mea sesē. Sa foliga lē mautonu le lumanai, ma sa ou lagonaina le tuulafoaiina e le Tama Faalelagi ma Iesu Keriso.

I le totonugalemu o lo’u puapuagatia, sa ou talanoa atu ai i se uo lelei. Sa ia ta’u mai ia te a’u se mea o le a lē galo lava ia te a’u: “Ou te manatu o lenei tulaga o se avanoa lelei lea mo oe e mafaufau loloto ai i lau sootaga patino ma le Alii. E tusa lava po o le a lava le mea e tupu, e pule lava oe i le liliu atu ia te Ia mo se fesoasoani. Afai e te faia, o le a Ia tuuina atu ia te oe le alofa ma le toomaga e te manaomia i le taimi nei lava.”

O na upu na suia ai la’u vaaiga. Sa ou ita ma tiga ma lē mautonu i o’u tulaga, ae sa i ai sa’u filifiliga. E tusa lava po o a mea o tatou feagai ai, po o a mea tatou te fefefe ai, po o a foi mea taufaafefe o loo tatou feagai, e i ai lava Iesu Keriso i o tatou autafa i taimi uma. Ua ia i tatou le filifiliga e liliu atu ia te Ia ma le faatuatua, ae lē o le mamao mai ia te Ia, i taimi faigata.

O le aualalena tatou te faamalosia ai lo tatou faavae o le faatuatua ia te Ia ma tetee atu ai i faigata i le lalolagi. E ala i le filifilia o Ia.

E pei ona sa aoao mai Elder D. Todd Christofferson o le Korama a Aposetolo e Toasefululua: “i le lotolotoi o le afi a le tunu auro, nai lo le ita i le Atua, ia faalatalata atu i le Atua. Valaau atu i le Tama i le suafa o le Alo. Savavali faatasi ma i La’ua i le Agaga, i lea aso ma lea aso. Tuu atu ia i La’ua pe a mavae se taimi e faaali mai lo La’ua faamaoni ia te oe. Sau ma le faamaoni ia iloa i La’ua ma ia e iloa moni oe lava.²

Sa faatalitali mai Keriso mo a’u e liliu atu ia te Ia mo se fesoasoani. E lē faapea o le a Ia aveesea uma o’u faafitauli pe faaleleia mea uma i lo’u olaga ma lo’u aiga i le taimi lava lena, ae sa Ia fesoasoani mai ia ou lelei atili, maua le olioli, ma faaleleia atili.

Ma i le āluga o taimi, a o o’u saili i le Faaola e ala i le tatalo, suesue i tusitusiga paia, ma le faatuatua, sa Ia fesoasoani mai ia te a’u e faamagalo tagata o lo’u aiga ma toe valaaulia le olioli i lo’u olaga, e ui lava o nisi o luitau e le’i foia lava.

O Se Folafolaga o le Saogalemu

E mautinoa lava o aso nei e gata ai e faigata. Tatou te faalogo i taua ma tala o taua, o faama’i oti, o mala faalenatura—ma ou te mautinoa o le a i ai taimi sili atu ona faigata i luma atu. Peitai, o le atiina a’e i luga o le papa o Iesu Keriso ma le faalagolago ia te Ia o le a aumaia ai pea ia i tatou le filemu ma le olioli, e tusa lava po o a mea o tatou feagai. E pei ona sa aoao mai Peresitene Eyring, “Mo i tatou o e popole i lena ituaiga lumanai mo i tatou lava ma mo i latou e pele ia i tatou, o loo i ai le faamoemoe i le folafolaga na tuuina mai e le Alii ia i tatou, e uiga i se nofoaga o le saogalemu mai afā o loo faamalumalu mai.”³

O se folafolaga mamana ma matagofie. Ma ua ou vaai i lena folafolaga o faataunuuina i lo’u olaga. Ou te iloa o le talalelei toefuataiina lenei a Iesu Keriso ma o Ia o le punāvai o faamanuiaga uma. O Ia o le malamalama, o Ia o lo tatou Faaola, ma o i tatou o Ana mamoe. Ia tatou filifili o Ia ma filifili le faatuatua.

E alala le tusitala i Zulia, Venesuela.