“O Le A Lelei Mea Uma,” Liahona, Mat. 2023.
O Leo o le Au Paia o Aso e Gata Ai
O Le A Lelei Mea Uma
Sa foliga mai e lē gata mai itula seia oo ina alu atu se tasi o fomai tipitipi i lo’u tinā i le potu faatalitali.
Ata pu’e o Russell M. Nelson na saunia e Eldon K. Linschoten
I le amataga o le 1980, o lo’u tamā, o lē sa mafatia mai le ma’i tūgā o le fatu, sa faia se taotoga o le fatu lea sa matou faamoemoe o le a faaumiumi ai lona ola.
I le taimi lea, sa fou i Iurukurei faatinoga faapitoa na faia e fomai tipitipi. Na suia e fomai tipitipi le alatoto o le eioti (aortic) i se alatoto fai. Mulimuli ane, na avea lenā faiga ma mea masani ma ua faasaoina ai le anoanoaʻi o ola.
Talu ai ona o le taotoga na aofia ai lenei faatinoga faataotoga maoae, sa toatele nisi o fomaʻi o le fatu na auai ai, e mātauina le taotoga. A o faagasolo le taotoga, sa nofo lo’u tinā ma le popole i le potu faatalitali. Sa foliga mai e lē gata mai itula.
Sa ma olioli ina ua ma iloa ua manuia atoa le taotoga. Ina ua tuua le potu o taotoga, sa alu ese mai se tasi o fomai tipitipi mai isi fomai tipitipi ma alu atu i le potu faatalitali. O ia o se fomai tipitipi asiasi lea na sau i Iurukuei e vaai le taotoga.
Sa alu atu o ia i lo’u tinā, tu, ma pa’i atu ma se faamautinoa i luga o lona tau’au. Ona, tilotilo atu lea i ona mata, ma fai atu, “O le a lelei mea uma.”
Na sa’o lava le fomai. Sa soifua lo’u tamā i le isi 24 tausaga, ma auauna atu i le Alii ma lona loto atoa—ua soifua maloloina nei—seia oo i le aso mulimuli o lona ola.
I le taimi o le konafesi aoao aupito lata mai a le Ekalesia, sa faamanatu mai ai i lo’u tinā lena asiasiga faapitoa i le tele o tausaga ua mavae. O le mea moni, e faamanatu atu pea ia te ia i taimi uma e saunoa ai lena fomai tipitipi asiasi—o Peresitene Russell M. Nelson—i le Au Paia.
O perofeta uma a le Alii e faapitoa ia i tatou i nisi o auala. O nisi e faapitoa ona sa latou auauna atu o se Peresitene o le Ekalesia a o tatou laiti. O nisi e faapitoa ona sa latou auauna atu o se Peresitene ina ua tatou papatiso. Mo i ma’ua ma lo’u tinā, e faapitoa lava Peresitene Nelson auā ua ia iloa o taotoga ogaoga uma faafomai e lē gata ina pa’i atu i le tagata ma’i ae faapea foi i e pele i lena gasegase. Na te silafia e manaomia e tagata o le aiga ni upu faalaeiau, le malosi, ma le faamautinoaga pe a lamatia le soifua maloloina po o le olaga o sē e pele.
O le a ma faafetai pea mo upu faamautinoa a Peresitene Nelson i tausaga ua leva i Iurukuei ma mo lona soifua auauna i le Tama Faalelagi ma fanau a le Tama Faalelagi.