E Na’o Tusiga Faatekinolosi: Tamā o Aso e Gata Ai
O Le Vavega e Sili ona Taua
E alala le tusitala i le ISA.
Sa ou tatalo mo le Faaola ina ia agaalofa mai ia i matou ma faamalolo lo ma afafine. O le vavega na matou mauaina e le o le mea lea sa ou faamoemoeina.
Ata pue na faaali e tagata faataitai
E tele faataitaiga o le agaalofa o le Faaola i le Feagaiga Fou. Ina ua uma ona faamalolo e le Faaola le tagata na i ai temoni, sa Ia fai atu ia te ia, “Alu atu ia oe i lou fale, i lou aiga, ma ia e ta’u atu ia te i latou mea tetele ua faia e le Aliii ia te oe, ma lona alofa ia te oe” (Mareko 5:19). I se taimi na manaomia ai e tagata meaai, sa “agaalofa atu Keriso i le motu o tagata” (Mareko 8:2) ma faia ni nai potoi areto ma i’a e fafaga ai pe tusa ma le fa afe tagata (tagai fuaiupu 1–9).
Sa faapena foi ona ma mananao ma lo’u toalua i le agaalofa faavavega o Iesu Keriso e faamalolo ai lo ma afafine faatoa fanau. Sa maua e fomai se fula telē i le ava o lona manava. Sa latou faailoa mai o lona ma’i o se ituaiga o kanesa [neuroblastoma]. Ona sa na o le lua vaiaso o lona matua ma sa telē le vaega o le (kanesa), o lea sa leai ai se faamoemoe i le tulaga e oo i ai le ma’i.
I le faatumulia ai i le faatuatua i le gafatia e Keriso ona faamalolo o ia, sa ou tuuina atu ai ia te ia se faamanuiaga faaleperisitua ae ma te lei o atu i le falemai o tamaiti. I le taimi o lena aafiaga, e leai ni upu na oo mai i lo’u mafaufau. Na leai se mea. O le saili ai ia maua soo se upu e mafai, na pau lava le fasifuaitau e mafai ona ou fai atu ai o le, “O loo e i ai i aao o le Atua.”
I le lotovaivai ai i lena aafiaga, sa matou agai atu ai i le falemai o tamaiti lea o le a faia ai e le vaega o fomai se taotoga e aumai ai sina vaega o le fula, vaai po o le a le mamao na salalau atu ai, ma fuafua po o le a, pe afai e i ai se mea, e mafai ona latou faia mo le ma tama teine. A o lei faia le taotoga, sa ou toe tuuina atu i lo’u afafine se faamanuiaga faaleperisitua ma maua le aafiaga tonu lava e tasi e pei o le taimi muamua; sa na o upu “o loo e i ai i aao o le Atua” na mafai ona ou tautala ai.
Ina ua uma ona tuuina atu le ma tama teine i le fomai tipitipi, sa ma matuai fetagisi ma lo’u toalua. Ina ua le mafai e o ma’ua tino ona toe maua ni loimata, sa ou saofai ma le le fiafia. Sa amata ona ou mafaufau pe sa lei tuuina mai le vavega agaalofa sa ma’ua sailia ona sa le lava lo’u faatuatua po o le agavaa. Aisea na faatino ai e Keriso le tele o galuega ofoofogia o le agaalofa mo isi ae o le a le faia lava mo i ma’ua?
Sa uunaia a’u e faitau le tala ia Lasalo o loo maua i le Ioane 11. O le fegalegaleaiga i le va o Keriso ma Mareta na tumatila mai ia te a’u. Sa pei sa faamoemoe Mareta mo le mea lava lea e tasi sa ou faamoemoe i ai, sa lei tuai tele mo lo’u afafine ona faamaloloina faavavega. I le tali atu i le augani a Mareta, sa fetalai atu Iesu Keriso, “O a’u nei o le toetu ma le ola: o lē faatuatua mai ia te a’u, e ui lava ina oti, a e ola lava ia:
“O tagata ola uma o e faatuatua mai ia te a’u, e le oti lava e oo i le faavavau. Po ua e talitonu mai ea i lena mea?” (Ioane 11:25–26)
I le taimi lea, sa pei na fetalai mai Iesu Keriso ia te a’u. Sa ou lagonaina afai e i ai ni o’u mata e vaai, semanu e nofo Keriso i o’u autafa ma faatalitali mo la’u tali i Lana fesili. A o o’u mafaufau loloto i la’u tali, sa faatumulia lo’u agaga i le talitonuga maumaututu, ma sa ou tali atu, “Ioe, ou te talitonu i le Alo o le Atua ma mea uma ua Ia ofoina mai.”
Na oo mai se isi fesili i lo’u mafaufau: “O le a se mea ua mafai ona faia e Iesu Keriso mo tamaiti o e maliliu a o lei oo i tausaga e tali atu ai?”
Ma, i lo’u mafaufau, saou tali ai, “O tamaiti uma o e e maliliu ae lei oo atu i latou i tausaga e tali mai ai ua faaolaina i le malo selesitila o le lagi” (Mataupu Faavae ma Feagaiga 137:10).
“E te talitonu i lenei mea?” o le tali lea. Sa toe faatumulia lo’u agaga i le talitonuga maumaututu, ma sa ou tali atu, “Ioe.”
Sa oo mai le manatu i lo’u mafaufau, “Ona e malamalama lea o le a faatasi o ia ma le Atua ma e mafai pea ona avea e faapei o le Atua. O le a se isi mea e te manao ai mo ia? E mafai foi ona e olioli i lena olaga faatasi ma ia pe a e tumau faamaoni i feagaiga o le malumalu ua faaalia mai e Iesu Keriso.”
Sa ou faaiuina o le vavega silisili i lo’u olaga i taimi uma o le Togiola a Iesu Keriso. Sa leai se isi mea na sili atu ona ou manao i ai mo lo’u afafine nai lo lona maua o faamanuiaga uma ua mafai ona maua ona o Iesu Keriso e ala i Lana taulaga togiola ma sauniga paia o le malumalu. Sa tuuina mai ia i ma’ua se vavega agaalofa—o le vavega lea e sili ona taua.