E Tusa Lava Pe E Te Matua, E Lē Uma le Alofa

Saunia e Richard M. Romney

O Mekasini a le Ekalesia

I le valaauina e avea o se au peresitene o le Aualofa i le matutua o ō latou soifua, ua aumaia e nei tamaitai le poto masani ma le malamalama i a latou auaunaga.

Ata

o tamaitai matutua e toatolu ma ni tootoo savali

Ata na pu’eina e Richard M. Romney

“Atonu o i matou o le au peresitene aupito matutua o le Aualofa i le Ekalesia,” o le tala lea a Sharon Alexander. Faatoa atoa nei le 89 o ona tausaga. Ma o ona fesoasoani o Marlene Peterson ma Dorothy Arnold e 90 ma le 91, i le faasologa lena.

“O lea la, o le averesi o matou tausaga e 90,” o le tala lea a Dorothy, ma ata.

O lenei au peresitene o le Aualofa e auauna atu i se paranesi i se nofoaga e ola-tutoatasi ai i Ogden, Iutā, ISA. O le fale o se apitaga mo le toatele o tagata matutua o le Ekalesia, ma e tele ina vaaia le au peresitene o faalagolago atu i a latou tootoo savali a o latou o atu mai lea faitotoa i lea faitotoa, ma faafeiloai atu i tagata ma siaki ia mautinoa o manuia tagata uma.

I se tasi taimi, sa faia ai e tagata mai uarota i le lotoifale ia asiasiga faaleauaunaga. Ona lagona lea e le peresitene o le siteki le uuna’iga e faamalosiau atu i le au peresitene o le paranesi e fesili atu i le Alii po o ai tagata e mafai ona auauna atu ma po o a valaauga.

Ua Faamanuiaina Tele Ua le Mafai ai Ona Fai Atu e Leai

“Ina ua tuuina mai e le peresitene o le paranesi le valaauga ia te a’u e avea ma peresitene o le Aualofa,” o le tala lea a Sharon, “Sa ou mafaufau, ua tele nauā faamanuiaga ua ou maua e le tatau ai ona fai atu e leai.” Ona o lena, na ia mauaina ai musumusuga e uiga i le tagata e tatau ona avea ma ona fesoasoani. “Na oo muamua mai Marlene i lo’u mafaufau,” o lana tala lea. “Sa galulue faatasi i se tulaga faalesiteki, e saunia igoa mo galuega faalemalumalu. Sa ou iloa e le’i leva ona maliu lana tane, ma e ui lava sa tauivi o ia ma lena mea, ae sa ou iloaina sa faamaoni o ia.”

Ina ua maea se sauniga faamanatuga, sa tilotilo solo Sharon i le potu, ma saili musumusuga. “Na ou vaai ia Dorothy. Sa ataata mai o ia ia te a’u, ma sa ou iloa o ia o le isi fesoasoani. Sa taialaina a’u e le Alii ia i la’ua uma, ma Na te le’i faia se mea sesē i le filifilia o i la’ua.”

E Pei o se Aiga Toatele

Fai mai foi Sharon e mafai ona ia iloa le aogā o le i ai o tagata mai le apitaga e auauna atu ai i isi i le apitaga. “Ua tatou latalata atu i le tulaga,” o lana tala lea. “Matou te malamalama o nisi taimi matou te lē atoatoa ai, o nisi taimi e galo ia i matou le tele o mea, ma o nisi taimi e lē o lelei ai le faalogo. Ma e matou te iloa foi ona taliē e uiga i faafitauli matou te feagai faatasi ai.”

“O tagata o loo nonofo iinei ua pei lava o se aiga toatele,” o le tala lea a Marlene. “Matou te aai faatasi, o lea e matou te feiloai ai e faatolu i le aso. O nisi taimi matou te faatasitasi ai foi i gaoioiga. O lea ou te manatu ai sa musuia le peresitene o le siteki ina ua ia lagonaina sa i ai ni tagata iinei e mafai ona auauna atu le tasi i le isi.”

“Matou te iloa le mea o loo tupu mai lea aso i lea aso. Matou te iloa pe a manaomia e se tasi se fesoasoani pe o ma’i foi se tasi,” o le tala lea a Dorothy.

E faaopoopo atu i le auaunaga ma le fesoasoani atu i isi e auauna atu, e faatulaga e uso o le au peresitene ia aoaoga a le Aualofa. Latou te fautuaina tagata e ono valaauina e aoao atu, ma latou te fetuuna’ia tofitofiga ma faatulagaga e tusa ai ma manaoga o faiaoga taitoatasi.

Manatua, e Alofa le Faaola ia te Oe

“Ae o la matou galuega autu o le faamanatu atu lea i isi tagata e alofa le Alii ia i latou,” o le tala lea a Marlene. “Ma a o matou faia lena mea, matou te lagonaina foi Lona alofa.”

“E tofu uma lava i tatou ma tauiviga,” o le tala lea a Sharon. “O loo i ai o’u faafitauli i le taimi nei e le’i i ai i le lima masina talu ai. Ae a ou lagona le faanoanoa mo a’u lava ia, ou te mafaufau, ‘Ei, e le ma faatausalia nei mea i le tulaga na oo i ai le Faaola.’ Ua tatou i ai iinei e alualu i luma ma tuputupu a’e. Ma e tusa lava pe matutua tele, afai e te faatagaina lou poto masani e aoao oe, e mafai ona e aoao pea e faavavau.”

Ona ua tofu i latou ma sē e pele ua maliu, ua tele foi mea ua aoaoina e sui o le au peresitene e uiga i le agaalofa. Latou te iloa le ala e fesoasoani ai ia i latou o ē manaomia le faamafanafanaga. Mo se faataitaiga, i totonu o le tasi le tausaga na maliliu ai le toafa o tagata o le aiga o Marlene ma se uo mamae.

“Ona sa matou feagai ma ni mea faigata,” na ia fai mai ai, “e mafai foi ona matou fesoasoani i isi ia manumalo mai foi i ni mea faigata. Afai o loo e tauivi ma se mea, ia faagalo oe lava ae auauna atu i isi. O le mea lena na fesoasoani lenei valaauga ia te a’u e fai.”

E aumaia e uso o le au peresitene se oa o le poto masani ma le malamalama i o latou valaauga. Sa latou nonofo ma galulue i le tele o nofoaga—Kalefonia, Ohaio, Wyoming, ma Iutā. Sa latou auauna atu i le malumalu, i valaauga o uarota ma siteki, i le Peraimeri, Tamaitai Talavou, ma auaunaga alofa. Ae e le’i umia lava e Dorothy se valaauga i le Aualofa, seia oo mai i le taimi nei.

“O le a le anavatau a le Aualofa?” o lana tala lea. “E Lē Uma Le Alofa” E moni lena mea pe a e talavou, ae e tutusa lava le moni pe a ua e matua. I le avea ai ma se au peresitene, ua matou aoaoina lena mea i aso uma.”

“Ou te manatu ua matou galulue lelei faatasi,” o le tala lea a Sharon, ma faaivi le mata, “mo se au peresitene e averesi i le 90 tausaga le matutua.”