O La’u Faamanatu o le ’Olo o le Logo

Saunia e David Payne, Maryland, ISA

Pe ana ou tali atu i le uuna’iga, semanu e tele atu se taimi ma te aoao atu ai ia Giuseppe le talalelei.

I se tasi aso o sauniuniga, sa ma asiasi atu ai ma la’u soa faifeautalai i se falesa tele i Parma, Italia. A o o’u maofa i atavali matagofie iina, sa ou mātauina ai se monike o faitau tusi latalata ane. Sa ou maua se uuna’iga e talanoa atu ia te ia e uiga i le Tusi a Mamona, ae sa ou fefe.

O le a faapefea ona tali mai se monike Katoliko i se faifeautalai o loo talai i totonu o se falesa tele? Sa toe oo mai le uuna’iga, ae sa ou toe teenaina foi.

I ni nai vaiaso mulimuli ane, na ta’u mai ai e isi faifeautalai e toalua i lo matou fale ia i ma’ua sa la asiasi atu i se faifeau e igoa ia Giuseppe a o la talai i le alatele. Ina ua uma ona la aoaoina o ia i se lesona, sa ia taliaina se kopi o le Tusi a Mamona.

Ina ua feiloai faifeautalai ma Giuseppe i se vaiaso mulimuli ane, ua uma ona ia faitauina le tele o le tusi. Sa matua’i fiafia lava o ia i ai.

A o le’i toe feiloai faifeautalai ma Giuseppe, sa siitia ese atu la’u soa, o lea sa ou auai faatasi ai ma le la soa. Ina ua matou o e aoao Giuseppe i le falesa, sa le’i faate’ia a’u i le vaai atu o le monike lava lea sa uuna’ia a’u e talanoa i ai muamua.

Sa ta’u mai e Giuseppe ia i matou sa ia faitauina le tusi a Alema, lea na ia faatusaina i le Aposetolo o Paulo. Sa tonu ia i matou e aoao o ia i le lesona lona lua, lea na faaiu i se valaaulia ina ia papatisoina. I le faaiuga o la matou lesona, a o le’i mafai ona matou valaaulia Giuseppe e mulimuli i le faataitaiga a Iesu Keriso e ala i le papatisoina, sa amata ona tatagi logo o le falesa, ma faate’ia ai i matou.

Sa galo ia Giuseppe le taimi ma ia fai mai e tatau ona ia auai atu i isi monike mo tatalo o le aoauli. Ona ia faatoese mai lea, ma fai mai o le a le avanoa o ia i le lumanai ona o le a auai atu o ia i se gaoioiga faamonike. O le a sosoo ai ma lona faauuga o se ositaulaga.

Sa faate’ia i matou i le toe vave mou atu o lena avanoa tāua. Pe ana ou tali atu i la’u uuna’iga muamua, semanu e tele atu lo matou taimi e aoao ai Giuseppe ma semanu na te maua se taimi e faauma ai le faitauina o le Tusi a Mamona. E tusa ai ma lo’u iloa, e le’i toe aoaoina lava o ia e faifeautalai.

Ina ua mavae lena aafiaga, o le leo o logo i ’olo-uati ua faamanatu mai ai ia te a’u le tāua ma le puupuu o lo tatou taimi. Mo le vaega o totoe o la’u misiona, o taimi uma lava ou te faalogoina ai le tatagi o se logo o le ‘olo, e faaosofia lava a’u e talanoa atu i soo se tasi e mafai ona ou talanoa i ai e uiga i le talalelei. O le asō, o loo o’u taumafai pea e mulimuli i uuna’iga mai le Agaga.