O La’u Vaaiga mai Lugā

Saunia e Milla Ray Acevedo Carrasco, Marlborough, Niu Sila

Sa toeitiiti lava a ou lafoa’ia le mea tonu lava lea sa ou manaomia e ausia ai la’u sini.

Ata

eria o le Tumutumu [o le Mauga] o Roy

Ata pu’e o le eria o le Tumutumu [o le Mauga] o Roy na pu’eina e le tusitala

Talu ai nei, sa ou alu ai i se savaliga sopo lauiloa i le Tumutumu [o le Mauga] o Roy i atumauga matagofie o le Motu i Saute o Niu Sila. Ona sa tele ni itula na alu ai le savaliga sopo, o lea sa ou ave ai na o mea sa ou manaomia: o ni nai meaai māmā ma le tele o vai.

Ina ua ou amata, sa lagona lava le mamafa o la’u atofaafafa. I le afa itula o la’u savaliga sopo, sa ou lagonaina ai le mamafa o la’u ato i o’u tau’au ma le tua. Mo sina taimi, sa ou mafaufau ai e aveese nisi o a’u vai. Ae o le taimi lava lena, sa ou iloa ai o le a ou manaomiaina.

I le itula ma le afa ae ou te le’i taunuu i le tumutumu o le mauga, sa oo ina tifatō le ala ma ufitia i le kiona. Sa amata ona ou mafaufau e lē mafai ona ou taunuu i le tumutumu, ae o la’u sini na faaosofia ai a’u e faaauau pea.

Ina ua i’u ina ou taunuu i le tumutumu, sa lagona le māmā o la’u atofaafafa. E oo ane i le taimi lena ua ou ‘aia a’u meaai ma inu le tele o a’u vai. I le malolo ma le talisapaia o le vaaiga matagofie mai luga, sa ou mafaufau ai i la’u malaga—i le tumutumu mauga ma i le olaga.

Mo le tele o itula, sa ou savali ai agai i luga, fafagaina ma le lava o vai i lo’u tino ina ia ou maua le malosi e faaauau ai pea. O le mea na foliga mai o se avega i le amataga—vai faaola—na faamanuiaina ai a’u e ausia la’u sini.

Tatou te oo uma lava i tulaga e lugā ma lalō, ae e fesoasoani mai le Agaga Paia ia i tatou e faia faaiuga lelei. Sa toetoe lava a o’u tuua le silia ma le afa lita o vai i luga o le alasopo, ae sa ou lagona le uuna’iga e ave pea.

Faatasi ai ma mata loimatā, sa ou faafetai ai i lo’u Tama Faalelagi mo nei manatunatuga. O le i ai i mauga na ufitia i le kiona i lena aso na musuia ai a’u e toe iloilo lo’u olaga, o a’u faaiuga, o a’u sini, ma la’u ato faafafa patino.

A o le’i oo i la’u savaliga sopo, sa tumu a’u i le lē mautonu e uiga i lo’u olaga ma la’u galuega i se atunuu ese. Ae o lenei ua ou lagona o le a lelei mea uma. Ou te iloa o le a tausia a’u e le Alii.

I le faatasi ai ma le Agaga, ou te iloa e mafai ona ou faia ni faaiuga sa’o lea o le a siitia ai a’u faalemafaufau, faaletino, ma le faaleagaga. Ma pe a ou lagona le mamafatū, e mafai ona ou liliu atu i lo tatou Faaola, le puna o le “vaiola” (Ioane 4:10). Ou te iloa o le a Ia fafagaina a’u ma faamāmāina la’u avega (tagai Mataio 11:28–30).