O Mataupu Faavae o le Auaunaga

Auaunaga ma le Faamoemoe ma le Faatuatua

A o tatou tausia a tatou feagaiga ma le faatuatua, e mafai ona tatou fesoasoani e taitai atu isi i le Punavai o le faamoemoe.

o le fafine o loo pa’i atu i le ofu o Iesu

E mafai ona avea atili i tatou e pei o le Faaola a o tatou aoao e auauna atu e pei ona sa Ia faia. O le faaaogaina o faataitaiga a Keriso ma Ona soo i le Feagaiga Fou, o le a tatou aoao ai i le auala e atiina a’e ai uiga faa-Keriso ia e mafai ona fesoasoani ia i tatou i a tatou taumafaiga e auauna atu e pei o le Faaola.

O Se Faataitaiga o le Faamoemoe ma le Faatuatua

I le Evagelia a Mareko, tatou te faitau ai i se tala ootia e uiga i “le tasi fafine foi, ua ia te ia le puna toto i tausaga e sefulu ma le lua.” Ua tatou iloa “e tele foi mea na ia tiga ai i fomai e toatele, ua uma atu ai foi ana oloa, a e le’i aogā lava ia te ia, a e peitai ua atili ai lona ma’i” (Mareko 5:25–26).

O le sefululua tausaga o se taimi umi lea e puapuagatia ai. O mea uma na faaalu ai. Ma sa atili ai ona ma’i o ia. Afai e i ai se tasi e i ai se aiā tatau e lagona ai le leai o se faamoemoe, o lenei fafine.

Ae, “ua faalogo o ia ia Iesu, ona alu ane lea [o ia] i ona tua, i totonu lava o le motu o tagata, ua pa’i ane i lona ofu,” auā sa ia talitonu, “Afai ou te pa’i atu tau lava o ona ofu, ona ou malolo ai lea.”

Ua ta’u mai e Mareko ona o lona faatuatua, sa “utu ai loa lea o lona puna toto; ona iloa lea e ia lona tino ua faamaloloina i lona ma’i tiga” (Mareko 5:27–29).

O le faamoemoe ma le faatuatua o le fafine ia Iesu na taliina i se faamanuiaga. “A ua fetalai atu ia te ia, Lo’u afafine e, ua e ola i lou faatuatua; ina alu ia oe ma le manuia, ma ia e malolo i lou ma’i tiga” (Mareko 5:34).

I soo se luitau, e tusa lava po o le a le tele po o le umi o le taimi, e matua’i manaomia ai lava le faamoemoe. O le fefe ma le faanoanoa e mafai ona taofia ai i tatou. Ae o le faamoemoe ma le faatuatua ia Iesu Keriso e valaaulia ai Lona mana ma faamanuiaga i o tatou olaga.

Faataitaia o le Faamoemoe ma le Faatuatua i le Auaunaga

I le avea ai ma uso ma tuafafine o auaunaga, o le a manaomia ona tatou valaau atu i lena lava faamoemoe ma le faatuatua. O le auaunaga e mafai ona tauia ma luitauina. Pe afai o se tasi tatou te mananao e auauna atu i ai ae le o manao i ai, e mafai ona faigofie ona leai se faamoemoe. Atonu o loo e feagai nei ma lenei tulaga ma se tagata o le aiga, se uo, po o se tasi ua tofia oe i le taimi nei e fesoasoani i ai. Atonu, e pei o le fafine puna toto, ua na o le Alii lava e silafia le tele o le taimi ma taumafaiga na e faaaluina e taumafai ai e su’e se mea e fesoasoani mai. Ae faapei o lena fafine, afai o le a tatou maua le faamoemoe e faaauau pea ona aapa atu i le faatuatua, e mafai e le mana o le Faaola ona faia se eseesega.

O nisi taimi o le luitau o le auauna atu ia i latou o loo tauivi ma i latou lava ia lagona le lava o le faamoemoe e faatino ai le faatuatua. O loo i ai nisi, e pei o le fafine i le Mareko, e ono feagai ma gasegase faaumiumi, faaletonu tautupe, pe soo se tofotofoga e foliga mai e lofituina. O le iloaina e lē o tuua na o i latou i a latou tauiviga e mafai ona avea ma se punavai mamana o le faamoemoe. E mafai ona tatou fesoasoani ia i latou ia maua lenei faamoemoe a o tatou faaalia lo tatou naunau e tauave a latou avega, faanoanoa faatasi ma i latou, faamafanafana i latou, ma tutū o ni molimau a le Atua (tagai Mosaea 18:9–10).¹

tamaitai e toalua o loo faitauina se mekasini ma se teineitiiti

Atiina A’e o le Faamoemoe ma le Faatuatua

E faapefea ona tatou atiina a’e le uiga faa-Keriso o le faamoemoe ma le faatuatua? O nisi nei o manatu:

1. Na aoao mai Elder Dieter F. Uchtdorf o le Korama a Aposetolo e Toasefululua e faapea, o le faamoemoe o le faatuatuaina lea o le a faataunuu e Iesu Keriso Ana folafolaga ia te oe.² Ona “o le faamoemoe o se meaalofa a le Agaga [tagai Moronae 8:26],”³ o se mea e mafai ona tatou tatalo atu ai (tagai Mataupu Faavae ma Feagaiga 46:7–9).

2. Na aoao mai Peresitene Russell M. Nelson o le faateleina o le faatuatua e manaomia ai le galue. Sa ia faasoa mai le auala e mafai ai ona faateleina lo tatou faatuatua e ala i le suesue, filifili e talitonu, faatino i le faatuatua, tagofia ma le agavaa o sauniga paia, ma ole atu i le Tama Faalelagi mo se fesoasoani.⁴

Suesue Ia Iloa Atili

Aoao atili e uiga i le faamoemoe mai le saunoaga a Elder Uchtdorf “O Le Mana e Lē I’u o le Faamoemoe” (Liahona, Nov. 2008, 21–24).

Aoao atili e uiga i le sootaga i le va o le faatuatua ma le faamoemoe mai ia Elder David A. Bednar o le Korama a Aposetolo e Toasefululua (“Saili e Aoao e Ala i le Faatuatua,” Liahona, Sete. 2007, 16–24).

Faamatalaga

1. Tagai Jeffrey R. Holland, “Tauaveina o Avega a le Tasi ma le Isi,” Liahona, Iuni 2018, 26-28.

2. Tagai Dieter F. Uchtdorf, “O Le Mana e Lē I’u o le Faamoemoe,” Liahona, Nov. 2008, 22.

3. Dieter F. Uchtdorf, “O Le Mana e Lē I’u o le Faamoemoe,” 21.

4. Tagai Russell M. Nelson, “Ua Toetu Keriso; O Le Faatuatua ia te Ia O Le A Aveesea ai Mauga,” Liahona, Me 2021, 103.