2023
Faalagolago i le Mana ma Perofeta a le Alii
Mati 2023

“Faalagolago i le Mana ma Perofeta a le Alii,” Liahona, Mat. 2023.

Mo Mātua

Faalagolago i le Mana ma Perofeta a le Alii

Ata
O loo faafeiloai e Peresitene Nelson ma Sister Nelson ni tamaiti se toalua

Ata na pu’eina e Ravell Call, Deseret News

Mātua Pēlē,

I lo tatou lalolagi ua faateteleina le vevesi, e mafai ona faigofie ona lagona le fefe ma le lē mautonu. Ae a tatou liliu atu ia Iesu Keriso mo le faamafanafanaga, e mafai ona Ia aumaia ia i tatou le filemu i afā o le olaga. Faitau tusiga o i lenei lomiga e iloa ai le auala e fesoasoani ai le Faaola ia te oe e faatautaia ou luitau.

Talanoaga o le Talalelei

Ua Saunia Lelei e le Faaola le Filemu i Taimi Faigata

Faatasi ai ma lou aiga, faitau le tusiga a Elder Uchtdorf o loo i le itulau e 4 e uiga i le ala e mafai ai e le faalagolago i le mana gafatia o Keriso ona maua ai le filemu i tulaga faigata. Talanoaina faatasi nisi o auala e ofo atu ai e Iesu le toomaga. O le a se mea e mafai ona e faia e valaaulia ai le mana i lou olaga?

E Faapefea Ona Faamanuiaina e le Perisitua Lo Tatou Aiga?

Faitau le tusiga o loo i le itulau e 22 e uiga i faamanuiaga faaleperisitua. Valaaulia tagata o le aiga e faasoa mai ni taimi na latou maua ai se faamanuiaga faaleperisitua. O a ni o latou lagona? Na faapefea ona fesoasoani le faamanuiaga ia i latou? O i ai se faamanuiaga e mafai ona fesoasoani i se tagata o le aiga i le taimi nei?

E Faaaoga e le Alii Lana Perofeta e Fesoasoani ia i Tatou e Atiina a’e le Lototele

I le tusiga o loo i le itulau e 30, o loo talanoa ai Elder Sikahema e uiga i le auala na fesoasoani ai le mulimuli i aoaoga a le perofeta ia te ia e tu mausali ai i ona talitonuga ma tulaga faatonuina i le taimi o lana galuega o se tagata taalo lakapi faapolofesa Amerika ma i lona olaga atoa. A uma ona faitau lenei tusiga, e mafai ona e tuu atu i tagata taitoatasi o lou aiga e faasoa mai se taimi na fesoasoani ai le mulimuli i le perofeta ia i latou ia maua le lototele.

Mea Mālie Faaleaiga o leSau, Mulimuli Mai ia te A’u

Tuputupu A’e, Tuputupu A’e, i Aso Uma

I le avea ai ma tagata o le Ekalesia toefuataiina a Iesu Keriso, ua ia i tatou le tiutetauave e fesoasoani i le tuputupu a’e o le malo o le Atua i le lalolagi. O loo faapea mai leMataio 13:31–32 :

“E tusa le malo o le lagi ma le fua o le sinapi, na ave e le tasi tagata, ma toto i lona fanua:

“E itiiti lava ia i fua o laau uma; pe a uma ona tupu, e sili ia i laau afu, e iu ina fai ma laau tele.”

  1. Nonofo i li’o ma faapuupuu ia pei o se tamai fatu o le sinapi.

  2. Fai atu i tagata uma e auauai e ta’u mai se gaoioiga e mafai ona latou faia i aso taitasi e fesoasoani ai i le Ekalesia ia tuputupu a’e (tuuina atu a latou molimau, faasoa atu se mau i luga o ala o faasalalauga faaagafesootai, faasoa atu se upumoni o le talalelei i se uo, ma isi).

  3. O taimi uma lava e ta’ua ai e se tasi se gaoioiga e fesoasoani i le Ekalesia ia tuputupu a’e, e saofai sa’o ai tagata uma ona amata lea ona tu i luga seia oo ina latou tutū maualuga.

  4. Talanoa ma lou aiga pe aisea e tāua ai mo tagata taitoatasi ona faia lana vaega e saofagā ai i le tuputupu a’e o le Ekalesia.

Lolomi