“Filemu e Fetaiai ai ma Afā o le Olaga,” Mo le Malosi o le Autalavou, Mat. 2023.
Filemu e Fetaiai ai ma Afā o le Olaga
E fetalai mai le Alii o Iesu Keriso ia te oe i taimi o afā i lou olaga: “Faalologo ia, ina malū ia.”
O Elder Uchtdorf ma tagata talavou i le faasilasilaga a le BYU–Pathway Worldwide i le aso 7 Fepuari, 2017.
I le mavae ai o se aso atoa o le aoao atu i tafatafa o le sami, sa fautuaina e le Alii o Iesu Keriso Ona soo latou te sopoia le isi itu o le Sami o Kalilaia. Ina ua latou o ese atu, sa maua e Iesu se nofoaga e malolo ai i luga o le vaa ma tofa ai.
E le‘i leva ae pogisa le lagi, “ona to mai lea o le afā, o le matagi tele lava, ona fati mai ai lea o peau i totonu o le vaa, ua tumu ai” (tagai Mareko 4:37).
O nisi o soo o Iesu o ni faifaiva atamamai ma sa iloa le auala e faatautaia ai se vaa. Ae sa malosi le afā, ma na amata ona latou atuatuvale. Sa foliga mai ua lata ina goto le vaa.
I na mea uma, sa tofa pea Iesu.
Tatou te lē iloa po o le a le umi na tauivi ai le au soo i le afā, ae i le iuga sa lē mafai ona latou toe faatali. Sa latou fagua Iesu ma alaga, “Le Aoao e, e te lē manatu mai ea ia te i matou a fano?” (Mareko 4:38).
Ata na tusia e Adam Howling
O Afā o le Olaga
Tatou te feagai uma lava ma afā faafuasei i le olaga. Atonu e te vaai i faafitauli i le salafa o le lalolagi po o ou lava tulaga ma lagona le faanoanoa, lotovaivai, ma le lē fiafia. Atonu e nutimomoia lou loto mo oe lava po o se tasi e te alofa i ai. Atonu e te popole pe fefe ma lagona ua tuua oe e le faamoemoe e faavavau.
I nei taimi, atonu e te alaga atu e pei o soo o Iesu, “Le Aoao e, e te lē manatu mai ea ia te a’u a fano?”
A o o’u pei o lou matua, o se tasi o viiga e sili ona ou fiafia i ai o le “Matai e, Ua Sou le Vasa.”1 Sa mafai ona ou vaai faalemafaufau ia te a‘u lava i totonu o le vaa pe a “ua tele [lava] le afā!” O le vaega tāua ma sili ona matagofie o le viiga o loo mulimuli mai: “Matagi ma galu, malū ia oe: Filemu, filemu.” Ona oo mai lea o le sāvali tāua: “Leai o se sami na te malua, le vaa e tofa ai o Ia, le Pule o lalo nei ma lugā.”
Ina ua uma ona alalaga atu Ona soo mo se fesoasoani, ona “tulai lea o ia, ma na vavao atu i le matagi, ua fetalai atu foi i le vai, Faalologo ia, ina malū ia. Ona mate lea o le matagi, i le ua matuā malū” (Mareko 4:39).
Afai o le a e talia Iesu Keriso, “Le Alii o le Filemu” (Isaia 9:6), i totonu o lou vaa, e mafai ona e maua le filemu i le lotolotoi o afā faigata ma taufaafefe o i totonu ia te oe ma siomia ai oe.
O upu lava ia na fetalai atu ai Iesu i le Sami o Kalilaia i lena po matagi ua leva, ua Ia fetalai atu ai ia te oe i taimi o afā i lou olaga: “Faalologo ia, ina malū ia.”
Faalagolago i Lona Mana Toafimalie
Mata e mafai ona e vaai faalemafaufau i lagona o le au soo i le taimi na latou vaai ai i le matagi, timuga, ma le sami o usiusitai i le poloaiga a lo latou Matai? Pau le mea na latou fai mai ai o le, “Po o ai lava lenei, ina ua faalogo lava le matagi ma le vai ia te ia?” (Mareko 4:41).
E lē pei Iesu Keriso o soo se tasi na savalia lenei lalolagi. Na afio mai o Ia e laveai i tatou. I le Faatoaga o Ketesemane, sa Ia totogia ai le tau mo a tatou agasala uma. Sa Ia onosaia foi o tatou tiga ma faanoanoaga uma. O lenei mafatiaga tele ma lē i‘u na afua ai ona tafe toto mai o Ia mai pu afu uma (tagai Luka 22:44; Mataupu Faavae ma Feagaiga 19:18).
O le mea na faia e le Alii mai le alofa atoatoa e lē mafai ona ou malamalama i ai. Ae ou te iloa sa Ia faia mo a‘u, mo oe, ma mo tagata uma o e na soifua pe o le a soifua mai. Na Ia tuuina mai mea uma ina ia mafai ona tatou maua mea uma.
E leai se tasi o le a oo i mea na puapuagatia ai Iesu, ae o le a tatou feagai ma o tatou lava afā pogisa ma tiga. Afai e te sii a‘e lou loto i le Alii, o le a Ia faatoafilemuina ou afā, aua ua Ia oo i na mea uma. Sa puapuagatia o Ia ma le lē manatu faapito mo oe ma ua i ai le mana e faamalosia ai, faamalosi‘au, ma faamanuia ai oe.
U Ia folafola mai, “Ou te tuuina atu ia te outou le manuia, o lo’u manuia ou te avatu ai ia te outou: ou te lē avatu ia te outou faapei ona avatu e le lalolagi. Aua le atuatuvale o outou loto, aua foi tou te matatau” (Ioane 14:27).
Auala i le Filemu
Ua tuuina mai e le Alii o Iesu Keriso ia te oe auala e lagona ai Lona filemu. Na Ia fetalai, “Aoao mai ia te a’u, ma faalogo mai i a’u upu; savali i le agamalu o lo’u Agaga, ma o le a e maua ai le filemu ia te a’u” (Mataupu Faavae ma Feagaiga 19:23).
Aoao ia te Ia e ala i le suesueina o Lona soifuaga ma aoaoga i tusitusiga paia. Ia sii a‘e lou agaga i le tatalo. “Tutū … i nofoaga paia,” e aofia ai le malumalu (Mataupu Faavae ma Feagaiga 87:8; tagai foi i le 45:32).
Faalogo i Ana upu mai perofeta soifua. Mulimuli i le taitaiga a le Agaga Paia. Faaaoga le meaalofa paia o le salamo. O mai i Lana Ekalesia ina ia faaaumeaina, aoaoina, ma tausia i le afioga lelei a le Atua.
Savali i le agamalu o Lona Agaga e ala i le faia o lou fale o se nofoaga e mafai ona lagonaina ai Lona Agaga. Fesoasoani i isi ma auauna atu ma le olioli ia te Ia. Manatua, “E i ai le filemu i le faia o le mea tonu.”2 Taumafai e tumau faamaoni ma ia avea ma se “[soo] fifilemu o Keriso” (Moronae 7:3).
Afai o le a e aoao, faalogo, ma savavali faatasi ma le Alii, ona oo mai lea o Lana folafolaga sili: O le a e maua Lona filemu.
Faatuatua ia Filemu
Faatasi ai ma le faatuatua i le Alii o Iesu Keriso, e mafai ona e “filemu” pe a oo mai afā o le olaga i ou luga. Atonu e le vave oo mai le filemu e pei ona sa i ai le au soo i luga o le Sami o Kalilaia, ae o le a faamalosia oe e le Alii ia sao mai afa e te feagai.
La’u uo pele, ou te molimau atu o loo soifua Iesu Keriso.
E alofa o Ia ia te oe.
Na te silafia oe.
E malamalama o Ia ia te oe.
O le a Ia lē tuua oe e aunoa ma se faamafanafanaga i taimi e te moomia ai.
O le filemu moni e oo mai ma ala mai ia ta te Ia. O Lona filemu e mo tagata uma o le a liliu atu ia te Ia.