Fesili ma Tali

“E faapefea ona ou fesoasoani i a‘u uo e lē toaaga mai i le Lotu e faamalosia a latou molimau?”

“E lē faigofie mo tagata fou faato‘ā liliu mai, o uo ua toe foi mai, ma i latou e ese ituaiga olaga, ona vave ona maunofo lelei i totonu. E silafia e le Alii ia luitau latou te fetaiai, ma o loo Ia saili … ni volenitia naunautai e avea ma agelu i olaga o isi.”

Elder Carlos A. Godoy o le Fitugafulu, konafesi aoao, Oke. 2020 (Ensign po o le Liahona, Nov 2020, 87).

Ia Avea ma Faamanuiaga i Isi

“Pe a ou taumafai e fesoasoani i se uo e faamalosia lana molimau patino, ou te taumafai e avea o se faamanuiaga ma se lagolago i lona olaga. Ou te taumafai e avea o se faataitaiga ma faaali atu ia te ia e mafai e le talalelei a Keriso ona faamalosia ana faauoga ma sootaga faaleaiga pe afai e taumafai o ia ia usiusitai ma amiotonu. Ou te fiafia e fesoasoani ia te ia e lagona le alofaina.”

Selina O., 19, Polivia

Valaaulia i Taimi Uma

“E mafai ona e aoaoina a‘u uo e uiga i le alofa ma le alofa mutimutivale o Iesu Keriso ma le auala e mafai ona Ia fesoasoani ai ia i latou. Valaaulia i latou e o i le lotu ma auai faatasi ma oe i vasega a le autalavou. E mafai ona fesoasoani lenei mea ia i latou e atina‘e ai se molimau malosi ia Iesu Keriso.”

Shara R., 12, Kolomupia

Avea Muamua ma a Latou Uo

“Ou te taumafai i taimi uma ia faaaofia ma ia mautinoa ua iloa e a‘u uo o loo o‘u mafaufau ia i latou. Ou te iloa e mafai ona avea a‘u ma se malamalama mo i latou pe a ou faatumauina la matou faauoga ma le alofa. E mafai ona ou valaaulia a’u uo i gaoioiga a le Ekalesia, ae o a’u lava o la latou uo moni i taimi uma. O le a faamalosia e au uo a latou molimau a o latou vaai i lau faataitaiga alofa ma le lagolagosua faaleuo.”

Mia D., 19, Florida, ISA

O Le A Fesoasoani Keriso ia te Oe

“E mafai ona faigata le i ai o ni uo e lē toaaga mai, ae ou te fiafia e valaaulia a‘u uo i se gaoioiga mālie a le autalavou po o le lotu pe a ou tuuina atu se lauga. Afai latou te faaalia le fiafia, ou te tuuina atu ia i latou se Tusi a Mamona faatasi ma la’u molimau ma fuaiupu e tulaga ese ia te a‘u ua faailogaina. Manatua, o le a fesoasoani Keriso ia te oe i soo se tulaga.”

Elizabeth B., 15, Florida, ISA

Tau Lava o le Agalelei

“Sa ou fesili i lo’u faiaoga seminare i lenei fesili. Sa ia fai mai, ‘Tau lava o le agalelei, Jordan. Ua uma ona e faia le mea sa’o.’ I le taimi muamua, sa ou manatu, ‘E lē lava le tau o le agalelei.’ Ona ou mafaufau lea i la’u uo o lē sa manaomia la’u faauoga ma faataitaiga. Sa fesoasoani le Agaga ia te a‘u ia ou agalelei ma iloa le tala e fai atu. O lea la ua manao o ia e papatiso i se aso!”

Jordan S., 17, Iuta, ISA

O tali ua faamoemoe mo se fesoasoani ma se vaaiga, ae e lē o se faalauiloaga aloaia o aoaoga faavae o le Ekalesia.

O Le A Sou Manatu?

“E finau soo o’u matua. O le a se mea e mafai ona ou faia e taumafai ai e faatumauina le Agaga i lo matou aiga?”

Auina mai lau tali ma le ata ae le‘i oo i le aso 15 o Aperila, 2023.

Imeli mai ia i matou i le [e-mail]. Pe alu i le ftsoy.ChurchofJesusChrist.org ma kiliki le “Auina Atu Lau Galuega.” Saini e alu i totonu i lau Faitotoa a le Ekalesia ona filifili lea o le “Mo Le Malosi o le Autalavou” i lalo o le “Filifili le Mekasini.” Kiliki le “Faaopoopo le Faila” e filifili ai lau faila ma ata, ona kiliki lea o le “Auina Atu” e utaina ai ma auina mai ai ia i matou lau faila.

E ono sui ia tali mo le uumi po o le manino.