“Mataupu Faavae Aoao, Filifiliga Patino,” Mo le Malosi o le Autalavou, Mat. 2023.
Mataupu Faavae Aoao, Filifiliga Patino
E faapefea ona e faaaogaina mataupu faavae lautele i ni tulaga patino i lou olaga?
Ata na tusia e Josh Talbot
O upusii nei e tolu mai perofeta eseese e toatolu. Vaai pe mafai ona e iloaina se autu tutusa:
“E, ia outou atamamai; o le a se isi mea e mafai ona ou fai atu?”
“E lē mafai ona ou taʼu atu ia te outou mea uma e mafai ona outou faia ai le agasala.”
“Ou te aoao atu ia i latou ia mataupu faavae sa’o, ona latou pulea lea o i latou lava”
Aoaoga a Peresitene o le Ekalesia: Iosefa Samita [2007], 284.
E foliga mai e tuuina mai e perofeta ia i tatou ia mataupu faavae o le talalelei a le Alii ona tuu mai lea ia i tatou e ola ai. Latou te lē tuuina mai ia i tatou auiliiliga mulimuli uma. O lea la, e faapefea ona tatou aveina a latou aoaoga ma faaaoga?
E Faapefea Ona E Faaaogaina Aoaoga a Perofeta?
E tuuina mai e perofeta ia i tatou poloaiga mai le Alii. Latou te aoao mai foi ia i tatou mataupu faavae ma taiala e fesoasoani ia i tatou e faaaoga upumoni ma poloaiga e faavavau—mo se faataitaiga, i le taiala o le Mo le Malosi o le Autalavou .
Ae o tagata O Le Ekalesia a Iesu Keriso o le Au Paia o Aso e Gata Ai i nisi taimi e mafaufau e uiga i auiliiliga—o mea patino e tatau ona tatou faia ia sili atu ai ona tatou ola i mataupu faavae ma poloaiga o le talalelei. Mo se faataitaiga, atonu e mafaufau lelei tagata po o a ituaiga o ofu e faaalia ai le faaaloalo talafeagai mo o latou tino. Pe atonu foi latou te mafaufau po o le a tonu le mea e tatau ona latou faia i le aso Sapati e tausia ai ia paia.
O mataupu faavae aoao e mafai ona faaaoga i ni auala patino eseese e tagata eseese, ae e mafai ona tatou sailia le taitaiga a le Alii a o tatou taulimaina a tatou filifiliga taitoatasi ina ia mafai ona tatou latalata atili atu i le Atua.
O Se Mamanu e Fesoasoani
Sa faamatala e Russell M. Nelson i se tasi taimi le auala na ia taulimaina ai filifiliga o le tausia o le aso Sapati ia paia:
Sa ou iloa ai mai tusitusiga paia o la’u amio ma o’u uiga i le Sapati o le a avea ma se faailoga i le va o a’u ma lo’u Tama Faalelagi. Faatasi ai ma lena malamalamaaga, sa ou lē toe manaomia ni lisi o mea e faia ma mea e lē faia. Pe a manaomia ona ou faia se filifiliga pe o se gaoioiga talafeagai pe leai foi mo le Sapati, e na o lo’u fesili lava ia te a‘u, “O le a le faailoga ou te manao e avatu i le Atua?” O lena fesili e matuā ta’u manino mai ai lava a’u filifiliga e uiga i le aso Sapati” (Ape. 2015 konafesi aoao [Ensign po o le Liahona, Me 2015, 130]).
O le auala na taulimaina ai e Peresitene Nelson lenei fesili patino e mafai ona faaali mai ai ia i tatou se mamanu aoao mo le faia o filifiliga e uiga i poloaiga ma taiala. O se tasi lenei o auala e mafai ona e faamatalaina ai:
E mafai ona e mulimuli i lenei mamanu i soo se poloaiga po o se taiala—o le Upu o le Poto, ala o faasalalauga ma faafiafiaga, musika, mamā faalefeusuaiga, ma e oo lava i le sefuluai. E manaomia ai sina galuega, ae e tāua tele.
A o e suesue i nei mea, e mafai ona e faitau i mea o loo ta’u mai e tusitusiga paia ma perofeta o aso nei e uiga i ai, mafaufau loloto, ma tatalo i le Tama Faalelagi. Ona mafai lea e le Agaga Paia ona fesoasoani ia te oe ma musuia oe e fai filifiliga lelei.
Ae faapefea Filifiliga a Isi?
Mātau e le‘i ta’u maia e Peresitene Nelson ia i tatou po o a filifiliga patino sa ia faia e uiga i le aso Sapati. Sa Ia faaali mai ia i tatou le ala e mafai ai ona tatou faia a tatou lava filifiliga. Atonu e te faia le tele o filifiliga lava e tasi na ia faia. Ae o le manatu autu lava o le taumafai lea e faalatalata atili atu i le Tama Faalelagi ma Iesu Keriso e ala i a tatou filifiliga.
Afai e te mātauina se isi tagata i le Ekalesia e lē o faia mea uma i le ala tonu e te faia ai, e te lē tau popole i le faasa’oina o i latou. E pei ona sa saunoa Reyna I. Aburto, sa avea muamua ma Fesoasoani Lua i le Au Peresitene Aoao o le Aualofa, “Ia tatou mulimuli i le ala a le Faaola ma faateleina lo tatou agaalofa, faaitiitia o tatou uiga faamasino atu, ma tuu lo tatou suesue fua o olaga faaleagaga o isi” (Oke. 2019 konafesi aoao [Ensign po o le Liahona, Nov. 2019, 58]).
E mafai ona e taliaina mataupu faavae sa’o o loo aoao mai e perofeta. E mafai ona e faasino atu isi i le Faaola, Lona alofa, Lona agaalofa, ma Ana poloaiga. E mafai ona e faitau i le taiala o le Mo le Malosi o le Autalavou . E mafai ona e taumafai e ola i se olaga faamaoni o se soo o Iesu Keriso, avea ma se faataitaiga lelei, ma faasoa atu ou aafiaga faaleagaga.
Afai e te taulai atu i le alofa i le Atua ma alofa atu i isi, o le a taialaina oe e fai filifiliga o le a fesoasoani e faafiafia ai oe ma isi.