Ou Te Mafaia Mea Uma ia Keriso

Ua faasoa mai e le autalavou le ala na faamalosia ai e Keriso i latou e faia mea faigata (tagai Filipi 4:13).

Ua Silafia e le Faaola le Auala e Fesoasoani ai ia te A‘u i le Kanesa

Sa i ai lo’u olaga i se tulaga masani seia oo i le taumalulu o le 2020. Sa ou ma’i i le mea sa matou manatu o se siama, o lea sa faasolo ai lo’u inuina o ni fualaau sa faatonuina mai. Mulimuli ane, sa amata ona ou lagonaina le tiga o le ulu, lelavā, ma le vaivai. E le‘i leva ae ou ala a‘e pe tusa ma le 10 i le po ma le manatu ua oo i le taeao ma amata ona sauni mo le aoga.

Ina ua ta’u mai e lo’u uso ia te a’u o loo po pea, sa ou tamoe atu i le potu o o’u mātua ma le lē mautonu. Sa tago lo’u tinā i lo’u ulu, ma sa matuā maualuga le fiva. Sa matou o atu i le fomai i le aso na sosoo ai, lea sa faia ai nai suesuega.

O lena po na omai ai o’u mātua i lo’u potu, o loo fetagisi. Sa la fai mai ia te a‘u ua ou maua i le kanesa o le toto ma e tatau ona matou o i se falemai e maua ai nisi tali. Sa ou i ai i le potu mo faalavelave faafuasei i le po atoa ma amata ai a’u togafitiga o le kimo i ni nai aso mulimuli ane.

O le a faaauau pea o‘u togafitiga mo se isi tausaga pe lua, ae ua sili atu ona faigofie. Sa ou lagonaina sina malosi sili atu talu ai nei ma ua faamoemoe ia mafai ona ou toe alu i le aoga i se taimi vave. E ui i lea, e lē faigofie. E tele aafiaga o le kimo, e aofia ai se faafitauli i ponaivi e ta’ua o le avascular necrosisar lea e faigata ai ia te a‘u ona savali.

E ui lava i na mea uma—atonu ona o lena mea—ua ou matuā latalata ai lava i lo’u Tama Faalelagi. O lea la ua ou maua se malamalama loloto atu i le Togiola a Iesu Keriso. Sa masani ona ou mafaufau i Lana Togiola o se mea faato‘ā e manaomia pe a e faia se mea sesē. O se vaega lena, ae o le faalagolago i le Faaola o se mea foi na fesoasoani e faaitiitia ai o’u lagona o le tuuatoatasi.

Ua tauaveina e Iesu Keriso i Ona lava luga o tatou puapuaga uma ma agasala, o lona uiga ua Ia silafia tonu le ala e fesoasoani ai ia te a‘u a o o‘u feagai ma le lukimia. O le feagai ai ma soo se tofotofoga e mafai ona lagona ai le matua‘i faaesea, ae e ala i le Togiola a Keriso, e mafai ai ona tatou maua le mafanafana i le iloaina e malamalama moni lava o Ia i mea o loo tatou feagai ai.

Ruby H., Iuta, ISA