“Iesu Keriso: Filemu i Afā,” Mo le Malosi o le Autalavou, Mat. 2023.
Sau, Mulimuli Mai ia te A’u
Iesu Keriso: Filemu i Afā
O nisi aso, atonu e te lagonaina le felafoa’iina e afā o le olaga. Ae ua ia Iesu Keriso le mana e aumai ai ia te oe le filemu lea o le a e lē maua i se isi lava mea.
Faalologo Ia, Ina Malū Ia, saunia e Yong Sung Kim
I le afa o lo’u tausaga sinia i le aoga maualuga, sa matua‘i faatei’a ai a’u. Sa valaauina o‘u mātua e pulefaamalumalu i le Misiona a Iurukuei Montevideo, o lona uiga o le a latou siitia atu i le isi itu o le lalolagi faatasi ma nai o‘u tei laiti e toafa. Sa ou popole i le faauu ai i le aoga maualuga, ae o lenei o le a ou auai na o a‘u i le kolisi, a o i ai lo‘u aiga i se konetineta ese. Sa ou lē mautonu.
O la’u suiga mai le aoga maualuga i le kolisi sa matua‘i faigata lava mo a’u. A o siomia a‘u e uo agalelei ma le faitau afe o tamaiti aoga, ou te le‘i lagonaina lava se tuuatoatasi maoae pei o lenei. O le mamafatu o le aoga sa lofituina. Sa ou lē iloa po o le a le mea sa ou manao e suesue ma sa ou iloa le luitauina i vasega. Sa ou tauivi foi ma se mafutaga taufaasesē faalelagona, lea sa telē se aafiaga i lo’u soifua maloloina faalemafaufau. O lo‘u fefe i le lumanai na lofituina ai a‘u.
E le‘i umi ae avea o‘u lagona o le atuatuvale, fefe, ma le tuuatoatasi ma se vaega na faafaigata ai ona ola. E oo lava i faiga masani na lagonaina le faigata. I se tasi taeao, sa ou ole atu ai i le Tama Faalelagi e aumai ia te a‘u le malosi e faatautaia ai le aso. “E lē mafai ona ou faia pea lenei mea na o a‘u,” sa ou tatalo ai. I se taimi e lē masani ai o le manino faalemafaufau ma faalelagona, sa oo mai upu i lo’u mafaufau “E te tau le faia.” Sa faatumulia lo’u mafaufau i le filemu. Sa faafilemuina le matagi sa i lo’u mafaufau.
O nai masina na sosoo ai (ma tausaga) sa le‘i faigofie. O o’u lagona o le faanoanoa ma le tuuatoatasi sa le‘i vave te’a ese. Ae mo le taimi muamua, sa ou malamalama i se tulaga patino faaletagata i le uiga o le i ai o se Faaola. Sa ou iloa sa Ia malamalama i o’u luitau ma o’u tiga. Sa ou iloa e na o Ia lava e mafai ona fesoasoani ia te a‘u, ma sa Ia faia.
I ni tausaga mulimuli ane, ua avea a‘u o se faifeautalai ua mae’a le misiona, o se tagata faauu i le kolisi, ma faaipoipo ma le fiafia. Ma ou te iloa semanū ou te lē ausia se tasi o na sini pe ana ou lē faalagolago i le Alii.
Ata pu‘e mai le Getty Images
Faalologo Ia, Inā Malū Ia
Sa tofa Iesu i luga o le vaa faatasi ma Ana Aposetolo ina ua agi mai se afā tele. Na fagua e Aposetolo ia Iesu, ma faapea atu, “Le Aoao e, e te lē manatu mai ea ia te i matou a fano?” (Mareko 4:38). O le taimi lava na latou manatu ai o le a latou fano i le matagi tele, sa tulai le Alii ma “na vavao atu i le matagi, ua fetalai atu foi i le vai, Faalologo ia, ina malū ia. Ona mate lea o le matagi, i le ua matuā malū” (Mareko 4:39).
E faafia ona e tuufesili i lou olaga pe, “e te lē manatu mai ea ia te a’u a fano?” O nisi taimi, pe a e ola i luitau faigata, e mafai ona faigofie ona lagona le tuuatoatasi ma le tuulafoaiina. Atonu e te mafaufau pe aisea e lē faatoafilemuina ai e le Alii ou afa. Atonu e foliga mai o le a lē oo lava lou olaga i lena “matuā malū” lea o loo talanoa mai ai le fuaiupu 39.
Peitai, o se vaega tāua o lenei tala o le mataupu faavae lea na sosoo ona aoao mai e le Faaola. Na Ia fetalai: “Se a le mea tou te fefefe ai faapea? Se a le mea tou te lē faatuatua mai ai?” (Mareko 4:40). I le taimi o lo latou fefefe ma le atuatuvale, sa galo ai i Aposetolo lē sa faatasi ma i latou. O le Alo o le Atua, o lē na foafoaina le lalolagi, sa tofa i luga o lo latou vaa. Aisea latou te fefefe ai?
E pei lava o lea, ua i ai i le Faaola le mana e faatoafilemu ai soo se afa i lou olaga. E mafai ona Ia faamaloloina ou tiga, faamāmā au avega, ma tuuina mai le malamalama pe a e i ai i le pouliuli. O lau vaega i lenei faagasologa o le faaaoga lea o le faatuatua sili atu ia Iesu Keriso.
Sailia o le Malosi mai le Alii
O le ola ai ma le faatuatua faateleina e mafai ona aumaia ai le mana tele o Keriso i lou olaga. Ina ua faamaeaina e Razafimalaza mai Madagascar se tausaga faigata o le aoga, sa maliu le tuafafine o lona tama. Sa matuā mafatia o ia. Na toetoe lava a lē mafai ona taulai atu i le taimi o le aoga. Sa sauni o ia e fai suega faaiu o le tausaga. Sa ia tatalo, “Faamolemole aveese lou faanoanoa ma aumai ia te a‘u le malosi e auai ai i le suega taeao.” Ina ua uma ona tatalo, sa lagona e Razafimalaza le faamalosia. “Sa ou lagona le pei ua galo ia te a‘u lo‘u faanoanoa,” o lana tala lea. “E tuuina mai e le Atua ia te a‘u le malosi e faia ai soo se mea.”
E tāua le manatua o nisi taimi e faatoafilemu ai e le Alii ia afā i lou olaga, ma o nisi taimi Na te faafilemuina ma faamafanafanaina oe a o faateteleina le afā. A e faatuatua ia te Ia, e te faalagolago foi i Lona finagalo ma le taimi. E te talitonu o le a Ia fesoasoani ia te oe, e tusa lava pe o afea e taunuu moni mai ai lou filemu ma le toafimalie.
Faalagolago i Lana Taimi
O se tamaitai talavou e igoa ia Ana ua masani i lagona fefe. “Ou te feagai ma le popole tele ma le ADHD i lona tulaga faigata,” o lana tala lea. “O nisi taimi e tuua ai a’u e lenei mea ia lagonaina le lē malamalama i ai o isi, ma e faigata ona tausia se vaaiga e faavavau. Talu ai nei sa ou faitau ai i le Kenese e uiga ia Sarai, o lē sa faatalitali mo le tele o tausaga a o le‘i fanauina se tamaitiiti. Sa ou iloaina atonu e umi se taimi ou te faatali ai ina ia faamaloloina foi. Ou te iloa o le a lē tuulafoaiina a‘u e Keriso pe a ou feagai ma le atuatuvale. O loo i ai o Ia iina e fesoasoani ia te a‘u.”
O le filifili e faalagolago i le Alii e lē faapea e tatau ai ona e lē amanaiaina luitau tetele i lou olaga. Peitai, o lona uiga e tatau ona e “taulai atu i le mana lēmafuatia sili, lelei ma atoatoa o lo [outou] Atua, faalagolago ia te Ia … ma se loto fiafia.1 Pe a e tuuatoatasi, faanoanoa, popole, pe faatalitali mo faamanuiaga folafolaina, manatua le fesili lenei: O e faatalitali mo “se matuā malū” ma se loto fefe po o se loto faamaoni?