“Avea ma Siamupini Moni,” Mo le Malosi o le Autalavou, Mat. 2023.
Avea ma Siamupini Moni
O Felipe o se tasi o tagata sili i le lalolagi i le faatufugaga o karate e pei o le karate, judo, ma le MMA. Ae o le auauna atu i se misiona o lana faamuamua numera tasi lea.
Ata na pu‘eina e Shirley Brito
O Felipe F. e sau mai Pará, Pasila, e lē pei o talavou uma ta‘i 18 tausaga lea ua e masani ai. Sa tauva o ia i tauvaga o faatufugaga su’ifefiloi faalepuipuiga faapolofesa (MMA), judo, ma le karate. Ma e lelei tele o ia i le faia o lea mea. Sa ia manumalo i le tauvaga o le International Iron Man MMA. E 2-taimi na siamupini ai i le setete o Pará, se sui siamupini i Pasila, ma se siamupini faavaomalo mo le judo. Ma e 10-taimi na siamupini ai i le setete o Pará, e 10-taimi o siamupini i Pasila, o se siamupini i Amerika i Saute, o se siamupini o le Pan-American, ma se siamupini i le lalolagi mo le 3-taimi i le karate. Auoi!
O Mafuaaga mo Lona Manuia
Sa koleni Felipe talu mai le fitu o ona tausaga. Ae e talitonu o ia o le mafuaaga sili mo lona faamanuiaina o le Atua. “Ou te tatalo e lē aunoa mo le fesoasoani a le Alii,” o lana tala lea.
I le taimi o lana suega siamupini mulimuli i le karate o le Pan-American, sa le‘i lagonaina e Felipe le mautinoa atoatoa. Ona tuuina atu lea e lona tamā ia te ia se faamanuiaga faaperisitua. “Ina ua mavae lena, sa lelei lo‘u mafaufau, ma na fesoasoani lena mea ia te a‘u e manumalo ai i le siamupini i lena aso. O taamilosaga mulimuli e lua na ou manumalo ai, sa na o le tasi le sekone na totoe. Sa manatu tagata uma e lē mafai. Sa ou faia se gaoioiga e le‘i faamoemoeina na fesoasoani ia te a‘u e manumalo ai, ma mo a‘u, sa mafua ona o le faamanuiaga a lo‘u tamā.”
Na tuuina atu e lona tamā ia te ia le tele o faamanuiaga i le āluga o tausaga. Ua iloa e Felipe o le mauaina o se faamanuiaga o le a faapea o le a ia manumalo ai pea, ae e talitonu o ia e mafai e le Alii ona fesoasoani ia te ia ia tumau le taulai atu ma faaleleia ana taleni. “E fesoasoani lenei mea ia te a‘u ia ou to’a atili ai,” o le tala lea a Felipe. “Ou te iloa e tusa lava po o le a le taunuuga, sa i ai iina le aao o le Alii.”
O le isi vaega o lona aiga sa lagolago malosi foi. I se tasi o tauvaga MMA, na vaai atu ai Felipe i lona aiga i nofoa matamata. “O i latou uma sa i ai iina ma sa tauvalaau i lo’u igoa. Sa ou lē maugagana” Na ia faaopoopo mai, “Ou te matuā faafetai lava mo lo’u tamā ma lo’u tinā, o e na faaali mai ia te a’u le ala sa’o.”
E lagona e Felipe o le mulimuli i lena ala na fesoasoani ia te ia i lana taaloga. E masani ona taliē ana uo ia te ia pe a lē faia e ia mea o loo latou faia. Ae e lē faanoanoa ai Felipe. “E pei lava ona aumaia e le talalelei faamanuiaga, i taaloga e aumaia ai foi mea ua ausia! O le lē alu e pāti ma a’u uo ma aai i meaai sa’o e aafia ai taunuuga.”
Filifili e auauna atu i se misiona
O lea la ua 18 ona tausaga, ua tele avanoa o Felipe. Sa valaaulia talu ai nei o ia e koleni i se aoga iloga o le MMA, ma sa tele ni ofo mai pule i le salafa o le lalolagi. Ae e manao o ia e auauna muamua atu i se misiona.
“Mo a‘u, o se filifiliga faigofie,” o lana tala lea. “E muamua lava le Alii. O le vaega o totoe e mafai ona faatali, auā Na te faamanuiaina oe i taimi uma ona o le usiusitai.”
O le uso matua o Felipe o Junior, o lē sa faato‘ā foi mai i se misiona, o se vaega lea o lona uunaiga. Sa ia ta’u atu ia Felipe e leai se isi mea e sili atu nai lo le auauna atu i se misiona ma e tatau ona alu e tusa lava pe taumafai tagata e tauanau o ia e aua nei faia.
Ma sa i ai ni tagata na fai atu ia Felipe e nofo. O le toatele o tagata i lona aiga lautele e lē o ni tagata o le Ekalesia. “Latou te lē malamalama o le auauna atu i se misiona e sili atu lona tāua nai lo le avea ma se tagata mauoa ma lauiloa. Ou te taumafai lava e aoao atu le talalelei pe a oo i na taimi,” o le tala lea a Felipe. Ma o se tasi o na taimi na taitai atu ai i se aafiaga mamana faafaifeautalai.
E le‘i leva ona maliu le tausoga o Felipe, ma sa faavauvau le tuagane o le tinā o Felipe i le maliu o lona atalii. Sa ta’u atu e Felipe i le tuagane o lona tinā e uiga i le ata o le faaolataga. Mulimuli ane, sa fusi o ia e le tuagane o lona tinā ma faatoese atu mo le ta‘uina atu ia te ia e aua nei alu i se misiona. “Sa ia ta’u mai ia te a‘u sa ia te a‘u le meaalofa o le pa’i atu i loto o tagata ma e tatau ona ou auauna atu,” na manatua ai e Felipe. “O se taimi faapitoa mo a‘u ina ua mafai e se tasi o lē e le‘i iloa po o le a le misiona ona malamalama i lona faamoemoega moni.”
Sa i ai taimi na lē mautonu ai Felipe lava ia e uiga i se misiona. “Sa ou faitauina a’u tusitusiga paia i aso uma, ma i se tasi po sa tele ni o’u masalosaloga e uiga i la’u filifiliga. Sa amata ona ou mafaufau, ‘Pe tatau ea ona ou nofo ma tauva mo sina taimi umi atu?’ Ona ou faitau lea i le Tusi a Mamona ina ua amata ona lē lotofaafetai ma faamaualuga sa Nifae. Na aoao i latou e Iakopo e tatau ona latou faamuamua le Alii. [Tagai Iakopo 2:12–21.] I lena taimi sa leai so‘u masalosalo e uiga i la’u filifiliga.”
“O le asō ua ou iloa ai le mea ou te manao ai, ma ou te iloa o le a ou toe foi mai mai la’u misiona ma faamanuiaina i se auala. Atonu o le taalo lea i le MMA po o se isi mea, ae ou te iloa e tuuina mai e le Atua ia i tatou mea tatou te manaomia.”
O Le Mana o le Liua i Aso Taitasi
Sa le‘i lagonaina i taimi uma e Felipe le fiafia ma le mautinoa e uiga i se misiona—po o le Ekalesia. “Sa i ai se taimi i lo’u olaga sa ou lē malosi ai i le talalelei, ma sa ou lagonaina i taimi uma e pei ua i ai se mea o misi,” o lana tala lea. “E te iloa le ituaiga tagata lea na o le alu lava i le lotu e aunoa ma se isi mea e faia? O a’u lena.” Ina ua uma ona talanoa atu i lona uso ma le epikopo e uiga i le auauna atu i se misiona, sa tonu ia te ia e amata ona tatalo ma faitau ana tusitusiga paia i aso uma.
“Ou te manatu o le mea na fesoasoani ia te a‘u o le liua i aso taitasi. Sa ou ola a‘e i le Ekalesia, ma mo se taimi ou te le‘i saili mo le liua ona sa ou ola a‘e i se aiga ma se talitonuga ma manatu ua lava lena lelei. Ae o lenei ua ou saili mo se molimau i aso uma.”
O Se Siamupini Ona o le Alii
Ua iloa e Felipe o le filifilia o le mea sa’o e lē faapea o le a ia manumalo ai pea pe faia ai foi ia tutupu mea i lana ala. “Ou te manatua le alu i se tauvaga ma le manatu ua ou saunia, ma na ou faiaina i le taamilosaga muamua. O le isi taimi sa ou i ai i le fale i ni manu’aga. Ou te manatua lo’u alapo, ma tilotilo i le faalo, ma mafaufau pe na aogā uma. O nisi taimi sa na ona ou manao lava e faliu ma toe foi e moe, ae sa ou tu i luga ma alu e koleni. O le avea ma se siamupini e sili atu nai lo na o le taimi e manumalo ai. O se tasi e manumalo i aso uma, e faatoilaloina le toilalo, faatoilaloina tofotofoga.”
O le Faaola o se uunaiga mo Felipe e faatoilalo ai vaega uma o le olaga. “Afai tatou te mananao ia avea e faapei o Ia, e manaomia ona tatou faia mea Na te faia, taumafai e lē aunoa e tutū mausali, faamalolosia i tatou lava, ma mafaufau i mea o le a Ia faia. O lena mea e musuia ai a’u i a’u faatinoga i aso uma, ia avea e faapei o Ia. Pe a ou vaai i se mea e mafai ona ou suia, ou te tatalo ma ole atu mo le faamagaloga, ma taumafai ia lelei atili i taimi uma. O se siamupini moni o le tagata lea e pa’ū i le tele o taimi ma e oo lava i le lotolotoi o le lē fiafia e tu i luga ma faaauau pea ona alu.”
“O a‘u o se siamupini ona o le Alii,” o le tala lea a Felipe. “Pe ana leai o Ia, ou te lē iloa po o fea o le a ou i ai. Ae ou te mautinoa o le a ou lē mauaina mea uma o ia te a‘u i le asō. O le ola ai i le talalelei ua avea ai a‘u ma se siamupini i le olaga ma i taaloga.”