Ou Te Mafaia Mea Uma ia Keriso

Ua faasoa mai e le autalavou le ala na faamalosia ai e Keriso i latou e faia mea faigata (tagai Filipi 4:13).

E Mafai ona Tatou Salamo

alii talavou

E ui ina sa ou papatiso ina ua valu o’u tausaga, ae ou te le‘i faia i taimi uma mea sa’o. A o o‘u talavou, sa amata ona ou tafao ma se vaega o alii, ma sa amata ona matou oo i ni mea sa ou iloa e lē lelei.

Ina ua uma ona faaipoipo lo‘u tuafafine, sa ia fesoasoani mai ia te a‘u e toe foi mai i le Ekalesia. Sa ou aoao e uiga i le tāua o le Upu o le Poto ma le taulimaina lelei o lo’u tino.

Ae i se tasi aso, sa ou faia ai se isi agasala matuiā. Sa ou lagonaina e lē mafai ona ou maua le Agaga po o le mana o le perisitua faatasi ma a‘u. Sa ou lagona le lē agavaa tele ma ou te le‘i manatu o le a mafai ona ou faataunuuina o‘u tiutetauave i le lotu, e pei o le faamanuiaina ma le tufaina o le faamanatuga.

Ae na aoaoina a‘u e le talalelei e mafai ona tatou salamo i taimi uma. Sa faigata ona alu e vaai lo’u epikopo ma ta’uta’u atu la’u agasala. Sa faigata le iloa o le a tilotilo mai tagata o o’u savali atu i totonu o le ofisa o le epikopo. Ae sa ou manao i le filemu o le Alii, ma sa ou manao e salamo.

Sa faia e lo’u epikopo se tatalo faatasi ma a’u ma fai mai e alofa mutimutivale pea le Alii ia i latou o e saili ia salamo ma o le a mafai ona ou toe faaleleia mai la’u mea sese. Ua amata nei ona ou faitauina tusitusiga paia ma tatalo, ma ou te iloa e fesoasoani ia te a‘u e tetee atu ai i faaosoosoga.

Afai e faigata le faagasologa o le salamo mo oe, e tatau ona e manatua pea le meaalofa o Iesu Keriso ma Lana Togiola faavavega. Tatou te agasala uma ma faia ni mea sesē, ma o le a tatou lē maua le atoatoa i lenei olaga. Ae e ala i le Togiola a Iesu Keriso ma le toto na Ia faamaligiina mo i tatou, e mafai ai ona tatou salamo i taimi uma. Faatasi ai ma le fesoasoani a le Alii, e mafai ai ona tatou o atu i luma agai i le atoatoa.

Kenneth B., Toga