“O Le Auala na Taulima ai e le Faaola ia Tamaitai,” Mo le Malosi o le Autalavou, Mat. 2023.
O Le Auala na Taulima ai e le Faaola ia Tamaitai
E mafai ona tatou mulimuli i le faataitaiga a Iesu Keriso o le faaalia o le agalelei ma le faaaloalo i tamaitai i o tatou olaga.
Ata na tusia e Rose Datoc Dall
I le Feagaiga Fou, e masani ona aoao atu e Iesu Keriso ni mea e le‘i faamoemoeina. (E pei ona i ai: e tatau ona tatou alolofa i o tatou fili ma tatalo mo i latou o e sauaina i tatou?1)
O nisi o nei aoaoga na teena le aganuu o lena taimi. Ae sa le‘i taumafai le Faaola e faaaofia ai. Sa ia taumafai e aoao atu se tulafono maualuga atu ma faaali mai ia i tatou le auala e taulima ai le tasi ma le isi. Sa ia faatuina se faataitaiga o le alofa lea sa lē faatapulaaina i se vaitausaga faapitoa, itupa, po o tagatanuu.
I ona po o Iesu, sa masani ona taulimaina ma le faatauvaa tamaitai. Ma i nisi o aganuu i aso nei, e lē masani le faaaloalogia o tamaitai. Atonu o loo e nofo i se nofoaga faapena. Afai o lea, e mafai ona e faia se faataitaiga faa-Keriso mo lou nuu e ala i le agalelei ma faaaloalo i tagata uma—e aofia ai teineiti ma tamaitai i lou olaga.
Sa Tausia e Iesu Lona Tinā
O le uluai vavega faalaua‘itele a Iesu Keriso lea na fesoasoani ai i Lona tinā. O ia sa nafa ma le fesoasoani e fafaga tagata i se faaipoipoga. Ina ua leai ni mea e inu, sa faaliliu e Iesu le vai i le uaina ina ia lava mo malo faaaloalogia.
O le faaupuga o le tali a Iesu i Lona tinā i lena talanoaga atonu e matuia i o tatou taliga faaonapo nei: “Funa e, se a ea lau na ia te au?” (Ioane 2:4). Ae na faamanino mai e Iosefa Samita na fesili atu Iesu i Lona tinā po o le a le mea sa ia manaomia: “Funa e, se a ea se mea ou te faia mo oe ?”2. Ma o le valaauina o se tasi “funa e” i lena taimi o se faalagiga o le faaaloalo. Sa ia faapea mai, “Tamaitai e, po o le a lava le mea e te ole mai ai ia te a’u i le faatuatua, o le a ou tuuina atu ia te oe.”3
Tuu mai i luma pe tusa ma le tolu tausaga. A o le‘i maliu o Ia i luga o le satauro, o se tasi o mea mulimuli na faia e Iesu o le mautinoa lea na tausia lelei Lona tinā.
“Ona fetalai atu lea o ia i lona tinā, Sena e, faauta, o lau tama! Ua faapea atu foi i lea soo, Faauta, o lou tinā! Talu foi lea itu aso ua ave o ia e lea soo i lona aiga.” (Ioane 19:26-27).
Sa Taulimaina e Iesu Fafine Na Faate‘aeseina ma le Faaaloalo
E lē itiiti ifo ma le lua faataitaiga a le Faaola o loo taulimaina ai tamaitai ma le faaaloalo o e na teena e tagata.
I le vaitaimi o le Faaola, o le toatele o Iutaia sa vaai maualalo i tagata Samaria. Ae ina ua feiloai Iesu Keriso ma se fafine Samaria i se vaieli, sa Ia taulimaina o ia ma le agaalofa ma le faaaloalo. E sili atu nai lo lena, a o talanoa atu ia te ia na Ia muai faailoa ai o Ia lava o le Faaola folafolaina!4 (Tagai Ioane 4.)
I se isi tulaga, sa maua se fafine o faia se agasala matuiā. E tusa ai ma le tulafono a Iutaia, o le a fetogia o ia i maa ia oti ai. Ina ua aumai e taitai lenei fafine i le Faaola, sa Ia fesili atu ia i latou i se fesili na āfua ai ona latou tutū ma mafaufau. Latou te le‘i fetogiina o ia. Ona valaaulia lea o ia e le Faaola ia salamo, ma fetalai atu, “Alu ia oe, aua e te toe agasala” (Ioane 8:11).
Na Faaali atu Iesu i Tamaitai ina ua mavae Lona Toetu
Ina ua mavae le toetu o Iesu, sa Ia muai asiasi atu ia Maria le Makatala, o lē sa faanoanoa i Lona tuugamau (tagai Ioane 20:11–18). O isi tamaitai—o Ioana, faapea foi Maria le tinā o Iakopo—o nisi ia na muai iloa e uiga i le Alii toetu. Sa valaaulia i latou e agelu e faasoa atu a latou molimau i mea sa latou vaaia. (Tagai i le Luka 24:1–10.)
E Mafai Ona Tatou Mulimuli i Lana Faataitaiga
O le a se mea e mafai ona tatou faia e mulimuli ai i le faataitaiga a le Faaola o le faaaloalo i tamaitai?
O lo tatou perofeta, o Peresitene Russell M. Nelson, e tele ana faataitaiga i lenei eria. Sa ia tausia ni afafine se toaiva ma se atalii faatasi ma lona faletua o Dantzel. Ina ua maliu o ia, sa ia faaipoipo atu ia Wendy Nelson.
“Matou te faaaloalo i tuafafine—e lē gata i o tatou aiga patino ae o tuafafine lelei uma i o tatou olaga,” na ia aoao mai ai.5
Ia tatou faia lenei masina o se masina o le lototele, alofa faa-Keriso ma le agalelei i tamaitai i o tatou olaga. Ua lava lou malosi e suia ai le lalolagi, e tasi le sootaga i le taimi!