“E taaalo faitupe a’u uo. Ou te iloa e sese. E faapefea ona ou faamatalaina atu ia i latou?,” Mo le Malosi o le Autalavou, Mat. 2023.
Tuusa‘o i le Mataupu
E taaalo faitupe a’u uo. Ou te iloa e sese. E faapefea ona ou faamatalaina atu ia i latou?
O taaloga faitupe o lona uiga o le lamatia o tupe i taaloga poo petipetiga i taunuuga o mea. “E tetee le Ekalesia ma ua fautuaina le tetee atu i soo se taaloga faitupe o soo se ituaiga. E aofia ai taaloga petipetiga ma lūlū e lagolagoina e le malo” (Tusitaulima Aoao: Auauna Atu i O Le Ekalesia a Iesu Keriso o le Au Paia o Aso e Gata Ai, 38.8.16, ChurchofJesusChrist.org).
Tatou te aloese mai taaloga faitupe mo le tele o mafuaaga. E lē gata e faama’umau ai le taimi ma tupe, ae e mafai foi ona faaleagaina ai olaga o tagata. E mafai ona avea ma se faananau, e oo lava i le avea o se vaisu.
Ma le isi, o taaloga faitupe e aoao atu ai e mafai ona e maua se mea e aunoa ma se totogi. O se manatu matautia ma sese lena mea. O le manumalo i taaloga faitupe e taumatemate ma e lē faatuatuaina. O le manuia sa e galue ai e sili atu ona faamalieina, faatuatuaina, ma umi ona tumau.
Afai e i ai ni au uo e taaalo faitupe, e mafai ona e taumafai e fesoasoani ia i latou. E mafai ona e ta’u atu ia i latou—ma, o le mea e sili ona tāua, faaali atu ia i latou—o loo i ai ni auala sili atu e faaalu ai lou taimi ma tupe. E mafai ona e faaali atu ia i latou e sili atu le lelei o le olaga pe a e lē tuua au tupe ma lou soifua e lamatiaina i se mausa e aumaia ai le lē mautonu ma le faanoanoa i le toatele o tagata.