Aoaoga Autu o le Talalelei

O Faamanuiaga Faaleperisitua

O Keriso o loo Faauuina le Au Aposetolo e Toasefululua, saunia e Harry Anderson

O se faamanuiaga faaleperisitua e tuuina atu e ala i musumusuga a sē umia le Perisitua Mekisateko. O faamanuiaga faaleperisitua ua mafai ai e fanau uma a le Atua ona maua Lona mana, faamalologa, faamafanafanaga, ma le taitaiga.

O Le Perisitua

O le perisitua o le mana ma le pule a le Atua. O alii agavaa o e umia le Perisitua Mekisateko e galulue i le suafa o Iesu Keriso pe a latou tuuina atu faamanuiaga faaleperisitua. A o latou tuuina atu faamanuiaga, latou te mulimuli i le faataitaiga a le Faaola o le faamanuiaina o isi.

Ata na saunia e David Winters

Auala e Tuuina Atu ai Faamanuiaga

O faamanuiaga faaleperisitua e tuuina atu e ala i le faaee atu o lima. E tuu e se tasi e umia le Perisitua Mekisateko ona lima i luga o le ulu o le tagata o loo mauaina le faamanuiaga. Ona ia tuuina atu lea o se faamanuiaga e pei ona taitaiina ai e le Agaga. O i latou o e tuuina atu faamanuiaga ma i latou o e mauaina faamanuiaga e faatinoina i le faatuatua i le Atua ma faalagolago i Lona finagalo ma Lana taimi.

Faaigoaina ma le Faamanuiaina o Tamaiti

A uma ona fanau mai se tamaitiiti, e tuu atu e se tasi e umia le perisitua ia te ia se igoa ma se faamanuiaga (tagai i le Mataupu Faavae ma Feagaiga 20:70). E masani ona tupu lenei mea i se sauniga anapogi ma molimau. E muamua tuuina atu i le tamaitiiti se igoa. Ona tuuina atu lea e lē o umia le perisitua i le tamaitiiti se faamanuiaga.

Faamanuiaga mo e Mama’i

E mafai e i latou e umia le Perisitua Mekisateko ona tuuina atu faamanuiaga i tagata mama’i. O lenei ituaiga o faamanuiaga e lua vaega: faauuina i le suauu ma le faamauina o le faauuga. Muamua, e tuu e se tasi e umia le perisitua se matāua o le suauu olive lea na faapaiaina, pe faamanuiaina, i luga o le ulu o le tagata ma tuuina atu se tatalo puupuu. Ona faamauina lea e se isi e umia le perisitua le faauuga ma tuu atu i le tagata se faamanuiaga e pei ona taialaina ai e le Agaga Paia.

Faamanuiaga o le Faamafanafanaga ma Fautuaga

E mafai e i latou e umia le Perisitua Mekisateko ona tuuina atu faamanuiaga o le faamafanafanaga ma fautuaga i tagata o le aiga ma isi e talosagaina. O se tamā o loo umiaina le Perisitua Mekisateko e mafai ona tuuina atu faamanuiaga faatamā i lana fanau. Atonu e faapitoa le aogā o nei mea pe a feagai tamaiti ma ni luitau faapitoa.

Vaetofiaina o Tagata o le Ekalesia e Auauna Atu i Valaauga

Pe a maua e tagata o le Ekalesia ia valaauga, e tuuina atu ia i latou se faamanuiaga pe a vaetofia i latou e auauna atu. E faamanuiaina i latou e se taitai perisitua i le pule e galulue ai i le valaauga. E tuuina atu foi e le taitai perisitua ia i latou se faamanuiaga e fesoasoani ai ia i latou i la latou auaunaga.

Ata na pu’eina e Shauna Stephenson

Faamanuiaga Faapeteriaka

E mafai e tagata agavaa uma o le Ekalesia ona maua se faamanuiaga faapeteriaka. O lenei faamanuiaga e tuuina mai ai fautuaga patino mai le Alii. E mafai ona tuuina atu ai le taitaiga ma le faamafanafanaga i le olaga atoa o se tagata. O loo ta’u mai ai foi le gafa o le tagata i le aiga o Isaraelu. Ua na o se peteriaka ua faauuina e mafai ona tuuina atu lenei ituaiga o faamanuiaga.

Mai i Tusitusiga Paia

Sa faamanuia e Iesu Keriso e mama’i e ala i le faaee atu o lima (tagai Luka 4:40).

O tagata o e auauna atu i le Ekalesia e vaetofia e i latou o e ua i ai le pule tatau (tagai i le Mataupu Faavae ma Feagaiga 42:11; Mataupu Faavae o le Faatuatua 1:5).

O tagata mama’i e mafai ona talosaga atu i e umia le perisitua mo faamanuiaga (tagai Iakopo 5:14; Mataupu Faavae ma Feagaiga 42:44).

Upu ia Manatua

Sauniga anapogi ma molimau: O se sauniga faamanatuga lea e tuuina atu ai e tagata o le faapotopotoga a latou molimau. E anapopogi tagata o le ekalesia—o le aunoa ma ni meaai ma vaiinu i lena aso—e masani lava i le Aso Sa muamua o le masina.

Faauuga: O le faaaogaina o le suauu paia o se vaega o se faamanuiaga faaleperisitua mo e mama’i.

Peteriaka: O se e umia le perisitua ua faauuina e tuuina atu faamanuiaga faapeteriaka i tagata o le Ekalesia i lana siteki.

Sailiili Atili

Afai e i ai ni au fesili e uiga i faamanuiaga faaleperisitua, e mafai ona e talanoa i ou uso po o tuafafine o auaunaga, ou taitai o le uarota po o le paranesi, po o faifeautalai. Mo nisi faamatalaga e uiga i le faatinoina o faamanuiaga faaleperisitua, tagai i le mataupu 18 o le Tusitaulima Aoao: Auauna atu i Le Ekalesia a Iesu Keriso o le Au Paia o Aso e Gata Ai i le ChurchofJesusChrist.org.