Olaga o le Nuu o Kalilaia i le Taimi o Iesu Keriso

Saunia e Matthew J. Grey

Polofesa o Tusitusiga Paia Anamua, Iunivesite a Polika Iaga

O le iloaina e uiga i le soifuaga o le nuu i le seneturi muamua lea na soifua ai Iesu e mafai ona fesoasoani tatou te malamalama atili ai i Ana aoaoga ma tatou latalata atili atu ai ia te Ia.

Ata

Iesu Keriso i talafatai o le Sami o Kalilaia.

O loo tusia i Evagelia o le Feagaiga Fou e faapea na faaalu e Iesu le tele o Lona soifua ma le galuega i nuu o Iutaia e latalata i le Sami o Kalilaia, o se vaituloto i matu o Iutaia sa siomia e mauga maualalalo ma laufanua o faatoaga.¹

Sa le gata ina saunia e lenei itulagi ia faatulagaga faaletino, faaleaganuu, ma faalelotu o tausaga a o laitiiti Iesu, ae o iina foi na Ia valaauina ai Ona uluai soo, faatinoina le tele o Ana vavega, ma amata ona folafola atu le “tala fiafia” o le malo.²

O le iloaina e uiga i le soifuaga o le nuu i le seneturi muamua i le eria e mafai ona fesoasoani tatou te malamalama atili ai i Ana aoaoga ma aumaia tala o le talalelei i le olaga i se auala e faalatalata atili atu ai i tatou ia te Ia.

Tagata na Nofoia

O tusitusiga paia, punaoa o talafaasolopito, ma eliga faasolopito o le tagata e latalata i le Sami o Kalilaia o loo ta’u mai ai, e ui o lenei eria sa nofoia e nisi o ituaiga i matu o Isaraelu,³ o nuu o Kalilaia i ona po o Iesu—e pei o Nasareta, Kana, Naina, Kapanaumi, Korasina, ma isi—sa nofoia i seneturi muamua e lua o le TLM, ina ua malaga atu aiga o sa Iutaia agai i matu o se vaega o le malo faateleina o Hasmonea.

E oo atu i le taimi o le Feagaiga Fou, o le faitau aofai o nei nuu na faasolo mai i ni nai selau i ni nai afe o tagata na nonofo ai, o le toatele o i latou sa galulue i ituaiga gaoioiga o faiga faatoaga, faiga faiva, ma fefaatauaiga ia sa masani ona ta’ua e Iesu i Ana faataoto ma lauga.⁴

O Maota

O le olaga i aso taitasi i nuu o Kalilaia sa matua tauagafau lava, aemaise lava pe a faatusatusa atu i aai tetele o le itulagi (e pei o Ierusalema) ma la latou faataatiaga o le sitaili faa-Roma, tekinolosi i le fauga o fale, ma mea e faaaoga i le olaga masani.

Mo se faataitaiga, o nuu o Kalilaia e masani lava e leai ni fuafuaga e faatotonugalemuina, auala ua folaina po o nofoaga faitele mo faatauga, fausaga maoae, po o fale e ta’i ai le suavai mama. Nai lo lena, e tele lava ina i ai ni vaega laiti o fale ma ni potu malolo faatauvaa e faaputuputu faataamilo i se lotoa e faaaoga faatasi (e itiiti lava se avanoa e maua mo le tagata lava ia). Sa faia i maa o le fanua e faaputu ma faapipii faatasi i le omea ma sa i ai ni taualuga atolau na ufiufi i se lau sima.⁵ Ma sa nonofo ai aiga potopoto o e sa galulue faatasi i a latou gaoioiga o faiga faatoaga, faiga faiva, meataulima, po o le gaseseina o meaai.⁶

A o faateleina fale ina ia taulima ai manaoga faatupulaia, sa faanatura lava ona aliae auala pefu ma auala alo, lea na mafua ai ona pefua tulaga e nonofo ai i le taumafanafana vevela ma palapala vaivaia i le vaitau timuga o le taumalulu.

Olaga i le Aiga

Talu ai o lafoga i lea vaitaimi sa maualuluga ma o le toatele o aiga sa na o sina vaega itiiti na ola ai i luga ae o tulaga o le ola, o lea sa le faaalia ai e fale i nuu Kalilaia ni teuga i totonu, sa utiuti meaafale, ma sa leai ni mea taugata na i ai.

Sa masani lava ona saunia e tagata o le aiga meaai e faaaoga ai maa olo ma ogaumu; saofafai ma momoe i luga o fala ofevai e ufiufi ai fola palapala o fale; ma aai mai ulo fai meaai ma aai faatasi i kuka e ala i le fufui o falaoa i supo po o sitiu suavaia.

O meaai masani foi na ono aofia ai uaina i le lotoifale, suauu olive, fatu (lentila, pi, ma moa), fualaau aina (vine, olive, mati, ma vine lapopoa), fualaau faisua (aniani, liki, ma kapisi), i’a, ma oloa e gaosi mai povi (sisi oti, pata, ma le susu).

Faatasi ai ma le leai o ni vai mama po o ni fale taele i nei nofoaga, o le tumama i tagata o le nuu o Kalilaia na matuai maualalo nai lo tulaga i onaponei.

Agaifanua

E faaopoopo atu i le siosiomaga faaletino o le itulagi, o nuu i le seneturi muamua o Kalilaia sa tele lava ina nofoia e aiga Iutaia sa lolotu.

Sa latou tautatala i le faa-Aramaika (atonu na fefiloi ma upu ma fasifuaitau faa-Eperu i nisi taimi), sa faamanatuina ai aso paia e pei o le Sapati (lea sa talia i le tutuina o lamepa suauu laiti) ma tausia le tulafono o meaai e fetaui [kosher] ma tagata Iutaia e pei ona faatonuina i le Torah,⁷ faia tatalo faa-Iutaia e pei o le Shema,⁸ faatumauina le eseese o tulaga o le mama a’ia’i,⁹ potopoto i sunako e faatauvaa tulaga,¹⁰ ma tuugutu faasolo ifo iatala faatusi paia ma aoaoga.

Lavalava

O le toatele o tagata o le nuu sa le mafai ona ofuina ni ofutalaloa uumi po o ni vaega se tele o lavalava ae nai lo lena, sa latou ofuina ofu masani o Palesitina Roma: o se ofutalaloa faatauvaa e gata i tulivae, ofu e leai ni lima e gata i tulivae ma fusi i le puimanava i se fusipau, seevae pa’u, ma se ofutalaloa na amoina faataamilo i tauau mo le mafanafana faaopoopo i le taimi o le taumalulu.

E le gata i lea, e fai e alii Iutaia ni mea teuteu paia i tulimanu o o latou ofutalaloa (e leai se faamaoniga mo ni ufi ulu faalelotu i lenei vaitaimi), ae o tamaitai ua faaipoipo e faapatu o latou lauulu i se tamai neti.¹¹

O nei vaega ma isi vaega o le olaga faa-Iutaia i aso taitasi i le seneturi muamua o Kalilaia o loo ofoina mai ai se vaaiga taua i le lalolagi sa soifua ai Iesu, ma teu i le mafaufau a o tatou faitau i tala o le talalelei e mafai ona faapupula tele ai lo tatou malamalama i lana auaunaga i le olaga nei, savali, ma valaauga i le avea ai ma soo.