E Na’o Tusiga Faatekinolosi: Autalavou Matutua

O Se Vaaiga i le Valaauga Lapatai Faifai Pea a lo Tatou Perofeta

Saunia e Jamie Kathryn LeSueur

Mekasini a le Ekalesia

Faatamaoaiga lou aafiaga o le konafesi aoao o loo loma e ala i le toe iloiloina o le valaauga o le lapataiga a Peresitene Nelson o loo toe ta’ua i nisi o ana saunoaga mulimuli.

O se lima o loo uuina se mea faaleoteleleo

O le konafesi aoao ua latalata mai lava—o lona uiga o faaaliga e ala mai i perofeta o loo agai mai i lou ala!

A o tatou tulimatai atu i fautuaga fou, aua nei galo ia i tatou mea na tatou aoaoina i konafesi talu ai nei. O le mea moni, e le uma le aoga o le afioga a le Alii i le tai ono masina. O mea tatou te faalogo i ai i lenei konafesi o le afaaopoopoatu i mea ua tatou aoaoina i konafesi ua mavae nai lo le suia o na aoaoga.

O Le Valaauga o le Lapataiga

Afai e te vaai i lauga talu ai nei na tuuina mai e lo tatou perofeta, o Peresitene Russell M. Nelson, o le a e matauina ua ia ta’ua soo ni upumoni patino ma le faanatinati. O lenei faifai pea ua fatuina ai “se savali mamana ma le manino ma se leo o le lapataiga ua sili atu ona leotele nai lo pese solo toatasi e mafai ona faatinoina.”¹ Ma o le a le mea o loo ia lapataia ai i tatou? “O osofaiga matautia a le fili.”²

Ua lapatai mai tusitusiga paia e faapea i aso e gata ai “o le a faavaivaia loto o tagata” (Mataupu Faavae ma Feagaiga 45:26) ma o Keriso pepelo “o le a faaseseina ai lava e ua filifilia” (Iosefa Samita—Mataio 1:22). E moni lenei mea mo o tatou taimi. Atonu e te iloa se tasi sa avea muamua ma se soo o Iesu Keriso ae ua leiloa nei la latou molimau. E moni lava ua faamata’uina e le fili lo tatou faatuatua a o tatou latalata atu i le Afio Mai Faalua o Keriso.

O lo tatou perofeta e pei o se “leoleo” i luga o le olo (Esekielu 33:2). Ua valaauina o Ia e “ili le pu, ma lapatai atu i tagata” (Esekielu 33:3). Ma o le lapataiga a Peresitene Nelson e sili atu nai lo na o se faailoaina o mea matautia—o se fuafuaga e fesoasoani ia i tatou taitoatasi e saunia ma tetee atu i osofaiga faaleagaga. Ma o le taimi sili lenei e iloilo ai lana fautuaga!

O Le Fuafuaga Faatino

Faamalosia o Lou Faatuatua ia Iesu Keriso

O le mea lenei na saunoa i ai Peresitene Nelson e uiga i le fausiaina ma le faatumauina o se molimau o le a tetee atu ai i osofaiga a le fili:

• “Ou te augani atu ia te outou ia pulea lau molimau. Galue i ai. Umia. Tausi i ai. Faafailele ina ia tuputupu a‘e.”³

• “O se molimau e le fafagaina i aso taitasi ‘i le afioga lelei a le Atua’ [Moronae 6:4] e mafai ona nutipalaina. … Tatou te manaomia ni aafiaga i aso taitasi e tapuai ai i le Alii ma suesue i Lana talalelei.”⁴

• “Suesue ma le manao etalitonu… faataga le Alii e taitai oe i lau malaga o le suesuega faaleagaga.”⁵

Faaavanoa se Taimi mo le Alii

O le a le lava le filemu o le lalolagi mo oe e faalogo ai i le Agaga. E tatau ona e tuuto atu le taimi e filemu ai ma faalogo. O e faaaluina se taimi e taumafai ai e faalogo ia te Ia?

• “Avatu ia te Ia[le Alii] se vaega talafeagai o lou taimi. A e faia lenei mea, ia matau le mea o loo tupu i lou malosiaga lelei faaleagaga.”⁶

• “Tatou te faatulaga a tatou lava mea e faamuamua ma filimaoti pe faapefea ona faaaoga lo tatou malosi, taimi, ma punaoa. … Ia faafetaiaia mailei o le lalolagi e ala i le faaavanoa o le taimi mo le Alii i lou olaga—i aso taitasi ma aso uma.”⁷

• “E [mafai] ona tatou faatumuina [o tatou] taimi … ma le leo ma le vāvao o le lalolagi. Pe mafai foi ona tatou faaaogaina lo tatou taimi e faalogo ai i le siufofoga o le Alii o loo musumusu mai i Lana taitaiga, faamafanafanaga, ma le filemu.”⁸

Osia ma Tausia Feagaiga

A e osia ni feagaiga ma le Tama Faalelagi, e te ulu atu i folafolaga autasi o le faamoemoega ma faatinoga. Ma o le tele o lou lotogatasi faatasi ma Ia, o le malosi foi lena o lou i ai i lau taua faasaga i le fili.

• “Ua i ai i le Atua se alofa faapitoa mo tagata taitoatasi e osia se feagaiga ma Ia i vai o le papatisoga. Ma o lena alofa paia e faalolotoina a o osia isi feagaiga faaopoopo ma tausia ma le faamaoni.”⁹

• “Faatasi ai ma aioiga uma o lo’u loto, ou te augani atu ia te outou ia o mai i luga o le ala o feagaiga ma tumau ai iina.”¹⁰

• “A e faamaoni i au feagaiga na osia i le malumalu, o le a faamalosia oe e Lona mana … o le a mafai ona e tumalosiaua o lou faavae faaleagaga e mausali ma e le masii ese.”¹¹

O Folafolaga

Pe a tuufaatasi, o nei savali e tolu—faamalosia o lou faatuatua, faaavanoa le taimi mo le Alii, ma le tausia o feagaiga—tuuina mai faamaoniga i se mea moni taua: Ua silafia e Peresitene Nelson ua tatou i ai i aso e gata ai, ma o loo ia faia mea uma na te mafaia e fesoasoani ai ia i tatou e tutu malolosi.

O lea la ua e faalogo i lona “leo o le pu” (Esekielu 33:4), e tuu atu ia te oe e fai se faatinoga! Faaaoga le fautuaga a le perofeta. Fai ni suiga i au faiga masani e mulimuli ai i le fuafuaga faatino. Ma a o e faia o le a “avea oe ma meafaigaluega e sili ona malosi i aao o le Alii.”¹² O le a “faaauupegaina oe i le mana o le perisitua.”¹³ O le a mafai ona e “liliuina luitau i le tuputupu ae ma avanoa e le mafaatusaina.”¹⁴ Ma o le a e saunia e maua nisi upumoni, lapataiga, ma sauniuniga mai le Alii e ala mai i Lana perofeta i le isi konafesi aoao e sosoo ai.

O Jamie Kathryn LeSueur sa avea muamua ma se tagata galue faataitai mo le TM Faalevaiaso. I le avea ai ma se tusitala, e fiafia o ia e faaaoga se peni ma se pepa e suesue ai ona lava manatu. E fiafia foi o ia e faataitai le yoga ma o loo koleni o ia i le taimi nei mo lana malafoni muamua. E faafetai o ia i aso uma mo le vavega o se tino faaletino ma faitaulia o ia lava ua faamanuiaina e faia i le faatusa o le Atua.

Suesue Ia Iloa Atili

E mafai ona e mauaina nisi tala e uiga i luitau faaleaiga i le vaega a le Autalavou Matutua i le Liahonao Mati 2023.

Siaki le AM Faalevaiaso, o loo maua i le polokalama o le Gospel Library i le vaega o Mekasini po o le Au Matutua > Autalavou Matutua, mo nisi anotusi fou, ma musuia mo talavou matutua i vaiaso taitasi.

E mafai ona e auina mai lau lava tala, manatu, po o manatu faaalia i le [e-mail]. Ua le mafai ona tatali lo matou fia faalogo atu ia te oe!

Faamatalaga

1. David A. Bednar, “O le a Tatou Tofotofoina ai i Latou,” Liahona, Nov. 2020, 9.

2. Russell M. Nelson, “O Le Mana o le Malosiaga Faaleagaga,” Liahona, Me 2022, 98.

3. Russell M. Nelson, “Filifiliga mo le Faavavau” (faigalotu i le lalolagi atoa mo le autalavou matutua, 15 Me, 2022), broadcasts.ChurchofJesusChrist.org.

4. Russell M. Nelson, “O Le Mana o le Malosiaga Faaleagaga,” 99.

5. Russell M. Nelson, “Ua Toetu Keriso; O Le Faatuatua ia te Ia O Le A Aveesea ai Mauga,” Liahona, Me 2021, 103.

6. Russell M. Nelson, “O Le Mana o le Malosiaga Faaleagaga,” 99.

7. Russell M. Nelson, “Faaavanoa se Taimi mo le Alii,” Liahona, Nov. 2021, 120.

8. Russell M. Nelson, “O Mea o Loo Tatou A’oa’oina ma O Le a Lē Galo Lava,” Liahona, Me 2021, 80.

9. Russell M. Nelson, “Filifiliga mo le Faavavau” (faigalotu i le lalolagi atoa mo le autalavou matutua, 15 Me, 2022), broadcasts.ChurchofJesusChrist.org.

10. Russell M. Nelson, “O Le Mana o le Malosiaga Faaleagaga,” 100.

11. Russell M. Nelson, “O Le Malumalu ma Lou Faavae Faaleagaga,” Liahona, Nov. 2021, 96.

12. Russell M. Nelson, “Filifiliga mo le Faavavau” (faigalotu i le lalolagi atoa mo le autalavou matutua, 15 Me, 2022), broadcasts.ChurchofJesusChrist.org.

13. Russell M. Nelson, “O Le Malumalu ma Lou Faavae Faaleagaga,” 95.

14. Russell M. Nelson, “Ua Toetu Keriso; O Le Faatuatua ia te Ia O Le A Aveesea ai Mauga,” 104.