“Fesoasoani ma le Faamoemoe mai le Konafesi Aoao,” Liahona, Mat. 2023.
O Leo o le Au Paia o Aso e Gata Ai
Fesoasoani ma le Faamoemoe mai le Konafesi Aoao
Ou te le’i faamoemoe lava e faalogo i se lauga atoa o le konafesi aoao e uiga i le mea tonu sa ou oo i ai.
Ata pu’e o le tusitala ma lona aiga na saunia e Cody Bell
Ina ua mavae le fanau mai o la’u tama muamua, sa ou puapuagatia mai le atuatuvale o le tinā failele. O se taimi matagofie i lo’u olaga ona ua i ai so’u atalii, ae sa lē mafai ona ou lagonaina atoatoa le olioli o le mauaina o se pepe auā sa ou matuā faanoanoa lava.
I lenei taimi faigata, sa ou tatalo soo ai i le Tama Faalelagi. Sa ou ole atu ia te Ia e fesoasoani mai ia ou manumalo i lenei tofotofoga faigata. Faatasi ai ma le konafesi aoao ua lata mai i lena tautoulu, sa ou tatalo ai foi ina ia ou maua le mafanafana mai lauga a taitai o le Ekalesia.
A o o’u faalogologo i lauga i le taimi o le sauniga muamua o le konafesi aoao, sa amata ona ou lagona le mafanafana. Ona oo lea i le taimi o le sauniga lona lua, sa saunoa ai Elder Jeffrey R. Holland o le Korama a Aposetolo e Toasefululua e uiga i le faanoanoa. Sa ia fai mai o le faanoanoa e mafai ona tatou lagona ai “peiseai o se ipu ua nutililii”1 (Salamo 31:12). Ou te le’i faamoemoeina lava e faalogo i se lauga atoa e uiga i le mea tonu sa ou oo i ai.
O se taimi faapitoa tele lenei mo a’u. O le lauga na fesoasoani ou te malamalama ai e alofa le Tama Faalelagi ia te a’u ma Na te silafia a’u. Na Ia malamalama lelei i le mea na ou oo i ai. Sa manao o Ia e fesoasoani mai ia te a’u ma tuuina mai ia te a’u le faamoemoe. Sa Ia faia lena mea e ala i upu a Elder Holland.