E Na’o Tusiga Faatekinolosi
Malamalama, Upumoni, ma La Tatou Savaliga ma Iesu Keriso
Mafaufau i ni auala se tolu o le a fesoasoani ia te oe e savali ai i le malamalama ma iloatino ai le upumoni e aunoa ma le faaseseina.
Saili le Malamalama
O upu musuia o le pese matagofie “O Le A Ou Savali ma Iesu” o se valaaulia mo manatunatuga loloto:
Na savali Iesu i le poto; na tupu ae Iesu i le upumoni.
Na faaali Lona alofa i le Atua ma tagata a o talavou o Ia.
E finagalo Iesu e taiala a’u. E faaalia e Iesu le ala,
Valaau mai ou te savali ma Ia i aso taitasi.
Ou te tuputupu ae pei o Iesu. O le a ou taumafai i aso uma—
Folafola atu e savali i Lona ala ma tumau ai.
I tafatafa o lo’u Faaola, saogalemu i Lana tausiga,
Ou te mulimuli i tulagaaao, ma faasoa atu Lona alofa.
Ou te faatuatuaina Iesu. Ou te faalogo i Lana valaau.
Na te le tuua a’u, tusa lava pe ou te pa’ū.
E tuu mai e Iesu le mana, siitia ma faamafanafana,
Fesoasoani ou te ola ma tuputupu ae e faavavau.
A o ma savavali ma Iesu i lo’u aiga i lugā,
Ou te manuia i Lona Agaga ma faatumulia i Lona alofa,
Suia lo’u loto e faavavau ma fesoasoani ia ‘ou vaai.
O le a ou savali ma Iesu, o le a savali o Ia ma a’u.1
E moni lava e leai se isi luitau sili atu, sili atu ona faagaeetia, ma sili atu ona faagaeetia-loto nai lo le aoao pe faapefea ona savavali faatasi ma le Alii ma mauaina i le taimi lava lena le faamanuiaga ofoofogia o le savavali faatasi o Ia ma i tatou.
Mafaufau i le perofeta o Enoka. A o tuputupu ae o ia i le faatuatua ma le malamalama, sa aoaoina Enoka i ala uma o le Atua. Sa matua tele lava lona faatuatua ma le mamana tele o lana gagana lea na ia fesoasoani ai i tagata taitoatasi o lona nuu ia salamo ma iloa mo i latou lava le malamalama ma le upumoni lea e oo mai i le usiusitai i poloaiga. Sa matua tele lo latou suiga ma le liua lea na latou savavali faatasi ai ma le Alii ma mulimuli ane aveina atu ai i le lagi. Sa saili Enoka mo le malamalama ma le upumoni i lona olaga, ma sa valaaulia o ia e savavali faatasi ma Iesu (tagai Mose 6–7).
Sei o tatou mafaufau pe faapefea e la tatou sailiga mo le malamalama ma le upumoni i o tatou olaga i aso taitasi ona fesoasoani tatou te savavali faatasi ai ma Iesu. I tusitusiga paia, o le malamalama o le “malosiaga faalelagi, mana, po o le uunaiga e mai le Atua e ala ia Keriso ma e tuuina mai le ola ma le malamalama i mea uma. E fesoasoani foi i [fanau a le Atua] ia malamalama i upumoni o le talalelei ma fesoasoani e tuu i latou i luga o le ala o le talalelei lea e tau atu i le faaolataga.”2 Na folafola mai e le perofeta o Apinati i le Tusi a Mamona e faapea o Iesu Keriso “o le malamalama ma le ola o le lalolagi; ioe, o se malamalama e le gata, e le mafai lava ona faapouliuligia” (Mosaea 16:9). Na fetalai le Faaola, “O A’u nei o le malamalama o le lalolagi; o le mulimuli mai ia te au, e le savali o ia i le pouliuli, a e ia te ia le malamalama o le ola” (Ioane 8:12).
O le mea lea, a o tatou saili mo le malamalama i o tatou olaga, o loo tatou sailia Keriso. A o tatou saili atu ia Keriso ma opogi Lona malamalama, e avea i tatou ma Ana fanau—“fanau o le malamalama” (1 Tesalonia 5:5). O fanau o le malamalama e faasusulu atu lo latou malamalama ina ia mafai ai e isi ona iloa a latou galuega lelei ma vivii atu ai i lo tatou Tama oi le Lagi (tagai Mataio 5:16). O lena tulitulimatagauina e taitai atu ai i tatou e faia mea lelei i le olaga ma tuuina mai ia i tatou le folafolaga o le a tatou “le savavali i le pouliuli, ae o le a tatou maua le malamalama o le ola.” A o tatou faaauau ai pea i lenei ala o le savavali i le malamalama paia o Iesu, tatou te aoao, tuputupu ae, ma maua atili le malamalama.3 O loo i ai se mamanu o le mauaina o le malamalama a o tatou savavali faatasi ma Iesu, ma, i le isi itu, ua savavali faatasi Iesu ma i tatou taitoatasi e ala i le faamanuiaina o i tatou ia “maua pea lona Agaga e faatasi ma i [tatou]” (Mataupu Faavae ma Feagaiga 20:77). O le folafolaga tonu lava lenei na faia e le Alii ia Enoka: “Ma o le a mau oe ia te aʼu, ma aʼu ia te oe; o lea, savali faatasi ma aʼu” (Mose 6:34).
Saili le Upumoni
Sei o tatou liliu atu la tatou gauai i le upumoni. I tusitusiga paia, ua tatou aoao ai “o le upumoni o le iloa lea o mea e pei ona i ai, ma e pei ona sa i ai, ma e pei ona o le a oo mai” (Mataupu Faavae ma Feagaiga 93:24). Na aoao mai le Perofeta o Iosefa Samita: “O le atamai e manaomia mo le olaga ma le faaleatua. … O le atamai o le faaaliga. Faalogo, outou uma le au uso e, o lenei le ki atoatoa; o le atamai o le mana o le Atua i le faaolataga.”4 Na fetalai le Alii:
“O le Agaga o le upumoni ua mai le Atua. O Aʼu o le Agaga o le upumoni, ma sa molimau Ioane e uiga ia te aʼu, fai mai: Sa maua e ia se atoatoaga o le upumoni, ioe, upumoni uma lava;
“Ma e leai se tagata e mauaina se atoatoaga vagana ai ua tausi o ia i ana poloaiga” (Mataupu Faavae ma Feagaiga 93:26–27).
Uso e ma tuafafine, i lenei matalalaga, o le upumoni e fesootai i le malamalama, atamai, ma faaaliga mai le lagi ma e ogatusa ma le mafaufau, loto, uiga, mamalu, ma le avea ai ma ni tagata o le Atua.5 E i ai le mana i le upumoni ona “o le a faasaolotoina [i tatou] e le upumoni” (Ioane 8:32). O le mea lea, o le upumoni e mafai ai e i tatou ona vaai manino, iloatino ma aloese mai le taufaasese, ma faatulaga se ala i le le mautonu o o tatou aso. O le mea moni, e tatau ona tatou saili i taimi uma mo le upumoni i o tatou olaga i se auala se tasi po o se isi. O fuaiupu lona lua ma le fa o le viiga “Upu Moni o A?” e aoga tele i le faaupuina o le taua o la tatou sailiga mo le upumoni:
Upumoni o a? ’Taui sili na
Maua e Atua ma tagata.
Saili i mea loloto naua,
Po o lagi maualuluga tele sautuaiva:
O le faamoemoe sili lena. …
Upumoni o a? ’Alefa, Omeka,
O le taimi na te laasia.
E mavae lalolagi ma lagi uma,
Tumau pea upu moni faavae o mea uma,
Faavavau e le masuia6
Ua tatou ola i taimi ofoofogia a ua faatumulia le lalolagi i le tele atu o faamatalaga nai lo se isi lava taimi muamua. Ae e lei matua sili atu lava ona faigata le iloatino o le upumoni. Ua tatou ola i se lalolagi e feeseeseai ai manatu, manatu leotetele ma fevaevaeai, ma filosofia iloagatā ia e masani ona maua mai i tagata ua fai mai lava latou e atamamai ma faatosina—o le toatele o i latou atonu o loo alalaga mai i nofoaga pogisa o le initoneti. I luga o le initoneti o loo i ai se osofaiga e foliga mai e le muta lava le faasagatau i le upumoni.
Sa fiafia le peresitene o Amerika o Aperaamo Linikone e auai faatasi ma ana au maimoa ma na masani ona ia faaaogaina ni tupua ma aga malie pe a ia saunoa. O se tasi o tala e faapea sa ia fesili atu i se aofia pe fia ni vae o i ai i se taifau pe ana faitauina le siusiu o se vae. Ina ua latou fai mai e lima, sa ia tali mai o le tali e fa, aua o le ta’uina o le siusiu o se vae e lei avea ai le siusiu o se vae.
E i ai moni lava le mea e ta’u o le upumoni. Po o le a lava le toatele o tagata e fiafia i ai ma faasoa atu a latou “upumoni” po o le a foi le toatele o tagata faatosina faaleagafesootai e faamautuina, ae o le mea moni lava o le siusiu e le o se vae ma e le mafai lava ona avea o se vae. O le tupua a Lincoln ua faailoa mai ai le eseesega i le va o “la’u upumoni” ma le upumoni a’ia’i. O Satani o le matai o le aveesea o uiga o upu, suia le faauigaga, ma le faaseseina o le mea moni. O le toatele o tagata i luga o le initoneti e foliga mai e taunuu lava mea e mananao ai e ala i lo latou suia o le faauigaga o se mea, ae o le suia o faauigaga e le suia ai le tulaga moni o se mea po o le mea moni lava ia.
I se tasi itu, o le tagavai o le upumoni mo le lalolagi ua faatatau lea i mea e lelei ai le faalogona. Soo se taimi e fesiligia ai le “upumoni a se tagata lava ia,” e pei ona faauigaina ai e i latou lava mo i latou, ua avea ma se finauga ma se osofaiga patino o ia. O faamatalaga e aunoa ma se tulaga faatonuina ma leai se malamalama ma le upumoni e fatuina ai se isi mea e suitulaga i le mea moni. Mafaufau la, mo se faataitaiga, o le tele o auala sese ua e alu ai e fuafua mai lava e le initoneti e faaali mai le tele ma tele o anomea ma faamatalaga ia e faavae lava i luga o au kiliki ma au fiafia (likes) i ai. O le tele lava o lou kilikiina o se mea, o le tele foi lena o le fuafua mai e le initoneti e faaali mai lava ituaiga o anomea faapena—e le o le tulitulimatagauina o le upumoni ae ina ia faaleleia ai faasalalauga ma tupe maua. Mo se faataitaiga, afai e te kiliki i luga o vitio o taifau, atonu e le pine lava ae e mafaufau faapea e fiafia uma tagata i taifau ma e i ai a latou taifau ma o le initoneti na faia moni lava e se taifau mo e alolofa i taifau. O le a faaali atu e le initoneti ia te oe se aofaiga ua matua faateleina o nei ata ma faasalalauga e oo ai i le tulaga e te ono amata ai ona e mafaufau e te manaomia moni lava se taifau.
I le lalolagi o aso nei, atonu e mafai ona e savali ma se tekinolosi malosi tele i totonu o lau taga po o le atofaafafa, ae e le mafai lava ona e fesili atu i tekinolosi mo le malamalama ma le upumoni. O le savavali ma tekinolosi, e oo lava i ona tomai ofoofogia, e le tatau lava ona fenumiai ma le savavali faatasi ma Iesu. O le faalagolago i la tatou savaliga ma leo faalelalolagi ma punaoa faalelalolagi e mafai ona tuua ai i tatou e vaivai ma faaseseina gofie i filosofia sese ma mea e le moni. Atonu e faatosina mai nei mea ia i tatou, ae latou te le suitulaga i le upumoni.
Sa aoao mai lo tatou perofeta pele, Russell M. Nelson, i se tasi taimi: “O le upumoni o le upumoni. O nisi mea e matua moni lava. O le pule o le upumoni o le Atua—e le o lau talafou faasalalau faaagafesootai e sili ona e fiafia i ai.”7
Ma i ona luma atu, i le tele o tausaga ua mavae, sa aoao mai ai foi e Peresitene Spencer W. Kimball (1895–1985), o le sa avea ma perofeta i o’u aso a o ou aoga i le iunivesite, e faapea o le upumoni a’ia’i e le mafai ona “suia e ala i manatu o tagata.”8 Uso ma tuafafine, “o loo i ai upumoni a’ia’i i se lalolagi lea ua faateteleina lona inosiaina ma lē taliaina o upumoni a’ia’i.”9
Savavali faatasi ma Iesu Keriso
O la tatou sailiga i le olaga o le saili lea mo le malamalama ma le upumoni ma savavali faatasi ma lo tatou Faaola ma ia maua le faamanuiaga matagofie o le i ai o Ia e savavali faatasi ma i tatou, e ui lava i le pogisa o loo i ai i le lalolagi i aso nei. Na fautua mai Peresitene Nelson, “Ia, faamolemole faafofoga mai pe a ou fai atu: Aua nei taitaieseina outou e i latou e i ai ni masalosaloga ua faateteleina e ni mea e le o mafai ona outou vaaia i o latou olaga.”10 Sa Ia valaaulia foi i tatou e aumaia le malamalama ma le upumoni i totonu o a tatou molimau:
“Ou te augani atu ia te outou ia pulea a outou molimau. Galue i ai. Pulea. Tausi i ai. Faafailele ina ia tuputupu ae. Fafaga i upumoni. ‘Aua ne’i faaleagaina i filosofia sese o alii ma tamaitai le talitonu ona e tuufesili lea pe aisea ua vaivai ai lau molimau.”11
O nei fautuaga o se valaaulia moni lava e savavali faatasi ma Iesu ina ia mafai ai e Iesu ona savavali faatasi ma i tatou.
E mafai faapefea ona tatou savavali i le malamalama ma iloatino le upumoni e aunoa ma le faaseseina e mea moni fesuisuiai ia e lagolagoina e tagata o e ua inoino i upumoni paia ma a’ia’i? E mafai ona ou ofoina atu ni auala e faavae i mea ua ou aoaoina mai aoaoga musuia a o tatou perofeta ma ala mai i o’u lava aafiaga i le olaga?
Suesue e le Aunoa i le Tusi a Mamona
Muamua, ole atu i le Atua mo musumusuga i le auala e faapaleni ai ou taimi pisi ina ia mafai ona e faaaluina le taimi e suesue soo ai i le Tusi a Mamona. O upumoni o le talalelei a Iesu Keriso e sili ona manino ma mamana le aoaoina mai i le Tusi a Mamona. O lenei talafaamaumau paia o tusitusiga paia o se vaega taua i le Toefuataiga o le talalelei a Iesu Keriso i lenei tisipenisione, ina ua mavae le asiasiga a le Atua le Tama ma Lona Alo, o Iesu Keriso, ia Iosefa Samita. O loo molimau mai le Tusi a Mamona i le alofa moni ma atoatoa o le Atua mo Ana fanau, o le taulaga togiola lē manatu faapito ma paia a Iesu Keriso, ma le galuega sili ona taua a le Faaola i totonu o sa Nifaē i le taimi lava na mavae ai Lona Toetu (tagai 3 Nifae 11).
O le Tusi a Mamona o loo i ai tali i fesili aupito sili ona faatauanau o le olaga, ma o loo aoao mai ai le aoaoga faavae a Keriso. E pei ona aoao mai e lo tatou perofeta pele, o Peresitene Nelson, o upumoni o loo i ai i lenei tusi “ua i ai le mana e faamalolo ai, faamafanafana, toefuatai, fesoasoani, faamalosia, faatoafimalie, ma faafiafia o tatou agaga.”12 Mafaufau i folafolaga a le perofeta mo i latou o e faaaluina le taimi e suesue ai lenei tusi ofoofogia o tusitusiga paia:
“A outou suesueina ma le agaga tatalo le Tusi a Mamona i aso uma, o le a outou faia ni faaiuga lelei atu i—aso uma. … A outou mafaufau loloto i mea tou te suesueina, o le a matala mai pupuni o le lagi, ma o le a outou mauaina tali i a outou lava fesili ma le taitaiga mo o outou lava olaga. … A e faatofuina oe lava i aso taitasi i le Tusi a Mamona, e mafai ona puipuia oe mai mea leaga o le aso.”13
O le faaaluina o le taimi i le Tusi a Mamona o le a taialaina ai oe ia Iesu Keriso ma faatumuina ai oe i musumusuga ma faaaliga mo lou olaga. O le a faatumulia ai lou agaga i le malamalama ma fesoasoani ia te oe e iloatino ai le upumoni.
Sa ou faitau i le Tusi a Mamona mai le amataga e oo i le faaiuga mo le taimi muamua ao avea au ma se tamaitiiti aoga seminare talavou. Ou te manatua pea le lagona mafanafana lea na tupu ae i lo’u agaga, na faatumulia ai lo’u loto, na faapupulaina ai lo’u malamalama, ma sa atili ai pea lava pea ona ou fiafia, e pei ona faamatalaina e Alema ina ua ia talai atu le afioga a le Atua i lona nuu (tagai Alema 32). O lena lagona ma le malamalama faaopoopo ma le upumoni lea na silafia e le Alii e talafeagai e faamanuia ai a’u, na iu lava ina liua i le malamalama lea na mauaa i lo’u loto ma avea ai ma faavae o la’u molimau. O le Tusi a Mamona o le maa’au’au lea e lagolagoina lo’u faatuatua i le Alii ma la’u molimau i le aoaoga faavae a Iesu Keriso. O se tasi lea o maatulimanu e faamalosia ai la’u molimau i le moni o le taulaga togiola paia a Keriso. O la’u talitā lea e faasaga i taumafaiga a le fili e faavaivaia lo’u faatuatua ma faatupuina le le talitonu ma le pogisa i lo’u mafaufau. Ou te maua ai le lototele e tautino atu ai ma le lototoa la’u molimau i le malamalama ma le upumoni a le Faaola i le lalolagi. Ou te folafola atu ia te outou a o outou suesue ma le agaga tatalo ma le faifai pea i le Tusi a Mamona, o le a outou maua le malamalama ma le upumoni i o outou olaga ma o le a outou latalata atili atu ai i lo tatou Faaola o Iesu Keriso ma aoao ai pe faapefea ona savavali faatasi ma Ia.
Faaalu Atili le Taimi i Malumalu o le Alii
O le auala lona lua o le faaaluina lea o le tele o le taimi ma le Alii i Totonu o Ona malumalu. Talu mai le uluai saunoaga a Peresitene Nelson i le Ekalesia atoa ia Ianuari 2018, ua ia taulai atu i le tele o ana aoaoga i le matafaioi taua e faia e le malumalu ma ona sauniga ma feagaiga paia i o tatou olaga. O le mea lenei sa ia aoao mai i lena taimi:
“O le taunuuga lea tatou te tauivi uma i ai ina ia faaeeina i le mana i totonu o se maota o le Alii, faamauina o ni aiga, faamaoni i feagaiga e osia i totonu o se malumalu lea e agavaa ai i tatou mo le meaalofa silisili a le Atua—o le ola e faavavau. O lou tapuai ai i totonu o le malumalu ma lau auaunaga iina mo ou tuaa o le a faamanuiaina ai oe i le faateleina o faaaliga faaletagata lava ia ma le filemu, ma o le a faamalosia ai lou tuuto e tumau i luga o le ala o feagaiga.”14
O le a le uiga o lenei mea mo i tatou? O le tali lenei a Peresitene Nelson i le fesili lenei:
“O le manaomia ona tatou i ai soo i le malumalu e le aunoa ua matuā sili ona manaomia i le taimi nei. Ou te aioi atu ia te outou ia tagai ma le agaga tatalo pe faapefea ona faaalu lou taimi. Ia saofagā lou taimi i lou lumanai ma i lou aiga. Afai e te latalata i se malumalu, ou te uunaia oe ia saili se auala e fai ai sou taimi faatulagaina ma le Alii—ia i ai i totonu o Lona maota paia—ona tausia lea o lena taimi faatulagaina ma le sa’olele atoatoa ma le olioli. Ou te folafola atu ia te outou o le a aumai e le Alii ni vavega ua Ia silafia tou te manaomiaina a o outou faia ni osigataulaga e auauna atu ma tapuai atu i totonu o Ona malumalu.”15
Uso e ma tuafafine, o lenei tali o se valaaulia e toe faatulaga mea tatou te faamuamua i o tatou olaga ma faaaofia ai le malumalu o se tasi o na mea. O malumalu o maota totino moni o le Alii. Ma a tatou i ai iina, taulai atu i le tapuai atu ia te Ia ma saili atu mo Lona malamalama ma le upumoni, e mafai ona tatou lagonaina se uunaiga manino ua tatou tuua le lalolagi, ma o le a mamao ese le lalolagi tuuatoatasi ma le pagatia mai o tatou mafaufau. Tatou te lagonaina le puipuia atoatoa mai soo se faatosinaga leaga mai le lalolagi. O malumalu o nofoaga o faaaliga, faatonuga, ma sulufaiga mai afa faaleagaga tatou te feagai i o tatou aso.
Ou te valaaulia outou ia mafaufau i auala e faaavanoa ai le taimi mo le Alii i Totonu o Ona malumalu. O mai ma tuu a outou avega i Ona luma i Lona maota paia, ma ou te folafola atu ia te outou o le a faatumulia outou i se agaga fou ma le talitonuga i le lumanai. O le a opoina oe e le Alii, faafaileleina oe, ma taitai oe i lea laasaga ma lea laasaga i luga o le ala e savavali faatasi ai ma Ia. I le malumalu tatou te aoao ai i upumoni o le faavavau ma maua ai le malamalama sili atu a o tatou faalatalata atili atu ia Iesu ma aoao le ala e savavali faatasi ai ma Ia.
Mulimuli i Upu a o Tatou Perofeta Soifua
O le auala lona tolu ou te ofoina atu ia te outou o le mulimuli lea i upu a o tatou perofeta soifua. A’u uo e, ua faamanuiaina i tatou i le taitaiina e perofeta, o e o ni tamalii musuia ua valaauina e saunoa mo le Alii. Ua valaauina i latou e faailoa mai le finagalo o le Atua ma Lona uiga moni e ala ia latou aoaoga. E mafai ona tatou faatuatuaina i taimi uma ia perofeta soifua. O a latou aoaoga ua atagia mai ai le finagalo o le Alii, o le na tautino mai, “Ma o le leo o le lapataiga o le a mo tagata uma, e ala i fofoga o o’u soo, o e ua Ou filifilia i nei aso e gata ai” (Mataupu Faavae ma Feagaiga 1:4; tagai foi Mataupu Faavae ma Feagaiga 1:38). I le 2 Nofoaiga a Tupu i le Feagaiga Tuai, tatou te faitau ai, “Ina faatuatua ia ia Ieova lo outou Atua, ona faatumauina lea o outou; ia outou faatuatua i ana perofeta, ona outou manuia ai lea.” (2 Nofoaiga a Tupu 20:20).
O le i ai o perofeta soifua i o tatou aso o se faailoga o le alofa o le Atua i Ana fanau. Sa pa’i mai Elder Jeffrey R. Holland o le Korama a Aposetolo e Toasefululua i lo’u loto i se auala faapitoa lava i se taimi sa ou matua manaomia ai lava se faamafanafanaga. Ina ua uma ona ou mauaina lenei valaauga lofituina ina ia avea ma se aposetolo a le Alii o Iesu Keriso, o Elder Holland o le tagata muamua lea na valaau mai ia te a’u. Sa vave ona ou iloaina lona leo manino ma mamana i le isi itu o le laina ma lagonaina lona alofa ma le alofa o le Atua mo a’u. Sa ou iloaina le siufofoga o Elder Holland o le siufofoga o se tasi o auauna a le Faaola, ma na tuuina mai ai ia te a’u le mafanafana tele ma le talitonuga i se taimi lofituina.
O le mea lena e faia e perofeta ma aposetolo. E le manaomia ona e maua se valaau patino mai se tasi o perofeta a le Alii e lagona ai le alofa o le Atua mo oe. E mafai ona e lagonaina le alofa o le Atua e ala i le na o le mulimuli i a latou aoaoga. Ou te valaaulia outou, a’u uo talavou e, ia malamalama ma iloa o latou leo ma mulimuli i a latou fautuaga musuia, lea o le a taitai atu ai outou i le malamalama ma le upumoni. Ua faauuina i latou e faaali mai le finagalo ma le loto o le Alii. O lo tatou saogalemu silisili o loo taoto lea i le mulimulitaia a’ia’i o le afioga a le Alii e tauala mai i Ana perofeta, ae maise lava le peresitene o loo i ai nei o le Ekalesia. Ou te folafola atu a outou savavali faatasi ma faalogo i perofeta ma aposetolo o aso e gata ai, o le a outou savavali atili faatasi ma Iesu.
O se mea mamalu moni lava na tupu i le talafaasolopito o tagata soifua lea na tupu i Peteleema i Iutaia o le soifua mai lea o lo tatou Faaola, o Iesu Keriso. O Lona soifua mai, soifuaga, ma le taulaga togiola na aumaia moni ai lava le malamalama ma le upumoni i le lalolagi. O Ia lava Ia na tautino mai:
“Faauta, o A’u o Iesu Keriso, o le na molimau i ai perofeta o le a sau i le lalolagi.
“Ma faauta, o A’u o le malamalama ma le ola o le lalolagi” (3 Nifae 11:10–11).
Ou te fiafia i le fautuaga a Paulo le Aposetolo na tuuina atu i le Au Paia i Tesalonia: “O tagata o le malamalama outou uma lava ma tagata o le ao: tatou te le o i le po ma le pouliuli” (1 Tesalonia 5:5). I le avea ai ma tagata o Le Ekalesia a Iesu Keriso o le Au Paia o Aso e Gata Ai, o outou o fanau o le malamalama! Ua ia te outou le malamalama o Keriso, faapea foi ma le malamalama taiala lea e oo mai e ala i le meaalofa o le Agaga Paia. Ia savavali pea i taimi uma i lena malamalama, lea o le a taitai atu ai outou i le upumoni ma mafai ai ona outou savavali faatasi ma Iesu Keriso.
A o tatou opogi le malamalama ma le upumoni a le Faaola, o le a mafai ona tatou mulimuli i Ona tulagaaao ma faalogo mo le leo o Ona aao faaseevaeina ma aoao pe faapefea ona savavali faatasi ma Ia. Ou te tatalo ina ia mafai e i tatou taitoatasi ona tautino atu ma le olioli tele, “O le a ou savali faatasi ma Iesu,” ona fai atu lea ma le mautinoa, “O le a savali o Ia faatasi ma a’u.”16 O le savavali faatasi ma Ia o le auala sili lea ona lelei e faimalaga ai.
Ou te molimau atu o loo soifua Iesu Keriso ma o loo tatala mai Lona alofa atoatoa ia i latou uma o e o mai ia te Ia. E latalata mai pea o Ia, e faatalitali mai ma le onosai mo i tatou pe a tatou vaivai i le ala ma savavali faatasi ma i tatou e faavavau i soo se mea tatou te i ai.
Mai se faigalotu a le Iunivesite o Polika Iaga na faia i le aso 12 o Tes. 2022.