I le Aso Lulu, Valaau o Ia ia Oscar

Saunia e Richard M. Romney

E ui i le feagai ai ma aafiaga o le matua ma le kanesa, ua maua e Ken se auala anoa e auauna atu ai i ona tuaoi.

Ua aumai e Uso Williams i totonu ni apa lapisi mo le 28 o ona tuaoi. “E tatau ona tatou mulimuli i le faataitaiga a le Faaola ma faia mea lelei i tagata,” o lana tala lea.

O Aso Lulu uma lava, e ofu ai e Ken Williams e 81 tausaga le matua le ofutino ma le pulou lava e tasi. O le ofutino ma le pulou o loo faaalia ai se tagata lauiloa, o Oscar, e nofo i se apa lapisi. O Oscar lena ua lauiloa o se tagata tomumu alofagia. O Ken ua lauiloa o se tagata alofagia.

E faatalitali Ken i totonu o lona faitotoa pito i luma ma faalogo. O loo faatalitali o ia mo le pa’ō o le loli lapisi. E tāua pa’ō ia Ken ona e fai si ona tauaso. Faatasi ai ma le mea moni e faapea ua 14 tausaga o fai ona togafitiga o le kimo, ae o loo naunau pea o ia e alu atu ma fesoasoani i ona tuaoi—o le mea moni e 28 i latou.

O Ken e lauiloa ma le alofa e ona tuaoi uma i luga ma lalo o le auala. O ia o le tagata na te aumaia i totonu o kalone lapisi.

Pe a Te’a Atu le Loli

“Matou te vaai ua pasi atu le loli lapisi,” o le tala lea a se tuaoi, o Laura Willes, “ma o le isi mea matou te vaai i ai o Ken, ua savali i le auala savali ma lona tootoo paepae, ua alu atu mai lea fale i lea fale e toso atu a latou kalone.”

“E faatumauina ai le foliga manaia o le matou nuu,” o le tala lea a le faletua o Ken, o De Ann. “Ae e faatumauina ai foi le kilia o auala. Ou te lē iloa pe mafai ona alu se loli fuimu i le matou auala e aunoa ma le taso’aeseina o kalone uma mai le auala.”

Fai mai Laura o le siakiina o kalone lapisi e Ken e mafai foi ona maua ai le faamautinoaga i tagata o e tatau ona o ese mai o latou fale, “ina ia lē iloagofie ai pe a leai se tasi e i ai i le fale.”

E faapefea la ona feaveai e Ken ia kalone lapisi ae o loo savali ma se tootoo? “O le tootoo e matele lava e mo le tu mausali nai lo se isi lava mea,” na ia fai mai ai, “ma a ou faalagolago i le kalone lapisi, ou te maua ai foi le mausali.” Faatasi ai ma le fesoasoani a se vaaiga faapitoa, e mafai ai ona ia iloa lelei mai le mata e tasi e sue ai lona ala. Pe a i ai le kiona i luga o le palapala, e lē alu o ia i le mea e ono see ma pa’ū ai.

“Afai e i ai se aso e lē mafai ai ona ia aumaia i totonu kalone,” o le tala lea a De Ann, “Ou te logoina tuaoi.”

Ata

tane ma le ava

O Se Matafaioi Tuputupu A’e

E lei amata faapea Ken i le faia o apa uma i luga ma lalo o le auala. O se matafaioi na ia tuputupu a’e ai. “A aluese atu le loli lapisi, ona alu loa lea i fafo i fale o loo siomia i matou ma toe tulei ese apa mai le auala,” o le faamalamalama mai lea a De Ann. “Na faasolosolo lemu lava. Sa ia faia se fale faaopoopo ona toe faaopoopo foi lea o le isi tasi, seia oo ina taunuu i le mea ua i ai nei.”

Ae ā le igoa tauvalaau o Oscar? “O lena mea na sau mai le ma tama teine, o Collette,” o le tala lea a De Ann. “Ma na tumau ai pea.”

Ua faia e Ken ni faauoga ma ni tagata ua leva ona nonofo ma tagata fou e malaga mai, faatasi ai ma mātua matutua, fanau, ma fanau a fanau. “E mālie ona o le toatele o tagata e iloa o ia i a Oscar,” o le tala lea a Laura.

“Avea Lava ma Ken”

Aisea e faatino soo ai e Ken lenei faatinoga laitiiti o le auauna atu? E loloto lana tali. “E tatau ona tatou mulimuli i le faataitaiga a le Faaola ma faia mea lelei i tagata. O le mea lena ou te taumafai e fai. E faailoa atu ai ia i latou ua latou maua le avanoa e faia ai mea lelei i isi foi tagata.”

O le mea moni, sa faaalu e Ken se olaga atoa e fesoasoani ai i isi. I le avea ai ma se faufautua i le pisinisi tau taavale, sa ia galue ai i pisinisi faatau e faaleleia a latou faatautaiga. I le avea ai ma se tagata o le Ekalesia, ua ia taliaina valaauga ma faasoa atu le talalelei, “e lē ala i le talai atu i o’u tuaoi ae e ala i le faaali atu ia i latou o le olioli lea e sau mai le mulimuli i le Faaola.”

Na ta’ua e De Ann, “Ina ua i ai Ken i le kimo, sa ta’u mai e tausimai ma se tasi o fomai ia te a’u sa ia fesoasoani i le tele o isi tagata mamai ia onosaia o latou kimo, o le toatele lava ona o ona uiga faaalia. Na te le’i iloaina sa ia faia se mea faapitoa; sa ola lava o ia o Ken.”

O loo feagai pea Ken ma ituaiga e fa o le kanesa, ae ua fa tausaga talu ai na lē toe faia ai ana kimo. “Fai mai le fomai o le kanesa o Ken o se vavega savali,” o le tala lea a De Ann.

O Aso Lulu uma lava, o le a e vaai ai ia te ia i lona ofu o Oscar, ma faatalitali mo le pasi atu o le loli ina ia mafai ona ia fesoasoani i ona tuaoi. “Ou te lei filifili e alu ma aumai i totonu o apa lapisi,” o le tala lea a Ken. “Sa ou filifili o se tasi lea o nai mea itiiti e mafai lava ona ou faia. Ma afai lava e mafai ona ou auauna atu i o’u tuaoi, o le a faaauau pea ona ou auauna atu.”

E alala le tusitala i Iuta, ISA.