Mauaina o Faaaliga—Savali Lata Mai Nei mai Perofeta, Aposetolo, ma Isi Taitai o le Ekalesia

Iuni 2023

E Na’o Tusiga Faatekinolosi

Mauaina o Faaaliga—Savali Lata Mai Nei mai Perofeta, Aposetolo, ma Isi Taitai o le Ekalesia

Tagai i mea na aoao mai talu ai nei e perofeta soifua i luga o ala o faasalalauga faaagafesootai e uiga i faaaliga.

Ata

O Iesu Keriso o loo tootuli ma tepa a’e i luga

O Iesu o loo Tootuli i le Tatalo ma le Mafaufau Loloto, saunia e Michael Jarvis Nelson

Na aoao mai Peresitene Russell M. Nelson, “I aso a sau, o le a le mafai ona ola ai faaleagaga e aunoa ma le taiala, taitaiga, faamafanafanaga, ma le uunaiga faifaipea a le Agaga Paia.

O’u uso e ma tuafafine pele, ou te aioi atu ia te outou ia faateleina lo outou gafatia faaleagaga e maua ai faaaliga. … Filifili e fai le galuega faaleagaga e manaomiaina e olioli ai i le meaalofa o le Agaga Paia ma faalogo soo atu ma le manino atili i le siufofoga o le Agaga.”¹ E faapefea ona tatou faia lena mea?

Ua tuuina mai e perofeta, aposetolo, ma isi taitai o le Ekalesia le tele o valaaulia ma aoaoga i konafesi aoao e fesoasoani tatou te aoao ai ia maua ma faatino faaaliga. Na latou faasoa mai foi ni savali e uiga i lenei autu i luga o ala o faasalalauga faaleagafesootai, e aofia ai mea nei:

Ua Faaauau Pea Faaaliga

“Ou te fia faasoa atu nisi o mea ua ou aoaoina e uiga i le Perofeta o Iosefa Samita.

O le faatusatusaina o lona talavou sa faaululolo’u i lana galuega faaperofeta. Sa 14 ona tausaga i le taimi o le Uluai Faaaliga, 21 i le taimi sa ia maua ai papatusi auro, ma sa na’o le 23 i le taimi na uma ai ona ia faaliliuina le Tusi a Mamona (e itiiti ifo ma le 60 aso galue). E sili atu ma le afa o faaaliga o loo i totonu o la tatou Mataupu Faavae ma Feagaiga na tuuina mai e ala i lenei perofeta ina o 25 ona tausaga po o le laitiiti ifo foi. Sa 26 ona tausaga i le taimi na faatulagaina ai le uluai Au Peresitene Sili, ae na sili teisi atu ma le 33 i le taimi sa faasaoina ai mai le faafalepuipuina i Misiuri ma toe faaauau ai le taitaiga o le Au Paia. Sa na’o le tolusefulu-valu ma le afa ona tausaga i le taimi na tagatavaleina ai o ia.

“O le ki i le tulaga ese o le savali a Iosefa Samita ma le Toefuataiga, o faaaliga. O faaaliga o le faavae autu o la tatou aoaoga faavae ma le taitaiga o le Ekalesia. Na tautino mai Iosefa Samita, ‘O Le Ekalesia a Iesu Keriso o le Au Paia o Aso e Gata Ai na faavaeina i luga o faaaliga tuusao, e pei lava ona sa i ai le Ekalesia moni a le Atua’ (Aoaoga a Peresitene o le Ekalesia: Iosefa Samita [2007], 195).

“I o tatou aso, o loo faaauau pea ona taiala e faaaliga le Ekalesia. E faapena foi, e mafai e i tatou taitoatasi ona maua faaaliga mo o tatou lava olaga. Tau ina ia tatou faaaogaina taitoatasi le meaalofa o faaaliga faaletagata lava ia i o tatou olaga ma saili moni ia #FaalogoIaTeIa (#HearHim).”

Peresitene Dallin H. Oaks, Facebook, Mat. 24, 2020, facebook.com/dallin.h.oaks.

Iloa Matafaioi a le Agaga Paia

“Pe a ou toe mafaufau i tua a o avea a’u ma se talavou matua, o se tasi o mea e oo mai i lo’u mafaufau o le taimi a o avea a’u ma se faifeautalai i Egelani. Faatoa uma lava le Taua Lona Lua a le Lalolagi, ma faatoa toe faatulagaina ai le Ekalesia a Iesu Keriso iina. Sa ou nafa ma le avea ma se taitai i la’u misiona, ae sa na o le 20 o’u tausaga! Ou te tautino atu i le avea ai ma faifeautalai, sa i ai sina matou faatamala laititi i lena vaitau.

“I se tasi aso sa valaaulia ai a’u e se alii ou te alu atu i se fonotaga a le sosaiete mo le finauina o manatu ma fai ma sui o la tatou Ekalesia. Sa ou malie e auai, ae sa matua ou le iloa po o le a le mea lea o le a tupu! Sa ou i ai i le tulaga o le faamalamalama atu o le Ekalesia i se vaega toatele o tagata ma taliina a latou fesili. O le taimi lena na oo mai ai ia te a’u lo’u iloaina mo le taimi muamua le mana o le Agaga Paia. Sa ou aoao atu e uiga i le Agaga Paia, ma sa ou faitau i ai, ae i le taimi lea sa ou oo i ai.

“A o fesiligia ia fesili, sa ou maua le tali i lo’u mafaufau a o lei uma ona latou faia le fesili. Sa ou maua le tomai e agai atu ai i tusitusiga paia i se auala ou te lei oo muamua lava i ai. Sa foliga mai ia te a’u o itulau sa susueina e se isi tagata a o ou puipuia le Ekalesia.

“A o ou toe mafaufau i lena aafiaga i le 73 tausaga ua mavae, ua ou iloa ai sa ou aoaoina se mea na faamanuiaina ai a’u i nei tausaga uma. Sa oo ina ou iloa mo a’u lava ia o le Agaga Paia o le Fesoasoani moni ma e ala mai i le mana o le Atua, Na te aumaia i o tatou mafaufau afioga a le Alii.

“Ou te faamoemoe o loo faapea foi ni ou aafiaga o se talavou matua. Ia tumau pea i au suesuega o tusitusiga paia, ma fai au tatalo i aso uma. Amata lou aso i se tatalo, faauma lou aso i se tatalo, ma talanoa i le Alii pe a manaomia ai i le aso atoa. Po o a lava ou tulaga, ou te faamoemoe o le a e maua lea lava aafiaga e tasi na ou maua faatasi ma le Agaga Paia i lou matua.”

Peresitene M. Russell Ballard, Facebook, Ape. 14, 2021, facebook.com/mrussell.ballard.

Ia Maua Ni Taimi To’a ma Filemu

“Mo a’u lava ia, o le mauaina o faaaliga e oo mai pe a ou maua ni taimi to’a ma le filemu. E le mafai ona e fesootai ma le lagi i se gasu tele o le gaogaosa. E tatau ona e sailiina na taimi filemu i lou olaga ia e mafai ona e mafaufau loloto ai i mea a le Agaga. I lo’u aafiaga, pe a ou i ai i lena tulaga ma taumafai ia filemu, o le taimi lena ou te maua ai ni uunaiga. O le taimi lena ou te maua ai se manatu ou te iloa e mai le lagi.

“Ou te popole tele mo fanau a la’u fanau ma fanau a fanau a la’u fanau—o le mea moni, o tupulaga talavou uma lava—i le lalolagi i aso nei. Ou te popole ua pueina i latou e faasalalauga faaagafesootai, tesi, imeli, ma isi mea faalavefau. E ui o se faamanuiaga le tekinolosi i o tatou olaga, ae e mafai foi ona avea o se faalavefau e tuuina se papupuni i lo tatou va ma le gafatia e faalogo i le siufofoga o le Alii. Ou te ta’u atu i fanau a la’u fanau e tatau ona latou tuu ese se taimi filemu i aso taitasi e mafaufau ai i o latou olaga ma manatunatu i mea e finagalo le Alii latou te fai. Ou te faamalosiau atu ia te outou ia outou faia foi lena mea.”

Peresitene M. Russell Ballard, Facebook, Auk. 9, 2020, facebook.com/mrussell.ballard.

Talanoa ma Lou Tama Faalelagi

I taimi eseese i le soifuaga o le Faaola, sa Ia faaaogaina ai avanoa e tuua toatasi ai e mafaufau loloto ma tatalo. Ou te valaaulia outou ia faaalu sina taimi i nai aso ia e sosoo ai ina ia tuua na o oe i se nofoaga filemu e talanoa ai ma lou Tama Faalelagi. #FaalogoIateIa (#HearHim)

Peresitene M. Russell Ballard, Facebook, Mati 23, 2020, facebook.com/mrussell.ballard.

Ia i ai se Loto e Aoaoina Gofie

“Filifili e Lotomaualalo. Ia saili atu ma le lotofuatiaifo i le Alii ma faalagolago i Lana taitaiga. Ua sili atu ona tatou saunia e faalogo ia te Ia pe a i ai so tatou loto e aoaoina gofie.”

Elder Jeffrey R. Holland, Facebook, Nov. 3, 2022, facebook.com/jeffreyr.holland.

Fai Ni Faatinoga Laiti ma Faigofie o le Toefaaogatusaina

O le taimi o le iloiloina e le tagata o ia lava, o se avanoa e toe faaleleia ai faaleagaga. O se togalaau o manatunatuga lea e mafai ona tatou savavali faatasi ai ma le Alii ma a’oa’oina, faagaeetiaina, ma faamamāina ai i le afioga tusitusia ma faaalia mai e le Agaga a lo tatou Tama Faalelagi. O se taimi e paia pe a tatou manatua a tatou feagaiga paia e mulimuli i le Keriso agamalu, pe a tatou iloiloina lo tatou alualu i luma ma faaogatusa i tatou lava ma faailoga ala faaleagaga ua saunia e le Atua mo Ana fanau.

“Mafaufau i ai o sou lava ia toefuataiga i aso taitasi. I la tatou faigamalaga o ni tagata malaga i luga o le ala o le mamalu, ua tatou iloa le faigofie tele ona pa’ū’ū ese atu. Ae e pei lava ina mafai e nai sasi laiti lava ona tata’i ese atu i tatou mai le Ala o le Faaola, e faapena foi ona mafai e ni nai faatinoga iti ma le faigofie o le toefaaogatusaina ona taitai mautinoa mai i tatou e toefoi mai i totonu. A oo ina tolotolo mai le pogisa i totonu o o tatou olaga, e pei ona tupu soo, o lo tatou toefuataiga i aso taitasi e tatala atu ai o tatou loto i le malamalama faalelagi, lea e faamalamalamaina ai o tatou agaga, ma tuliesea ai le pogisa, fefe, ma masalosaloga.”

Elder Dieter F. Uchtdorf, Facebook, Mati 11, 2022, facebook.com/dieterf.uchtdorf.

Vaai atu i le Faaola

“A o outou sailia musumusuga ina ia maua le poto tou te manaomia i o outou olaga, ou te valaaulia outou ia vaai atu i le Faaola. O se tasi o auala sili ona lelei e o mai ai ia Keriso o le faitau lea o le Tusi a Mamona—mai le amataga e oo i le iuga—ma faailoa mai uiga faaalia ma uiga o Iesu Keriso o loo maua ai i totonu. A o e faia lenei mea ma le manatu moni i ai ma le faamaoni o le loto, e mafai ona e faalogo i Lona siufofoga. E mafai ona e iloa o Ia i se auala ofoofogia tele.”

Elder David A. Bednar, Facebook, Sep. 12, 2021, facebook.com/davida.bednar.

Faamamalu a Tatou Feagaiga

“A tatou faamamaluina a tatou feagaiga ma tausia poloaiga a le Atua, e faamanuiaina i tatou i le i ai o le mafutaga a le Agaga Paia. …

“Ua tatou ola i se vaitau o le tisipenisione o le atoaga o taimi tatou te maua ai faamanuiaga ofoofogia, o se tasi o na faamanuiaga o le mafutaga faifai pea ma le Agaga Paia. Faatasi ai ma faigata uma, faatasi ai ma le vāvao uma, e mafai e i tatou taitoatasi ona faamanuiaina e aoao mo i tatou lava mea e sili ona taua ma fesoasoani ia i tatou e faatulaga mea e tatau ona faamuamua faaleagaga. Ou te matua faafetai lava mo le Agaga Paia o se faiaoga—o le faiaoga—ma le auala e fesoasoani ai o Ia ia i tatou taitoatasi i le tele o auala.”

Elder David A. Bednar, Facebook, Auk. 14, 2021, facebook.com/davida.bednar.

Talitonu o le a Ia Tali Mai i Lana Ala ma Lona Taimi

“O fesootaiga mai lo tatou Tama oi le Lagi e oo mai i auala eseese i taimi eseese. E le tasi se ituaiga o faaaliga po o musumusuga. E faaaoga e le Atua se eseesega tele o auala e aapa mai ai ia i tatou, po o le a lava le mea Na te finagalo e sili ona lelei. Ma e aoga uma lava.

“E tatau ona tatou talitonu o le a tali mai o Ia i Lana ala ma le taimi. A tatou filiga i le tausiga o Ana poloaiga ma maua le faatuatua o le a Ia tali mai, e mafai ona tatou lagonaina o Ia.”

Elder D. Todd Christofferson, Facebook, Me 6, 2021, facebook.com/dtodd.christofferson.

Ia Agavaa e Lagonaina

“Ia agavaa e lagonaina le leo filemu, itiiti a o fetalai mai ia te oe ma liliu atu oe agai i le mea sa’o. A o e faalogo, a o e agavaa ma maua le taitaiga a le Agaga Paia, o le a faatumauina ai lou saogalemu, taiala oe i le ala e tatau ona e alu ai, ma aumaia le filemu i lou olaga.”

Elder Neil L. Andersen, Iulai 20, 2022, facebook.com/neill.andersen.

Ole Atu i le Tama Faalelagi e Taialaina Oe

“I masina po o tausaga a sau, atonu e i ai ni ou luitau. Atonu o loo i ai ni atugaluga e uiga i tagata o le aiga po o faafitauli tautupe. O le a e mafaufau po o le a le mea e fai. Ou te uunaia oe e te ole atu i lou Tama Faalelagi i le tatalo. Ia manatua i taimi uma e mafai ona e talanoa atu i lou Tama Faalelagi.

“Ole atu ia te Ia e taiala oe i le tele o faaiuga e tatau ona e faia. E tusa ai ma le malosi o lau molimau patino, e mafai ona tuputupu ae pea ma malosi tele atu. Ou te molimau atu ia te outou e faafofogaina e Tama Faalelagi a outou tatalo ma o le a tali mai ia te outou. O nisi taimi i taimi e sili ona faafuasei, o le faaaliga e te manaomia o le a oo mai.”

Elder Neil L. Andersen, Iulai 6, 2022, facebook.com/neill.andersen.

Faalogo ma Usitai i Uunaiga

“O se tasi o vaega sili ona lelei o le 2020 mo a’u o le avanoa lea e taulai atili atu ai i lo tatou Faaola, o Iesu Keriso, ma mafaufau i auala ou te #FaalogoIaTeIa (#HearHim). I se faigalotu talu ai nei, sa ou valaaulia ai le autalavou matutua e auina mai ni manatu faaalia e uiga i le ala latou te faalogo ai i le siufofoga o le Alii. Sa ou maofa i le tele o manatu faaalia sa matou toe mauaina. Atonu o nisi o a latou tali o le a ootia ai oe a o e mafaufau pe faapefea ona e faalogo ia te Ia i lou olaga:

Ou te faalogo ia te Ia pe a ou tatalo ma le faamaoni. E oo mai Lona siufofoga ia te a’u e ala i mafaufauga mamā ma le filemu.
Ou te lagonaina le Agaga e ala i le manino o le mafaufau, e ala i mafaufauga na faafuasei lava ona sa’o le faatulagaina ae sa fenumiai muamua.
Ou te faalogo ia te Ia e ala i le matagofie o le natura ma le mana o musika faagaeetia.
Ou te faalogo ia te Ia e ala i le filemu e fetalai mai ai o Ia i lo’u mafaufau ma le talitonuga na Ia tuuina mai ia te a’u pe a ou tatalo mo se fesoasoani.
Ou te lagonaina o Ia a o ou fegalegaleai ma i latou o siomia a’u. A o ou auauna atu ma maua le auaunaga, ou te maua sina vaaiga o Ia.

“Ou te fia faamautinoa atu ia te outou e mafai e i tatou taitoatasi ona lagonaina o Ia e ala i le faalogo ma usitai i uunaiga a le Agaga Paia. Ua le mafaitaulia taimi ua ou vaai ai i lenei mea i lo’u olaga.”

Elder Gary E. Stevenson, Facebook, Nov. 15, 2020, facebook.com/stevenson.gary.e.

Iloa pe Faapefea ona Fetalai Mai le Alii ia te Oe

“Ua valaaulia soo e Peresitene Russell M. Nelson i tatou e aoao e faalogo i le siufofoga o le Alii. E taua tele mo i tatou taitoatasi le iloa o le ala e fetalai mai ai le Alii ia i tatou i tulaga e patino lava ia i tatou ma taitoatasi. Pe e ala i le faanatinati o le oso ae o lagona fiafia, se lagona mafanafana lagolelei, po o ni mafaufauga manino e talafeagai lelei, o le a Ia fetalai atu ia te oe i se ala o le a e malamalama ai.”

Tuafafine Amy A. Wright, Ian. 3, 2023, facebook.com/Primary1stCounselor.