“Vavega o le Alofa Mutimutivale,” Liahona, Iuni 2023.
O Vavega a Iesu
Mataio 26:50–54; Mareko 14:46–47; Luka 22:49–51; Ioane 18:3–11
Vavega o le Alofa Mutimutivale
Na ofoina atu e Iesu le faamalologa ia Maliko ma Lona soo taua o Peteru.
Suffer Ye Thus Far, saunia e Walter Rane, e lē mafai ona kopiina
Pe na e mauaina ea se meaalofa mai lo tatou Tama Faalelagi e fetaui lelei ma ou manaoga e te le’i ole atu ai pe tatau ai [ona e maua]? O le mea lea na maua e Maliko, le auauna a le faitaulaga sili, ina ua alu atu o ia e pue faapagota le Faaola.
Pe na e manaomia se fesoasoani e lipea ai le pa’ū mai se gaoioiga soonafai po o ni upu faatiga, e tusa lava pe sa lelei ou faamoemoega? O se meaalofa lenei na maua e Peteru ina ua ia taumafai e puipui le Faaola i se tulaga faigata.
I le ogatotonu o se tasi o taimi sili ona taua o le galuega a le Faaola i le olaga nei, ina ua faalagolago le ata o le faaolataga mo fanau uma a le Atua i le mea na sosoo ai, sa faaalu e le Faaola le taimi e faasafua atu ai le alofa mutimutivale i nei tagata e toalua.
O le a se mea e mafai ona tatou aoao mai le vavega na maua e Maliko ina ua faamaloloina o ia e le Toatasi na auina atu o ia e pue faapagotaina? Ma o le a se mea e mafai ona tatou aoao mai le aafiaga o Peteru i lenei vavega e le’i mafaufauina?
O Se Vavega e Le‘i Mafaufauina
Ina ua mavae Lona puapuagatia tele i le Faatoaga o Ketesemane (tagai 2 Nifae 9:21; Mosaea 3:7), na fagua e Iesu Ona soo ma sa vave ona oo atu i ai se vaega faatupu faalavelave o leoleo faaauupegaina o le malumalu ma fitafita Roma.1 Sa i ai faatasi ma i latou ia Iuta ma se auauna a le faitaulaga sili. A o latalata atu le motu o tagata i le pogisa o le po, sa faailoa e Iuta ia Iesu i se sogi i le alafau, lea na tali atu ai le Faaola, “Iuta e, e te faalataina ea le Atalii o le tagata ma le sogi?” (Luka 22:48).
A o faatuai le au faatupu faalavelave, sa fesili atu Iesu ia i latou, “O ai ea tou te saili na?”
Sa latou tali mai, “O Iesu le Nasareta.”
“O au lenei,” o Lana tali lea, ma o Ioane, o lē sa i ai iina, ua tusia o Lana tali, sa “tuumuli ai lea o i latou, ua pauu foi i le eleele.” O le mamalu o le Faaola, e oo lava ina ua mavae Lona puapuagatia tele, sa lagonaina i se auala mamana. Ina ua uma ona toe fesili atu ia i latou po o ai na latou sailia, sa toe fetalai atu Iesu, “Ua uma ona ou fai atu ia te outou, o a’u lenei.” Ona, ia puipuia Ona soo, na fetalai atu ai Iesu, “O lenei, afai tou te saili mai ia te au, tuu pea ia i latou nei, ia latou o” (Ioane 18:4–8).
Peitai, sa i ai ni isi manatu o Peteru. I le faamoemoe ai e puipui le Faaola, sa ia seiina lana pelu ma sasau atu ia Maliko, le auauna a le faitaulaga sili, ma tipi ese lona taliga (tagai Ioane 18:10).
Ae na faafilemu e Iesu le tulaga vavao. O le taofia ai o Peteru, sa Ia fetalai atu: “Ia toe sulu ia o lau pelu i lona faamoega: aua o i latou uma o e tago i le pelu e oti i latou i le pelu.
“Fa te oe ea ou te le mafaia ona aioi atu nei i lo’u Tama, ona aauina mai ai lea e ia ia te au o agelu e sili ona toatele i lekeona e sefulu ma le lua?
“Ona faapefea lea ona taunuu o tusi, e tatau ona oo ia mea?” (Mataio 26:52–54).
O tala taitasi o loo tusia ai faapea na tuuina atu e Iesu o Ia lava ae sosola Ona soo. Peitai, na lipoti muamua mai e Luka e faapea, “ona tago ai lea o [Iesu ma le alofa mutimutivale] i [le] taliga [o Maliko], ua faamalolo ia te ia” (Luka 22:51).
Tuuina Atu o le Alofa Mutimutivale ia Maliko
Oka se agamalu na faaalia e Iesu a o taulimaina o Ia o se tagata solitulafono! Sa ta’ua e Elder David A. Bednar o le Korama a Aposetolo e Toasefululua e faapea, sa “aapa atu Iesu ma faamanuia i lē na pueina o Ia e faaaoga ai le mana faalelagi lava e tasi lea semanu e mafai ona taofia ai o Ia mai le pueina ma le faasatauroina.”2
E ui lava i le lautele o le misiona a le Faaola, e le’i aveesea lava lana vaaiga i le misiona. E ui ina itiiti se mea ua tatou iloa e uiga ia Maliko, ae sa iloa o ia e Iesu.
Pe na ootia Maliko i le pa’i atu o le Faaola? Pe na aumaia lona loto i le Faaola e ala i lenei faaaliga o le alofa mutimutivale agamalu? Tatou te lē iloa. Ae po o a lava ana filifiliga patino sa i ai, i le faamaloloina o lona taliga, sa ofoina atu ia te ia se meaalofa na te le’i talosagaina. O lenei vavega mulimuli o le faamalologa i le olaga nei o se faatinoga o le alofa mutimutivale i le vaega a le Faaola, o se isi avanoa e faaali atu ai le mana faavavega ma le alofa o Lona Tama.
E alofa Iesu i fanau taitasi a Lona Tama ma se alofa e lē i’u. I mea uma e faia e le Faaola, o loo Ia taumafai e aumai agaga ia te Ia lava, ia aumaia i latou i le salamo ina ia mafai ai ona faaolaina i latou (tagai 2 Nifae 26:24).
Pe na e oo i se suiga o le loto ina ua uma ona e mauaina se faamanuiaga e le’i mafaufauina? Pe ua faapupulaina ea o outou mata e vaai i “alavai o le alofa mutimutivale, e le muta lava, [lea] e valaau atu mo ni pese o viiga e sili ona leotetele”?3
Alofa Mutimutivale lea na Puipuia Peteru
Ae a Peteru? Sa silafia e Iesu e tatau ona aveina o Ia ina ia puapuagatia ma maliu ina ia mafai ai e i tatou ona toe foi atu i le Atua e ala i le salamo ma le Toetu. O Lana misiona lenei. Ae sa Ia manaomia foi Ona soo ia feola mo Ia e faataunuu la latou misiona o le talaiga o le talalelei ma le faatuina o le Ekalesia.
O malosiaga pogisa sa potopoto faataamilo i le Faaola atonu sa matua’i taufaafefe lava mo le Au Aposetolo. Sa minoi ma le lē faautatua Peteru, ma aumai se pelu e tasi i luma o le toatele e puipui ai lona Matai; peitai, sa faamalolo e le Alii le manu’a lea na āfua mai ia Peteru. Tatou te lē iloa pe o le faamalologa o Maliko na faasaoina ai Peteru mai taunuuga semanu e taofia ai o ia mai le faataunuuina o lana misiona. Ae oka se meaalofa ia Peteru!
Pe na e faia ea se tala po o se mea le faautatua pe faatiga, e oo lava i le puipuiga o le Faaola po o Lana Ekalesia? O le manatuaina o le aafiaga o Peteru e mafai ona tatou maua ai le lototele e saili ai e faia ni faaleleiga. E silasila le Faaola i a tatou taumafaiga lē atoatoa e ola i Lana talalelei ma puipuia Lona suafa, e tusa lava pe i o tatou vaivaiga, o na taumafaiga e ono mafua ai ona afaina e aunoa ma se faamoemoe.
Pe a tatou puipuia o tatou talitonuga i luga o ala o faasalalauga faaagafesootai pe faaletagata lava ia, e i ai taimi tatou te “soona-naunau tele” (Mosaea 9:3) po o le “[tuu] o mea silisili o i le tulafono” (Mataio 23:23), e aofia ai le alofa mutimutivale. Tatou te lē faaaogaina pelu, ae o upu e i ai se aafiaga mamana, o le mafai lea ona “taitai atu ai tagata ia latou faia le mea tonu” (Alema 31:5) pe faatiga ia i latou (tagai Iakopo 3:2). Atonu tatou te mauaina i tatou lava i le nofoaga lava e tasi e pei o Peteru, e faalagolago i le alofa mutimutivale o le Faaola e faamalolo ai manu’a na mafua ia i tatou ma fesoasoani ia i tatou e agai i luma, puipuia le faatuatua ma faasoa atu le talalelei i se “agaga o le agamalu” (Mataupu Faavae ma Feagaiga 100:7), sui ai se agaga o finauga (tagai Galuega 4:7–14; 5:40–42).
Alofa Mutimutivale i o Tatou Vaivaiga
E lē o manino pe na molimauina e se tagata o le au faatupu faalavelave le faamaloloina o le taliga o Maliko, ae atonu sa faaloaloa atu foi e le Faaola le alofa mutimutivale ia i latou, ma tuu atu ai ia i latou se avanoa faaiu se tasi e molimauina ai Lona mana ma salamo.
I o tatou lava taimi o vaivaiga, e tuuina mai ai e le Alii le alofa mutimutivale, ma mafai ai e i tatou ona faatoilalo luitau tatou te feagai.
Ia Tesema 2016, sa maua ai lo’u toalua i le nimonia. Sa matou nonofo i Moscow, Rusia, lea sa auauna atu ai Bruce i le Au Peresitene o le Eria i Europa Sasae. Na fai mai fomai o le a manaomia ona nofo o ia i le falemai mo ni nai aso ina ia maua ai mo vaitui. O lena po sa matuā leaga tele ai lona soifua maloloina, ma sa latou tuuina o ia i se koma.
Mo le isi 10 aso, sa ou ala ai i luga i taeao taitasi, ma aioi atu mo le fesoasoani a le Alii a o o’u alu atu i le fale faatali nofoaafi eletise, tietie mo le 45 minute i le nofoaafi eletise, ona ou savali atu lea i pitonuu na totoe i le falemai. Sa ou saofai i le aso atoa i autafa o Bruce i le iunite o gasegase tigaina a o ia taoto faasasao e lē minoi, o le lē mafai ona tautala pe minoi, na siomia soo se ituaiga masini faailo. O afiafi taitasi sa ou toe foi ai i la’u malaga, ma taunuu atu i le fale e tapena ā ma meatotino e sauniuni ai mo lo ma toe foi atu i Iuta.
E oo lava i le taimi nei, ou te manatua i na aso malulu ma pogisa, ou te le’i lagonaina lava le fefe a o o’u malaga i le nofoaafi eletise. Ou te manatua le filemu ma le toafimalie na ou lagonaina a o o’u saofai i autafa o le moega o Bruce i le falemai. I le fale i po taitasi, sa na o a’u ae sa lē tuuatoatasi a’u.
Peitai, e le’i leva ona ma toe foi mai i Iuta, ae maliu Bruce.
“Sa Ou Faia Lenei Mea mo Oe”
Talu ai nei, a o o’u manatuaina na aso uumi, sa fetalai manino mai le Alii i lo’u mafaufau, “Sa ou faia lenei mea mo oe.” I lena taimi, sa ta’u mai ai e le Alii ia te a’u o le filemu sa ou lagonaina, o le saogalemu na ou oo i ai, ma le lagona o le le’i tuua na o a’u na sau mai se Tama Faalelagi alofa ma Lona Alo. Sa Laua faaloaloa mai le alofa mutimutivale ia te a’u i o’u vaivaiga.4
O nisi taimi tatou te nofouta ai i Lona alofa mutimutivale, ma o isi taimi ua na o lo tatou faamalolosi lava i luma, ma le lē iloa o le fesoasoani faalelagi lea e mafai ai ona tatou agai i luma. Ae a o tatou tatalo ina ia pupula o tatou mata e vaai atu i le alofa mutimutivale ua tuuina mai e le Faaola ia i tatou, o le a saunia o tatou loto e faalautele atu le alofa mutimutivale ia i latou o e sopoia o tatou ala. Sa Ia fetalai mai, “O lenei, ia mutimuti vale lo outou alofa, pei ona alofa mutimuti vale o lo outou Tama” (Luka 6:36).
Pe tatou te maua lena alofa mutimutivale pe a tatou faia filifiliga amioletonu, e pei ona sa faia e Maliko; sa maua i se tulaga faavauvau, e pei foi o Peteru; pe tau lava o le tauivi e sili atu i mea tatou te gafatia, e pei ona sa ou i ai; e mafai ma o le a asiasi mai le Alii ia i tatou i Lona alofa mutimutivale.
A o tatou mafaufau i le faatinoga aupito silisili o le alofa mutimutivale—o le mafatiaga o lo tatou Faaola—e mafai ona tatou faalogo i Ana fetalaiga alofa ia i tatou: “Sa ou faia lenei mea mo outou.”