“Faamanuiaina i le Mana ma le Malosi,” Liahona, Iuni 2023.
O Leo o le Au Paia o Aso e Gata Ai
Faamanuiaina i le Mana ma le Malosi
Sa tetete lima o lo’u tamā a o ia faamanuiaina au i upu na suia ai lo’u olaga.
Ata na tusia e Dilleen Marsh
Ina ua ou foi mai i le fale mai la’u misiona e lua tausaga, o la’u sini na sosoo ai o le faaipoipo i le malumalu. Ae paga lea, sa amata ona ou sailia faafiafiaga lē lelei, gauai atu i faaosoosoga, ma tafaoga faamasani i fafo atu o le Ekalesia.
Na sosoo ai ma le lē fiafia, toe salamo, ma le faanoanoa, e aofia ai se tatalaga o le faaipoipoga. Sa i ai pea sa’u molimau ma sa ou moomoo e faaipoipo i le malumalu, ae sa ou lagonaina le lē agavaa mo nā faamanuiaga. Sa ou tanumia o’u lagona o le ta’usalaina ma saili le fiafia i amioga faalelalolagi.
Na i’u lava ina alia’e o’u lagona, ma sa faatigaina a’u i le tausalaina ona o a’u solitulafono. Sa ou faapa’ū ifo i o’u tulivae ma tagi atu i le Alii ma le tiga faale-Atua. Sa ou folafola atu mai lena taimi, o le a ou ola i le tulafono o le legavia.
Ae sa lē na ona pau lea o la’u tauiviga. Sa ou lofituina foi i le loloto o le vaisu o fualaau faasaina. I se tasi po, sa ou lagona ai ua faatumulia a’u i le fefe tele. Faatasi ai ma la’u telefoni feaveai i lo’u lima, sa ou sioa atu i le numera telefoni a lo’u tamā. E silia ma se itula na faato’ā ou maua ai le lototele e valaau atu ai ia te ia ma fesili atu pe mafai ona ou vaai ia te ia.
Ina ua uma se ma talanoaga umi e uiga i o’u tauiviga, sa tuuina mai e lo’u tamā ia te a’u se faamanuiaga faaleperisitua. Sa tetete ona lima a o ia saunoa ma le mana ma le talitonuga maumaututu. Sa ia fai mai sa galulue ma le lē faavaivai Satani ma ana agelu ia te a’u ona sa faamata’uina i latou e lo’u gafatia faaleagaga. Fai mai Tamā afai lava ou te i ai i le lalolagi, sa ou maua le avanoa e faatoilalo ai la’u vaisu. Sa Ia faamanuiaina a’u i le mana ma le malosi e faia ai.
Ina ua uma le faamanuiaga, sa ou opoina lo’u tamā ma lo’u tinā ma tagi masusu i le tauau o lo’u tamā. Sa ou lagonaina le tele naua o le alofa ma le lotofaafetai i lo’u loto. Sa tafiesea o’u lagona o le leai o se faamoemoe. Na mou ese atu foi ia faananauga faaletino o vaisu ma ao mamafa o le atuatuvale ma le lē atoatoa.
O le taimi lava lena, sa ou lagonaina ai se naunautaiga fou mo le olaga ma le avanoa mo le olioli pe afai ou te gauai atu i le finagalo o le Tama Faalelagi. Ou te molimau atu o le mana o le perisitua e mo’i ma moni!
I se taimi, sa faamanuiaina a’u e le Tama Faalelagi i se faaipoipoga i le malumalu, o se avā alofa o lē e malamalama i le mana o le Togiola a le Faaola, ma se fanau e toalua.
O le tu a’e mai le pu sa ou i ai i le mea ua ou i ai nei o se vavega moni lava. E ala i le salamo faamaoni ma le faatuatua ia Iesu Keriso, e mafai ai mea uma! O a’u o se faamaoniga ola o lena mea.