Le Auala na Faia ai se Eseesega i La’u Faaipoipoga i le Faamauina i le Malumalu

Saunia e Sarah Carlson

Ona o le faama’i pipisi, sa tatau ai ona ma faaipoipo faalemalo ma lo’u toalua nai lo i le malumalu.

Ata

potu o faamauga

Ina ua faia le faasilasilaga ua tapunia le tumau malumalu uma i le taimi o le faamai pipisi, ou te manatua lo’u valaauina o Keaton (la’u uo i lena taimi) ma talanoaina po o a isi a ma’ua laasaga e tatau ona fai. Sa tatau ona ma faaipoipo i le malumalu i ni nai vaiaso, ma sa ma le mautinoa pe tatau ona ma faatali seia toe tatalaina malumalu ina ia faaipoipo pe tatau ona ma faaipoipo faalemalo ona faamauina lea i se taimi mulimuli ane.

Ia te au lava ia, sa nutimomoia lo’u loto ona sa ou vaai faalemafaufau i taimi uma i le o la’u faaipoipoga i totonu o le malumalu ma ua mou ese atu lava lena avanoa. Sa ou fuafua foi e maua o’u faaeega paia i le vaiaso lava lea e tasi o le ma faaipoipoga, o lea na tatau ai ona ma faatalitali mo se taimi umi atu mo se faaeega paia ma se taimi faatulagaina o le faamauga pe a toe tatalaina malumalu. .

Mulimuli ane, i le mavae ai o le tele o tatalo ma talanoaga, sa ma filifili ai ma Keaton e faaipoipo faalemalo i le ma aso na uluai fuafuaina mo le malumalu. Ae sa ma naunau ina ia faamauina i le taimi lava e toe tatala ai malumalu.

Sauniuniga

A o ma faatalitali mo malumalu e toe tatala, sa ma faaaogaina lo ma taimi faatalitali e aoao atili ai e uiga i feagaiga o le a ma osia i le sauniga o le faamauga (ma i lo’u faaeega paia). Sa ma talanoa ma Keaton i lo ma epikopo e uiga i le aveina o se vasega o le malumalu, ma sa musuia o ia e fai atu ia Keaton e avea ma o’u faiaoga. Mai lea vaiaso i lea vaiaso, sa ma nonofo faatasi ai ma Keaton ma talanoaina le malumalu.

O se taimi matua faapitoa ma mamana i le ma mafutaga a o ma talanoaina folafolaga o le feagaiga o le a ma osia i le tasi ma le isi pe a faamauina i ma’ua.

I le ono masina talu ona uma le ma faaipoipoga faalemalo, sa ou maua ai lo’u faaeega paia ma sa faamauina ai i ma’ua ma Keaton. Sa siomia i ma’ua e aiga, ae e le pei o le aso na ma faaipoipo ai, ma te lei popole pe atuatuvale—sa ma fiafia lava! O le ma taulaiga atoa lava i le uiga o le faaipoipoga e faavavau—o feagaiga ia sa ma osia. Ioe, o faafiafiaga ma gaoioiga e masani ona faia i se aso o le faaipoipoga e ese le manaia ma le fiafia. Ae ou te faafetai mo le taimi na tatau ai ona ma saunia moni lava e osia feagaiga e le tasi ma le isi ma le Atua. Po o le a lava lou faaipoipo muamua faalemalo pe i le malumalu, ou te iloa o le saunia moni lava e osia feagaiga ma lou toalua ma o le faia o lena sauniga ma taulaiga o le aso o lau faaipoipoga o se tasi lea o olioliga silisili o le a e oo i ai.

O le taimi lava na ma tootutuli ai i le fatafaitaulaga ma faamauina ai, sa faatumulia o ma loto i se lagona lofituina o le lotofaafetai, alofa, ma le olioli. Sa vave ona ma lagonaina se eseesega loloto i le ma mafutaga.

E ui ina sa ma faaipoipo ma le fiafia mo le ono masina ua tuanai, ae sa ma talanoa ma Keaton i lena po e uiga i se paia faapitoa ua ma lagonaina nei i le ma faaipoipoga. Ua oo mai se lagona fou o le atoatoa ma le filemu i la ma’ua sootaga. O le Agaga i lo ma fale i lena po sa matuai malosi lava sa toetoe lava a mafai ona pa’i i ai. Sa ma lagonaina se tulaga fou o le alofa o le tasi i le isi ma mo le Faaola i o matou loto. Ma sa ma iloaina ona sa fusia faatasi i ma’ua lava i le tasi ma le isi ma lo ma Tama Faalelagi e ala i feagaiga e faavavau.

Manatunatu

E ala i o ma aafiaga, ua ma molimauina ai ma Keaton le taua o le fausiaina ma le faamalosia taitoatasi ma faatasi o la ma sootaga faatasi ma lo ma Faaola o Iesu Keriso ma lo ma Tama Faalelagi alofa. O le faamauina i totonu o le malumalu e mafai ai ona ma lagonaina atoatoa le mana e aumaia e le osia ma le tausia o feagaiga i totonu o le faaipoipoga—le auala e mafai moni ai ona suia lo ma alofa o le tasi mo le isi ma valaaulia le faamalologa, togiola, ma le alofa gafatia o le Faaola i totonu o la ma’ua sootaga.

Ou te faaleoina atu le valaaulia talu ai nei a Peresitene Russell M. Nelson, “Ana mafai ona ou talanoa taitoatasi ma talavou matutua uma, ou te aioi atu ia te oe ia saili se soa e mafai ona e faamau i ai i le malumalu. Atonu e te tomanatu po o le a le eseesega e mafai e lenei mea ona faia i lou olaga. Ou te folafola atu o le a faia ai le eseesega atoa lava! A e faaipoipo i le malumalu ma toe foi atu pea lava pea i ai, o le a faamalosia ma taialaina oe i au faai’uga.”¹

Ua ma oo ma Keaton i le “eseesega atoa” i o ma olaga lea na faamatalaina e Peresitene Nelson. Talu ai nei, sa ma faafeiloaia ai foi le ma tamaitiiti muamua, o se teineitiiti aulelei, o le sa tatalaina o ma loto ma mafaufau i le alofa o le Atua mo i ma’ua i se laasaga fou. O taimi uma lava ma te tilotilo atu ai i ona mata aulelei, e faamanatu mai ai ia i ma’ua faamanuiaga loloto o le malumalu ma aiga e faavavau. O ia o le ma tama e faavavau, ma o le a faamanuiaina ma’ua ma Keaton e faatasia e faavavau ona ua faamauina i ma’ua mo le olaga nei ma le faavavau atoa.

Ou te molimau atu o le faamauina i le malumalu e taua le ave i ai o mea uma ma o le a e vaaia le aao taiala o le Alii i le lua sootaga pe afai e faaauau pea ona e taulai atu i au feagaiga ma avea le malumalu o se faamuamua i lou olaga.