Ina Ia Tatou Manatua Pea o Ia

Saunia e Elder David A. Bednar

O Le Korama a Aposetolo e Toasefululua

Ou te molimau atu o le mana faapaiaina o le Agaga Paia e faamanuiaina ai i tatou a o tatou aai ma feinu ma le agavaa i le faamanatuga ma taumafai e ola i le talalelei a Iesu Keriso.

Ina ua uma ona faapotopoto le Faaola ma Aposetolo e Toasefululua mo la latou talisuaga mulimuli, sa fetalai atu Iesu ia i latou, “Ua tele lava lo’u manao e muai ’ai lenei paseka ma outou, a o lei oo i lo’u tiga” (Luka 22:15).

Faatasi ai ma le toasefulutasi o le Toasefululua, sa le’i pine ae tuua e Iesu le Faatoaga o Ketesemane ma tauave i Ona lava luga agasala a le lalolagi. Sa Ia onosa’ia foi se faamasinoga faatauemu ma sa faamalosia e amoina Lona satauro i Kolokota. Ae a o le’i puapuagatia tele o Ia i le faatoaga ma luga o le satauro, sa saunia e le Faaola Ona soo mo luitau ma faigata taitasi o le a i’u ina tauaveina e i latou taitoatasi.

“O loo latou aai, a e tago Iesu i le areto, ua faafetai, ona tofitofi ai lea, ma avatu i le au soo, ua faapea atu, Ina tago ia, ina aai; o lo’u tino lenei.

“Ua tago foi o ia i le ipu, ua faafetai, ona avatu ai lea e ia ia te i latou, ua faapea atu, ina inu ia outou uma i ai;

“Auā o lo’u toto lenei, o le toto o le feagaiga fou, ua faamaligiina mo tagata e toatele e faamagaloa’i agasala” (Mataio 26:26–28).

Ona Ia faamalamalama mai lea, i se tasi o Ana aoaoga faaiu i le olaga nei:

“E aoga ia te outou pe a au alu ese: aua afai ou te le alu ese, e le maliu mai le Fesoasoani ia te outou; ae afai ou te alu, ou te auina mai o ia ia te outou. …

“Ae a maliu mai o ia, le Agaga lea e tupu mai ai le upu moni, e taitai e ia ia te outou i upu moni uma; aua e le tautala fua ia na o ia, a o mea uma e faalogo i ai o ia, e tautala ai lava ma faailoa mai ia te outou mea e oo mai” (Ioane 16:7, 13).

“E maeu lea faamanuiaga!”

Ina ua uma le faamanatuga i le taimi o se semina lata mai nei a taitai o le misiona, sa saunoa ai Peresitene Russell M. Nelson, “Ua oo mai se manatu ia te a’u o lo’u osia o se feagaiga i le asō e sili atu ona taua nai lo le sāvali ua ou sauniaina. Ua ou osia se feagaiga a o o’u ai i le faamanatuga o le a ou loto e ave i o’u luga le suafa o Iesu Keriso ma ua ou loto e usitai i Ana poloaiga. E tele ina ou faalogo i faaupuga tatou te aai i le faamanatuga e faafou ai feagaiga na osia i le papatisoga. E ui e moni lena mea, ae e matuā sili atu i lo lena. Ua ou osia se feagaiga fou. Ua outou osia ni feagaiga fou. … O le taui la, … ua faia ai [e le Alii] le fetalaiga o le a tatou maua pea Lona Agaga e faatasi ma i tatou. E maeu lea faamanuiaga!”¹

I tatalo o le faamanatuga, o e umia le perisitua e ole atu i le Tama “ia faamanuia ma faapaiaina” le areto ma le vai, ina ia mafai ona tatou aai ma feinu “i le faamanatuina” o le tino ma le toto o Lona Alo. O i tatou taitoatasi e tautino atu ua tatou loto e ave i o tatou luga le suafa o le Alo. Tatou te galulue ma faamalosia lena molimau e ala i le manatua pea o Ia ma tausia Ana poloaiga. (Tagai i le Mataupu Faavae ma Feagaiga 20:77, 79.)

Mo soo o le Alii i aso e gata ai, o le sauniga o le faamanatuga e manaomia ai le tele o mea nai lo le auai faifai pea ma le masani ma le tuuto faasamasamanoa.

tagata o loo feinu i le vai o le faamanatuga

“Tatou te mafaufau loloto patino lava i le Togiola a Iesu Keriso,” na saunoa ai Peresitene Nelson. “Tatou te manatunatu i le tāua o Lona puapuagatia i Ketesemane ma Lona Faasatauroga i luga o Kalevaria. O le taimi lea, o i tatou taitoatasi ia ‘suesue ifo le tagata ia te ia’ (1 Korinito 11:28) ma manatunatu i feagaiga patino na osia ma le Alii. O le taimi lea, tatou te manatunatu loloto ai i mea paia a le Atua.”²

O faatinoga o le ‘ai ma inu i faatusa o le faamanatuga e lē magalo ai agasala. Ae a o tatou saunia ma le agaga tatalo ma le faamaoni ma ai ma inu ma le agavaa i le sauniga, tatou te iloiloina a tatou amioga ma manaoga o ō tatou loto ma opogi le valaaulia a le Alii ia salamo (tagai Mose 5:8). Pe a tatou ofoina atu le taulaga o loo Ia manaomia mai—o se loto momomo ma se agaga salamo (tagai 3 Nifae 9:20)—ua folafolaina mai ia i tatou e mafai ona tatou maua pea Lona Agaga e faatasi ma i tatou. Ma e ala i le mana faapaiaina o le Agaga Paia e fai ma ā tatou soa tumau, e mafai ai ona tatou faatumauina pea se faamagaloga o ā tatou agasala (tagai i le Moronae 6:4).

O lo tatou tiutetauave paia o le atiina ae lea o mausa paia e valaaulia ai le Agaga o le Alii e faatasi ma i tatou i taimi uma—o mausa e pei o le faamamaluina o feagaiga, usiusitai i poloaiga, salamo, faamagalo atu, suesue i tusitusiga paia, auauna atu, ma tapuai i le aiga, i le lotu, ma i le malumalu.

Sa faaalia e soo o le Faaola i le Tusi a Mamona se mausa faaopoopo paia: “Sa latou tatalo mo le mea na sili ona latou mananao i ai; ma sa latou mananao ia tuuina mai le Agaga Paia ia te i latou” (3 Nifae 19:9).

O Lo Tatou Malamalama, saunia e Dan Wilson

O le Ki i le Manatuaina

E pei o soo anamua, e mafai foi ona tatou tatalo faatauanau ma le faifai pea mo le Agaga Paia ma Ana faamanuiaga e fesootai i ai. Sa folafola mai e le Faaola: “A o le Fesoasoani o le Agaga Paia lea, … na te a’oa’o ia te outou i mea uma lava, e faamanatu mai foi o ia ia te outou i mea uma, ua ou fai atu ai ia te outou” (Ioane 14:26; ua faaopoopo le faamamafa).

O le mea taua, o le mafutaga a le Agaga Paia e fesoasoani ia i tatou e manatua ai pea Iesu Keriso—Lana taulaga, Lana talalelei, Ana folafolaga ia i tatou, Lona alofa mo i tatou, ma feagaiga e tauamo ai i tatou ia te, ma faatasi ma Ia.

Na aoao mai Peresitene Henry B. Eyring, Fesoasoani Lua i le Au Peresitene Sili, e faapea:

“O le ki i le manatuaina lea e aumaia ma faatumauina le molimau, o le mauaina lea o le Agaga Paia e avea ma soa. O le Agaga Paia lea e fesoasoani ia i tatou ia iloa mea o loo faia e le Atua mo i tatou. O le Agaga Paia lea e mafai ona fesoasoani ia i latou o loo tatou auauna i ai ia iloa mea o loo faia e le Atua mo i latou. …

“O le Agaga Paia lea e molimau mai o Iesu Keriso o le Alo Pele a se Tama Faalelagi o lē e alofa ia i tatou ma finagalo ia tatou maua le ola e faavavau faatasi ma Ia i ni aiga.”³

Ma o le Agaga Paia lea e fesoasoani ia i tatou ia fetaomi atu i luma faaleagaga i se lalolagi pogisa. I lenei vaitau o vairasi ma tui, o faama’i faaletino e lē na o le pau lea o lo tatou taufaamata’u.

“O faama’i faaleagaga o faama’i pipisi ua salalau solo i le lalolagi. E lē mafai ona tatou taofiofia i latou. Ae e mafai ona tatou puipuia o tatou talavou [ma i tatou lava] mai le lavevea ai,” na aoao mai ai Peresitene Boyd K. Packer (1924–2015), Peresitene o le Korama a Aposetolo e Toasefululua.

O le faateleina o le malamalama ma se molimau o le talalelei, faatasi ai ma le mafutaga a le Agaga Paia, sa ia faaopoopo mai ai, e pei o se tui lea e mafai ona puipuia [inoculate] ai i tatou mai le amioleaga ma le taufaasese.

“O lein [o lona uiga] ‘ia i ai i totonu’ ma le oculate o lona uiga ‘mata e vaai,’” o le saunoaga lea a Peresitene Packer. “Tatou te tuu se mata i totonu [o i tatou]—o le meaalofa e le mafaamatalaina o le Agaga Paia [tagai Mataupu Faavae ma Feagaiga 121:26].”⁴

O lena mata o le a taiala, faatonu, faamafanafana, ma puipuia i tatou. Mo le Au Paia o Aso e Gata Ai, o e ua mauaina le meaalofa o le Agaga Paia, o le taitaiga mai le Agaga e mafai ma e tatau ona faifai pea ae lē o se mea e seāseā tupu. O le folafolaga i le nuu o le feagaiga a le Alii, o le, ia tatou “maua pea lona Agaga e faatasi ma [i tatou]” (Mataupu Faavae ma Feagaiga 20:77; faaopoopo le faamamafa).

Faamanuiaga Folafolaina

O le manatuaina o mea ua faia e le Alii mo i tatou, auai i le sauniga o le faamanatuga, ma le maua pea o Lona Agaga e faatasi ma i tatou o ni faamanuiaga ofoofogia moni. Ou te molimau atu o faamanuiaga folafolaina o le a tafe mai i o tatou olaga a o tatou saunia mo ma aai ma feinu ma le agavaa i le faamanatuga i vaiaso taitasi ma faapea ona faamalosia ai la tatou sootaga faalefeagaiga ma le Faaola.