“E Mafai e le Agaga Paia ona Fesoasoani ia i Tatou Liahona, Iuni 2023.
O Mataupu Faavae Autu o le Talalelei
E Mafai e le Agaga Paia ona Fesoasoani ia i Tatou
O le Agaga Paia o le sui lona tolu o le Aiga Atua. E faasino foi tusitusiga paia ia te Ia o le Agaga, le Agaga Paia, po o le Faamafanafana. A o tatou aoao e faalogo i Lona siufofoga, o le a Ia molimau mai ia i tatou e uiga ia Iesu Keriso ma fesoasoani ia i tatou e aoao i upumoni o le talalelei.
Sui o le Aiga Atua
O le Tama Faalelagi, Iesu Keriso, ma le Agaga Paia, o le Aiga Atua. Latou te alolofa ia i tatou ma galulue i le lotogatasi e faataunuu le ata o le faaolataga. E ui e i ai i le Tama Faalelagi ma Iesu Keriso ia tino o aano ma ivi; o le Agaga Paia e leai. O Ia o se agaga.
Molimau o le Tama ma le Alo
O le Agaga Paia “e molimau i le Tama ma le Alo” (2 Nifae 31:18). O le uiga o lenei mea e mafai ona tatou maua se molimau e uiga i le Tama Faalelagi ma Iesu Keriso e ala i le Agaga Paia.
Molimau mai i le Upumoni
E molimau le Agaga Paia i upumoni uma. O le a Ia fesoasoani ia i tatou ia iloa o le talalelei—e aofia ai le ata o le faaolataga, poloaiga a le Atua, o le Toefuataiga, ma le Togiola a Iesu Keriso—e moni. O le a Ia faamalosia a tatou molimau a o faaauau pea ona tatou tatalo, tausi poloaiga, ma suesue i le talalelei.
Taiala ma Puipui i Tatou
O le Agaga Paia e mafai ona taialaina oe i au faaiuga ma puipuia oe mai lamatiaga faaletino ma faaleagaga. O le a Ia fesoasoani ia i tatou ia maua tali i a tatou fesili pe afai tatou te tatalo ma taumafai e fai le mea sao. O le a Ia taitai pea i tatou “e fai mea lelei” (Mataupu Faavae ma Feagaiga 11:12).
Faamafanafana i Tatou
O nisi taimi e ta’ua ai le Agaga Paia o “le Faamafanafana” (Ioane 14:26). E mafai ona Ia faatumuina i tatou “i le faamoemoe ma le alofa atoatoa” (Moronae 8:26) pe a tatou popole, faanoanoa, pe fefefe. A o Ia fesoasoani mai ia tatou lagona le alofa o le Atua, e mafai ona tatou faatoilaloina le lotovaivai ma faamalosia i o tatou tofotofoga.
O Le Meaalofa o le Agaga Paia
A uma ona papatisoina i tatou, tatou te maua le meaalofa o le Agaga Paia i se sauniga ua ta’ua o le faamauga. O le taimi lava tatou te maua ai lenei meaalofa, e mafai ona tatou maua le mafutaga faifai pea a le Agaga Paia pe afai lava tatou te ola amiotonu.
Ata na tusia e J. Kirk Richards
Auala Tatou te Faalogo ai i le Agaga Paia
E fesootai mai le Agaga Paia i tagata i ni auala eseese. O nei mea e mafai ona aofia ai ni lagona filemu ma faamafanafana po o ni malamalamaaga e uiga i mea e tautala atu ai pe faia. A o tatou tatalo mo le taitaiga ma faalogo mo Ana uunaiga, e mafai ona tatou aoao pe faapefea ona Ia fetalai mai ia i tatou.