E Na’o Tusiga Faatekinolosi
Puipuia i le taimi o se Papasolo
E alala le tusitala i Uosigitone, ISA.
Ina ua alu atu ma le le mafaufauina le ma taavale agai i le papuipui o le tofe, sa faamanuiaina a’u e le Agaga i se uunaiga e lei mafaufauina.
Sa matou asiasi atu i le Paka Faaleatunuu o Yellowstone faatasi ma lo’u afafine ma lona aiga, ma sa matou faaaluina le aso e matamata solo ai. Sa o se aso timuga, ae na matou le faatagaina e taofia ai i matou. Sa aveina e lo’u afafine le taavale mo le tele o lena aso, ae i le faaiuga o le po sa uunaia ai a’u e tatau ona ou aveina le taavale e toe foi atu ai i lo matou fale.
Sa lei manino mai ia te a’u le mafuaaga na manaomia ai ona ou aveina le taavale, ae ou te taumafai lava i taimi uma e mulimuli i uunaiga a le Agaga Paia pe a ou lagonaina faapenei. E pei ona aoao mai Iosefa Samita, “Ia faaeteete ma aua le liliuina ese le leo itiiti ma le filemu; o le a aoao ai [oe] i le mea e fai ma le mea e alu i ai.”1
Sa amata ona pogisa, ma sa oo ina matua mamafa mai timuga. E matua le iloa poo fea na sau ai, lea mea na oo mai i luma o la’u loli. Sa ou le mautinoa po o le a lena mea, ae sa matua latalata mai lava. Sa ou iloa o le a matou lavevea ai. Sa ou iloaina se fasi vaega o le mauga ua solo ese ma palasi mai i lo matou auala. I le vave na ou mafaia ai, sa ou taumafai ai e seu solo le taavale mai le oga papa tele, ae sa fai si latalata tele ma sa matou taia ai.
O le masau o le alu o le loli na uunaia i matou i luga o le papa, ma mafua ai ona sipa le loli ma alu ai i le na o le lua uili. Sa ou taumafai e taofi le loli, ae sa mau le vae penisini. Sa faaauau pea ona masau le matou o agai i luma, e pei o se roketi o loo lele atu i le auala i luga o uili e lua. I le taimi lava lena, na ou iloa ai sa matou agai atu i se papuipui i tafatafa o se tofē lea e oo atu ai i lalo i le Vaitafe o Yellowstone. Sa le mafai ona ou pulea le taavale, ma sa ou iloa le mea o loo i le isi itu o le papuipui pe afai matou te ova atu ai.
I lena taimi, sa ou faia ai se tatalo le leoa: “Tama, faamolemole fesoasoani mai ia te a’u e laveai lo’u aiga!” Na faafuasei lava, ona uunaia a’u e le Agaga Paia e tape le afi. O lena mea o le a manaomia ai ona ou aveesea le lima e tasi mai le uili foeuli, ae sa matua manaomia uma o’u lima e lua e pulea ai le loli. Sa ou mafaufau, “E le mafai ona ou aveesea o’u lima.” Sa ou lagonaina se musumusu faamafanafana mai i le Agaga Paia: “E le afaina. O le a Ou fesoasoani ia te oe. Tapē le afi!” Sa ou aapa atu mo le ki o le afi ma aveese le ki. Ina ua amata ona alu lemu le loli, sa mafai ona ou toe uliina ina ia matou tumau ai pea i luga o le auala.
Ou te iloa o le uunaiga a le Agaga Paia na taitai atu ai au e tape le afi. Sa pei na uumau e agelu le foeuli ina ia mafai ona ou aveesea lo’u lima e tape ai le afi. Ou te iloa na fesoasoani mai Tama Faalelagi ma le Agaga Paia ia te a’u i lena po. Ou te matua faafetai lava mo le talalelei i lo’u olaga lea na mafai ai ona ou saunia e maua uunaiga na taialaina ai i matou i le saogalemu.