“E faapefea ona ou iloa le Agaga?,” Liahona, Iuni 2023.
E Faapefea Ona Ou Iloa le Agaga?
Ina ia taiala i tatou i le iloaina o le Agaga, ua saunia ai e le Alii le tele o faamatalaga o le Agaga Paia i tusitusiga paia.
Ata na pu’eina e Sam Solaita
Sa aoao mai Peresitene Russell M. Nelson, “E leai lava se isi taimi ua sili ona matuā tāua ai le iloa o le auala e fetalai mai ai le Agaga ia [i tatou] nai lo le taimi nei.”1 Ae e toatele o loo taumanatunatu pea, e faapefea ona ou iloa le Agaga? O se fesili lenei ua fesiligia soo ai a’u o se faiaoga i le nofoaga autu e aoao ai faifeautalai, mo Seminare ma Inisitituti, ma i le Iunivesite a Polika Iaga. O le mea e lelei ai, ua taliina e le Alii o Iesu Keriso lenei fesili i tusitusiga paia ma aoaoga a perofeta o aso nei.
Na aoao atu e le Aposetolo o Paulo ia Korinito e faapea “e le iloa e se tasi mea a le Atua, vagana ai ua ia te ia le Agaga o le Atua” (Faaliliuga a Iosefa Samita, 1 Korinito 2:11 [i le 1 Korinito 2:11, vaefaamatalaga i]). Talu ai o upumoni faaleagaga e lē masani ona vaaia i o tatou mata faalenatura, e lē mafai ona aoaoina i o tatou sane faalenatura pe na o le atamai lava ia. O se taunuuga, e na o le Agaga e mafai ai ona tatou iloa i latou (tagai 1 Korinito 2:9–10). E ao ona faamautu mai e le Agaga Paia ia i tatou (tagai Moronae 10:4).
O le mafuaaga lea e tāua ai lo tatou aoaoina mo i tatou lava pe faapefea ona iloa ma faalagolago i le Agaga ia iloa ai le upumoni.2 E pei ona aoao mai Peresitene Boyd K. Packer (1924–2015), o le Peresitene o le Korama a Aposetolo e Toasefululua, “Afai na o le pau le mea e te iloa o le mea e te vaai i ai i ou mata faalenatura ma faalogo i ai i ou taliga faalenatura, o le a le tele ni mea e te iloa.”3
Ina ia taiala i tatou i le iloaina o Lona Agaga, ua saunia ai e le Alii ia faamatalaga nei:
“Filemu i lou mafaufau.” Ina ia fesoasoani ia Oliva Kaotui ia iloa le Agaga, na fesili ai le Alii, “Ou te lei tautala atu ea le filemu i lou mafaufau e uiga i le mataupu?” (Mataupu Faavae ma Feagaiga 6:23).4 Na faamalamalama mai e Elder Richard G. Scott (1928–2015) o le Korama a Aposetolo e Toasefululua: “O le lagona o le filemu o le molimau faamautu masani lea e patino ona ou oo i ai. Pe a oo ina ou matuā popole lava e uiga i se mataupu tāua, ma tauivi e foia e aunoa ma le faamanuiaina, ou te faaauau pea lava nā taumafaiga i le faatuatua. Mulimuli ane, ua oo mai se filemu e faatumulia atoa ai le tagata, ma foia ai oʼu atugaluga, e pei ona Ia folafolaina mai.”5
“I lou mafaufau ma i lou loto.” I se isi taimi sa tuuina mai ai e le Alii le faamatalaga lenei o le faaaliga: “O le a ou tau atu ia te oe i lou mafaufau ma lou loto, e ala i le Agaga Paia. … O le agaga lenei o faaaliga” (Mataupu Faavae ma Feagaiga 8:2–3). I se finagalo faaalia e uiga i lenei mea, na aoao mai ai Elder David A. Bednar o le Korama a Aposetolo e Toasefululua, “Ua faailoa mai e le Alii [iinei] e masani ona oo mai faaaliga o ni mafaufauga i le mafaufau ma lagona i le loto.”6
O nei mafaufauga ma lagona musuia e mafai ona “faapupula ai lou mafaufau” (Mataupu Faavae ma Feagaiga 11:13) ma mafua ai ona “faatumuina lou loto i le olioli” (Mosaea 4:20). Sa faamalamalama mai e le Perofeta o Iosefa Samita e faapea, o le “uluai folasaga o le agaga o faaaliga” o le taimi lea e te “lagona ai le tafe mai o le atamai mama i totonu ia te oe,” ma tuuina atu ia te oe “ni manatu faafuasei.”7
“Mu le loto i totonu ia i taua.” I le tomanatu ai i le aoaoina e le Keriso toetu, na faapea mai ai ni Ona soo e toalua, “E lei mu ea o ta loto i totonu ia i taua, ina ua fetalai o ia ia te i taua i le ala, ina ua faamatala mai foi e ia o Tusi ia te i taua?” (Luka 24:32). E faapena foi, na fetalai Iesu Keriso ia Oliva Kaotui, “O le a Ou faia ia mu lou loto i totonu ia te oe” e faamautu ai le upumoni (Mataupu Faavae ma Feagaiga 9:8; tagai foi 3 Nifae 11:3). Na faamalamalama mai e Peresitene Dallin H. Oaks, Fesoasoani Muamua i le Au Peresitene Sili, “e le o se lagona lenei o le vevela e pei o se afi ae o se lagona o le filemu ma le mafanafana ma le toafimalie ma le agalelei.”8
“Lagona e saʼo.” Na aoao atu e Iesu Keriso ia Oliva Kaotui o le a ia iloa e moni se mea e ala i le Agaga auā o le a ia “lagona ai ua saʼo” (Mataupu Faavae ma Feagaiga 9:8). Sa faamatala e Elder Scott lenei mea o lona uiga “o le tali e oo mai o se lagona ma se talitonuga maumaututu o loo avatu faatasi ai.”9
“O se leo filemu ma le itiiti” Sa aoao e le Alii ia Elia e faapea e lē masani ona Ia fetalai leotele mai e ala i le afi, asiosio, ma mafuie, ae o le tele lava o taimi o Ana fesootaiga faaleagaga e maaleale e ala i “se leo filemu ma le itiiti” (1 Tupu 19:12).10 O lenei leo faaleagaga e pei “o se musumusu” e ati “i totonu lava o le agaga” (Helamana 5:30), ma “e ui ina faamatalaina o se leo,” na aoao mai Peresitene Packer, “o se leo e lagona e se tasi, e sili atu nai lo o le faalogoina e se tasi.”11
“Ua e maua faatonuga mai loʼu Agaga.” Ona e fesootai mai le Agaga i ni auala filemu ma maaleale, e mafai ona tatou maua faaaliga ae tatou te lē iloaina. Sa faamalamalama atu e le Alii ia Oliva Kaotui, “O le tele o taimi na e ole mai ai na e maua ai faatonuga mai loʼu Agaga. A na fai e lē faapea, po ua e lē oo mai i le mea ua e i ai i le taimi nei” (Mataupu Faavae ma Feagaiga 6:14). Sa taialaina o ia e le Alii i le taimi atoa, ae na te lei iloaina i lena taimi. E na o le taimi ua uma ai ona tupu, ina ua taʼu mai e le Alii, na mafai ona ia toe tepa i tua ma vaai i le taitaiga a le Alii. E faapena foi, o loo tatou “ola i le faaaliga”12 ma e lē mafai ona iloa le Agaga se’i iloga ua uma ona Ia taialaina i tatou.
“Sa ou mafaufau ma saga mafaufau pea i ai.” Sa faamatalaina e Iosefa Samita se aafiaga ma le Agaga na ia maua a o suesue i tusitusiga paia, sa taʼu mai ai o se fuaiupu “sa foliga ua ulu mai ma se mana tele i lagona uma o loʼu loto. Sa ou mafaufau ma saga mafaufau pea i ai” (Iosefa Samita—Talafaasolopito 1:12). E mafai foi ona tatou faailoa le Agaga pe a paʼi mai fuaiupu o mau ma aoaoga faaperofeta i o tatou loto ma musuia i tatou e toe faitau ma mafaufau loloto i ai.
“Lea fuaitau i luga o lea fuaitau.” E ui o nisi taimi tatou te faamoemoe e oo mai uma faaaliga i le taimi e tasi, ae ua faamalamalama mai e le Alii, “Ou te tuu atu i le fanauga a tagata lea fuaitau i luga o lea fuaitau, ma lea mataupu i luga o lea mataupu, o sina mea itiiti i i ma sina mea itiiti i o” (2 Nifae 28:30). I se isi faaupuga, o le metotia e fiafia i ai le Alii o le tuuina atu lea o faaaliga laiti, i lea mea itiiti ma lea mea itiiti, e pei o le vaaia o le malamalama faifai mālie o se la oso nai lo le vaai atu i le malamalama atoa i le taimi e tasi pe a uma ona ki se moli.13 E masani lava, o lenei faaaliga e na o le pau le taimi e iloa ai pe a vaaia lea i le taimi e tasi.
“Taitai ia fai mea lelei.” O nisi e taumanatunatu pe o se uunaiga e fai le lelei e mai le Agaga pe ua o ni o latou lava manatu. Na tali Iesu Keriso i lenei mea ina ua Ia aoaoina Ailama Samita i le ala e iloa ai Lona Agaga: “Ia tuu atu lou faalagolago i le Agaga lena lea na te taitai ia fai mea lelei …; ma o loʼu Agaga lea” (Mataupu Faavae ma Feagaiga 11:12). E tatau ona tatou manatu o uunaiga faaleagaga e fai le lelei e mai le Agaga, ma e tatau ona tatou faatinoina.
Ata na pueina e Clayton Chan
“Ia filemu ma iloa o Aʼu o le Atua.” O nisi taimi e lē tali vave mai le Alii e ala i Lona Agaga e pei ona tatou faamoemoeina. E mafai ona faigata lenei mea ma e manaomia ai lo tatou faatinoina o le faatuatua i Lana taitaiga ia “filemu ma iloa o Aʼu o le Atua” (Mataupu Faavae ma Feagaiga 101:16). Sa faamalamalama mai e Peresitene Nelson: “Atonu e i ai taimi e te lagonaina ai e peisea’i o loo tapunia le lagi. Ae ou te folafola atu a e faaauau pea ona usiusitai, faaalia le lotofaafetai mo faamanuiaga uma ua foai atu e le Alii ia te oe, ma afai e te faamamaluina ma le onosai le taimi a le Alii, o le a foai atu ia te oe le poto ma le malamalama o loo e sailia.”14 A tatou lagonaina lenei filemu paia, e tatau ona tatou manatua, e pei ona aoao mai Peresitene Oaks, “o le a fetalai mai le Alii ia i tatou e ala i le Agaga i Lana lava taimi ma i Lana lava ala. … Tatou te faatalitali i le Alii mo Lana faaaliga.”15
E ui ina aogā nei faamatalaga, ae e i’u lava ina lē atoatoa. E pei ona faamalamalama mai e Peresitene Packer: “E le o ia i tatou upu (e oo lava i tusitusiga paia e leai ni upu) e faamatala atoatoa ai le Agaga. E masani ona faaaoga e tusitusiga paia le upu leo, lea e lē fetaui lelei. O nei fesootaiga maaleale, faamamaina faaleagaga e le vaaia i o tatou mata, pe logonaina i o tatou taliga.”16 I le iuga, o le iloaina o le Agaga e pei lava o le tofoina o le masima: e faigata ona faamatalaina i upu ae iloagofie i le taimi lava e te aafia patino ai.17
O le mafuaaga lea e tatau ai ona tatou aoao ia iloa le Agaga mo i tatou lava. E ui e lē mafai ona tatou faamalosia aafiaga faaleagaga, ae e mafai ona tatou fatuina se siosiomaga mo i latou e tutupu ai. Ua faaali mai e le Alii o Iesu Keriso nisi o mea laiti ma faatauvaa e mafai ona tatou faia e aoao ai e faalogo ia te Ia o fetalai mai ia i tatou e ala i Lona Agaga ina ia mafai ona tatou iloa lelei lena faatosinaga faaleagaga i soo se taimi e fetalai mai ai o Ia ia i tatou.
Tusitusiga paia. Na faaali mai e le Alii o Iesu Keriso e mafai ona tatou faalogo i Lona siufofoga faaleagaga o fetalai mai ia i tatou pe a tatou suesue i tusitusiga paia. Ua Ia fetalai mai:
“O nei upu ua lē mai tagata, … ae ua mai ia te aʼu; …
“O lo’u leo lea o loo tautala atu ia upu ia te outou; ona ua tuu i latou e lo’u Agaga ia te outou, ma e mafai ona outou faitauina i latou … e ala i loʼu mana;
“O le mea lea, e mafai ona outou molimau atu sa outou faalogo i loʼu leo” (Mataupu Faavae ma Feagaiga 18:34–36).
O le faamatalaina o lenei mataupu faavae, na aoao mai ai Elder Bednar: “O se tasi o auala e mafai ona ou faalogo ai ia te Ia o totonu o tusitusiga paia. O tusitusiga paia o le siufofoga lea na muai-pueina o le Alii. E lē o le faalogoina o se leo manino o ia lava ia, e ui e mafai ona tupu lena mea. O le faalogoina o tusitusiga paia i se lagona—o se lagona i lo’u mafaufau, o se lagona i lo’u loto. Mo a’u, o tusitusiga paia o ki ia i le mauaina ma le iloaina o nā mafaufauga ma lagona.”18
Malumalu. Na aoao mai Peresitene Nelson e faapea “e mafai foi ona tatou faalogo ia te Ia i totonu o le malumalu. O le maota o le Alii o se maota o le aoaoga. … O iina tatou te aoao ai i le auala e vavae ai le veli ma talanoa ma le manino atili ma le lagi.”19 Sa tatalo le Perofeta o Iosefa Samita mo i matou ina ia mafai ona aoao ia iloa atoatoa le Agaga i totonu o le malumalu ina ua ia tatalo o i “latou uma o e e tapuai atu i lenei fale … ina ia latou tutupu aʼe ia te oe, ma maua le atoatoaga o le Agaga Paia” (Mataupu Faavae ma Feagaiga 109:14–15). Pe a tatou tapuai pea lava pea i le malumalu, tatou te maua le poto masani i le lagonaina o le Agaga ma tatou tuputupu a’e i lo tatou gafatia e iloa ai Lona siufofoga i o tatou olaga.
O Perofeta. “Ma le mea mulimuli” na aoao mai ai Peresitene Nelson, “tatou te lagona o Ia a o tatou usitai i upu a perofeta, tagatavaai, ma talifaaaliga.”20 A tatou faalogo e lē aunoa i sāvali a o tatou perofeta ma aposetolo soifua ma faatino a latou fautuaga, tatou te valaaulia le Agaga Paia e aoao i tatou. O le isi punāvai tāua lenei o aafiaga ma le Agaga lea e mafai ona fesoasoani ia i tatou ia iloa Lana uunaiga.
E lē gata i lea, e mafai ona tatou tatalo faamaoni, auauna atu ma le faamaoni i le Ekalesia, tusifaamaumau uunaiga faaleagaga, ma aai ma feinu ma le agavaa i le faamanatuga. O le faia o nei mea ma le faatuatua ia Iesu Keriso, o le a oo mai le Agaga, ma o le a tatou iloaina o Ia e ala i faamatalaga o tusitusiga paia, faamasani i Ana uunaiga e ala i o tatou lava aafiaga, ma sili atu ai ona iloa ma le mautinoa Lana uunaiga i vaega uma o o tatou olaga. “O le aoaoina o le Agaga o le Atua ma malamalama i ai, e mafai ai ona e tuputupu ae i le mataupu faavae o faaaliga, seia oo ina e atoatoa ia Keriso Iesu”21 ma maua ai “le finagalo o Keriso” (1 Korinito 2:16).