“Ua Tatou I Ai Iinei e Fesoasoani le Tasi i le Isi,” Liahona, Iuni 2023.
Atatosi o le Faatuatua
Ua Tatou I Ai Iinei e Fesoasoani le Tasi i le Isi
E tausia e le Alii o’u manaoga. Ua Ia faamanuiaina a’u i lou aiga ma mea uma o i ai.
Ata na pueina e Richard M. Romney
Leonard: Sa avea a’u ma se tagata inu ava malosi. Sa leai so’u aiga. Sa ou ofuina lavalava lava e tasi i aso uma lava. Sa ou moe i le togavao ma ‘ai mai kalone lapisi. Sa leai se mea na ia te a’u po o se tasi foi.
Elder Olsen: Na faapefea ona e suia?
Leonard: Sa ou filifili e tatalo. Sa ou ole atu i le Alii mo se fesoasoani, ma sa ou maua ai le malosi e taofi ai le inu ava malosi. Sa ou mafaufau pea lava i Le Ekalesia a Iesu Keriso o le Au Paia o Aso e Gata Ai. Sa ou lagonaina muamua iina le lagolelei. Sa ou faapea e mafai ona ou toe maua le faamoemoe iina.
Elder Olsen: Ua e ta’u mai ia te a’u na amata ona e lagonaina ni uunaiga.
Leonard: Ioe, sa aumai a’u e le Alii, ma ina ua ou mulimuli ia te Ia, sa amata ona Ia faamanuiaina a’u.
Elder Olsen: Na faapefea ona fesoasoani taitai o le Ekalesia i le lotoifale ia te oe?
Leonard: Sa tapē lo’u igoa, ae sa latou fesoasoani mai ia te a’u ia ou malamalama i le mea e tatau ona ou faia, ma faia le mea sa manaomia ona ou faia ina ia mafai ai ona ou toe foi mai i le faaaumeaina atoatoa. Sa faifaimālie lava ona ou agai atu ai iina. O le aso na ou toe papatiso ai o le aso sili lea ona fiafia o lo‘u olaga.
Elder Olsen: O le asō o loo e nofo i lalo o le mauga mai lo tatou falesa [le falelotu o le Paranesi a Dennehotso i Kayenta, Arisona, ISA]. O lou fale o se taavale toso laitiiti, e leai se eletise ma e lē ola le vai, ae ua e fai mai e te manatu ua e laki lava?
Leonard: E taulima e le Alii ou manaoga. Ua Ia faamanuiaina a’u i lenei fale ma mea uma o i ai. Ou te fiafia i le i ai o se nofoaga filemu e mafai ai ona ou suesue i tusitusiga paia ma tatalo. E nofo latalata mai lo’u tuafafine, ma o iina ou te maua ai le vai. O nisi taimi pe a ou manaomia le eletise, na te faatagaina a’u e toso mai se uaea umi mai lona fale.
Elder Olsen: O a nisi auala ua faamanuiaina ai oe e le talalelei?
Leonard: Sa faaali mai e le Alii ia te a’u e i ai le uiga i lenei olaga. O se mea lena sa ou misia mo le tele o tausaga. O lea la ua ou manao e fesoasoani i isi tagata, e pei lava ona Ia fesoasoani mai ia te au.
Elder Olsen: Ou te vaai o loo e fesoasoani i tagata i taimi uma. O le isi aso, sa e fesoasoani ai i se fafine na mau lana taavale i le oneone.
Leonard: Sa na o ni nai tagata o le Ekalesia na ou maua ma ni suō se lua. Sa amata ona matou eli ma tulei. E le’i umi ae toe alu o ia i lona ala.
Elder Olsen: Ae faapefea lena taimi sa e lagonaina ai pea se uunaiga e asiasi i lou tei, o lē e tele maila e nofo mamao ese ai i Farmington, Niu Mekisiko?
Leonard: Sa ou lē mautinoa pe aisea na tatau ai ona ou alu, ae sa ou iloaina sa finagalo le Alii ia ou i ai iina.
Elder Olsen: O lea, sa e galue ai i le uunaiga, na e maua se auala e oo atu ai iina, ma na e taunuu i le taimi tonu lava e tuuina atu ia te ia se fesoasoani na manaomia vave.
Leonard: Sa silafia e le Alii sa ia manaomia le fesoasoani, ma sa Ia silafia e mafai ona ou fesoasoani ia te ia.
Elder Olsen: I lou valaauga i le au peresitene o le paranesi, e te fesoasoani mai ia te a’u i tofiga o auaunaga, fonotaga, gaoioiga a le paranesi, ma le polokalama a le Ekalesia o le toe faaleleia o olaga mai le tagofia o mea ua fai ma vaisu. O le a sau tala pe a fesili atu se tasi ia te oe, “E faapefea ona e alofa i lou tuaoi?”
Leonard: Ma lo’u loto atoa.
Elder Olsen: E faapefea ona e faaalia lena alofa?
Leonard: Na o lo’u toe faafoi atu ia i latou le mea ua tuuina mai e le Alii ia te au. E manaomia e tagata ona lagona le alofaina. Latou te manaomia ona lagona le faamafanafanaina. Latou te manaomia le taitaiga. Latou te manaomia ona malamalama i mea e mafai ona tuuina atu e le Alii ia i latou. A e i ai i le pito i lalo o le lua, e tatau ona e lagonaina afai e te aapa atu, o le a i ai se tasi iina.
Elder Olsen: O loo e nofo i se taavale toso laitiiti, ae o lou loto e telē e pei o le telē o fafo. E te ola faatauvaa, e aunoa ma ni meatotino faalelalolagi. Ae e te faapei o Keriso, e fesoasoani i taimi uma ia i latou e lē tagolima.
Leonard: O le mafuaaga lena ua tatou i ai iinei, a ea? Ia fesoasoani le tasi i le isi.
E nofo Leonard i se taavale toso laitiiti e aunoa ma se eletise pe ola foi le vai, ae ua manatu o ia lava ua faamanuiaina.
E fiafia Leonard i le i ai o se fale filemu e mafai ai ona ia suesue ai i tusitusiga paia.
O Elder Olsen (agavale), o se faifeautalai o auaunaga a le Ekalesia o loo auauna atu o se peresitene o le paranesi, o loo talanoaina manaoga o le paranesi ma Leonard, o loo auauna atu o lona fesoasoani muamua.
E faapefea ona alofa atu Leonard i ona uso a tagata? “Ma lo’u loto atoa,” o lana tala lea.
Na fesoasoani Leonard ma se isi tagata o le Ekalesia i se fafine na mau lana taavale i le oneone.
“I tusitusiga paia,” o le tala lea a Leonard, “ua tatou aoao ai afai tatou te auauna atu i isi, ua tatou auauna atu i le Atua,” (tagai Mosaea 2:17).
O le falelotu o le Paranesi a Dennehotso i Kayenta, Arisona, lea o loo auauna ai Leonard i le au peresitene o le paranesi.