“O Se Auala o Musumusuga,” Liahona, Iuni 2023.
O Leo o le Au Paia o Aso e Gata Ai
O Se Auala o Musumusuga
I le tali mai i la’u tatalo, sa faaaoga ai a’u e le Alii e faamanuia ai se tasi o Ana fanau.
Atapue mai faaaloaloga a le aiga o Brandenburg
I tausaga ua mavae sa valaauina ai i ma’ua ma lo’u toalua e auauna atu i se misiona i le inisitituti o mataupu faalelotu i Santa Monica, Kalefonia, ISA. Sa lē gata ina ma auauna atu o ni faatonusili o le inisitituti ae faapea foi o ni faiaoga. I se tasi po sa ou aioi atu ai i le Alii i le tatalo, “Ia avea a’u ma auala mo Au musumusuga ina ia mafai ona ou fesoasoani i se tasi o Au fanau.” Ina ua uma la’u tatalo, sa ou moe ae na ou ala i le 4:30 i le taeao.
E masani lava ona faiaoga lo’u toalua i le vasega o le 7:00 i le taeao. O le vasega o le Tusi a Mamona, ae i le taeao po lava lena, sa tali mai ai le Alii i la’u tatalo. O le autu o le lesona o le “O Le Manao o Lo’u Loto,” ae sa ou lē iloa po o le a le mea na fuafua lo’u toalua e aoao atu, ma ou te le’i faaaogaina foi lana tusi lesona. Ae sa ou tu i luga, fai atu ia te ia ou te manao e aoao atu le lesona i lena aso, ma alu atu i le fale o le inisitituti.
Sa ou maua ni mau e faatatau i le autu, e aofia ai le 1 Nifae 2:16: “Ma sa oo ina o a’u, o Nifae, … o le mea lea, sa ou tagi atu ai i le Alii i le manao tele ia iloa mealilo a le Atua; ma faauta sa asiasi mai o ia ia te a’u, ma faamalūlūina lo’u loto sa ou talitonu i upu uma na tautalaina e lo’u tamā.”
Ona ou faafesootaia lea o manaoga o Nifae i manaoga o le Tupu o Solomona i le 1 Tupu 3:9: “Ia tuu mai i lau auauna se loto malamalama e faamasino ai lou nuu, ina ia mafai ona ou iloatino le eseesega i le va o le lelei ma le leaga: aua o ai e mafai ona faamasino i lenei nuu silisili?”
E na o le toatasi le alii talavou na sau i le matou vasega i lena aso. Sa lē o ia foi o se tagata o le Ekalesia, ae sa ou iloaina o lenei lesona o le mea lea na fuafuaina e le Alii mo ia. Sa ma faitau ma talanoaina tala o tusitusiga paia ia Nifae ma Solomona. Ona ou fai atu lea ia te ia e tali mai i se tusiga i lenei uunaiga: “O a ni manaoga o lou loto?” Ina ua mavae ni nai minute, sa ou fesili atu pe manao e faasoa mai mea sa ia tusia. Sa ia fai mai, “Ou te fia iloa pe moni le Tusi a Mamona ma pe tatau ona ou papatiso.”
Sa faafofoga le Alii ma e lei pine ae tali mai i le manao o lenei alii talavou. Vaai faalemafaufau i lo matou olioli ina ua mavae le fa masina mulimuli ane, sa ma auai ma lo’u toalua i lona papatisoga. Ou te faafetai ona sa faia e le Alii a’u o se auala mo se lesona musuia i lena aso e fesoasoani ai e saunia lenei alii talavou mo le papatisoga.