“O Tali i Ou Faafitauli Uma o loo i totonu o Lenei Tusi”

Saunia e Don George

E nofo le tusitala i Kanata.

Sa ou tafetafea ese mai le Ekalesia a le Alii. O se tasi o fuaiupu mai lo’u uso na amata ona suia ai mea uma.

Ata

o tusitusiga paia o loo taatitia i autafa o se ata o Keriso

Sa ou ola ae i le Ekalesia i se aiga alofa. Ae ina ua ou ulufale atu i o’u tausaga talavou, sa amata ona ou tafetafea ese mai le talalelei. Sa ou alu pea i le lotu toeitiiti lava o Aso Sa uma. Sa ou talitonu i mea sa aoaoina, ae sa le lava lo’u tuuto e ola ai i le talalelei.

Ina ua sau lo’u uso matua i le fale mai lana misiona, sa ia iloa ai ou te le o alu i le itu e tatau ona ou i ai. Sa sau o ia i totonu o lo’u potu i se tasi po ma taumafai e talanoa mai ia te a’u. Ae sa ou le fiafia tele i ai. Na iu lava ina ia faapea mai, “O tali uma i ou faafitauli uma o loo i totonu o lenei tusi,” ma sa ia tuuina se Tusi a Mamona i luga o lo’u moega. Ona ia alu ai lea. Ina ua mavae ni nai minute, sa ou fai ifo ia te a’u lava ia i se leo tauemu, “O tali uma i ou faafitauli uma o loo i totonu o lenei tusi.”

“Ua lelei,” sa ou mafaufau ai, “se’i vaai la.”

Sa ou tatalaina le Tusi a Mamona ma le fuaiupu muamua na ou vaai i ai o le Alema 29:13, lea e faapea mai, “Ioe, ma o lena lava Atua e tasi na faatuina lana ekalesia i totonu o i latou; ioe, ma o lena lava Atua e tasi na valaauina a’u i se valaauga paia, e talai atu le afioga i lenei nuu, ma tuuina mai ia te a’u le manuia tele, lea ua atoatoa ai lo’u olioli.” Sa ou lagonaina e pei lava o Iosefa Samita ina ua ia faapea mai, “E leai lava se mau o tusitusiga paia na oo mai i le loto o se tagata ma le mana tele nai lo o lenei mau i lo’u loto” (Iosefa Samita—Talafaasolopito 1:12).

Sa malosi tele le Agaga, ma sa ou iloaina sa taitaiina a’u e le Alii. Sa vave ona ou sueina se penitala lanumumu, ma le fefe nei galo ia te a’u lenei mau ma ou te le toe mauaina lava. Sa ou toe iloiloina, ma taumafai ia malamalama i le uiga mo a’u. Sa oo ina ou malamalama e tatau ona ou alu i se misiona, o le a faamanuiaina a’u, ma o le a ou fiafia e faia.

O lo’u fefe atonu o le a ono suia lo’u mafaufau pe masalosalo i le uunaiga, sa ou oso ai i totonu o la’u taavale ma alu atu i le faleoloa pizza a lo’u tama e fesili atu mo lana lagolago, lea na ia vave tuuina mai. Ona ou alu lea i le fale o lo’u epikopo ma fesili atu ia te ia po o le a le mea e tatau ona ou faia e alu ai i se misiona. E lei umi, ae ou maua se valaauga e auauna atu i le Misiona a Filipaina Manila. E pei ona i ai le taunuuga, ia saou fiafia ma faamanuiaina.

Talu mai lena taimi, e lei toe tutusa lava lo’u olaga. Ou te le o mautinoa po o fea o le a ou i ai po o le a le mea o le a ou faia pe ana le sau lo’u uso i lo’u potu i lena po, ae ou te mautinoa sa sese le itu sa agai i ai lo’u olaga. Na faasaoina moni lava e le Tusi a Mamona lo’u ola. Ou te iloa e silafia i tatou e le Alii ma e finagalo e fesoasoani mai ia i tatou pe afai o le a tatou faia se taumafaiga ma faaali atu tatou te fiafia ia te Ia.