“E Mafai Faapefea Ona Tatou Faia le Faamanatuga ia Sili Atu ona Anoa ia i Tatou?,” Liahona, Iuni 2023.
Sau, Mulimuli Mai ia te A’u
E Mafai Faapefea Ona Tatou Faia ia Sili Atu le Anoa o le Faamanatuga ia i Tatou?
I mataupu nei o le Feagaiga Fou, tatou te faitau ai e uiga i le faavaeina e le Alii o le faamanatuga:
“Ona tago ai lea o ia i le areto, ua faafetai, ua tofitofi, ma avatu ia te i latou, ua faapea atu, O lo’u tino lenei, ua foaiina atu mo outou; tou te faia le mea nei e fai ma faamanatuga ia te au.
“Sa faapea foi ona tago i le ipu, ina ua uma ona talisua, ua faapea atu, O lenei ipu o le feagaiga fou lea i lo’u toto, ua faamaligiina mo outou” (Luka 22:19–20).
Fesili e Tolu
Mafaufau loloto i fesili nei na tuuina mai e Peresitene Russell M. Nelson: “Fesili ifo ia te oe lava, ‘O le a se mea ou te mafaufau i ai pe a ou ai ma inu i le faamanatuga? Pe o ou taulai moni atu ea i le Togiola a Iesu Keriso? Pe o ou malamalama ea i le maoae o Lana taulaga ma le ofoofogia o lo‘u lumanai a o ou tauaveina i o‘u luga le suafa o Iesu Keriso ma filifili e tausi Ana poloaiga?’” (“Reflection and Resolution” [Brigham Young University devotional, Ian. 7, 1990], 6, speeches.byu.edu).
Mea e Tolu ia Malamalama I Ai
Mafaufau i aoaoga nei a Peresitene David O. McKay (1873–1970) e uiga i mea e tolu e manatua e faatatau i le faamanatuga:
“O le mea muamua o le iloatino o le tagata lava ia. O le iloiloga loloto. ‘Tou te faia lenei mea e fai ma faamanatuga ia te au’ [Luka 22:19], ae e tatau ona tatou aai ma feinu ma le agavaa, e tofu suesueina e i tatou taitoatasi o ia lava ma le faaaloalo i lona agavaa.
“Lona lua, e i ai se feagaiga ua osia; o se feagaiga e sili atu nai lo se folafolaga. … O se feagaiga, o se folafolaga, e tatau ona paia e pei o le ola. O lena mataupu faavae e aofia i Aso Sa uma pe a tatou aai ma feinu i le faamanatuga.
“Lona tolu, o loo i ai se isi faamanuiaga, ma o se lagona lena o le sootaga vavalalata ma le Alii. O loo i ai se avanoa e talanoa ai ma le tagata lava ia ma ia talanoa ma le Alii” (Aoaoga a Peresitene o le Ekalesia: David O. McKay [2003], 34–35).