“O Faalavefau Ea le Fefe i le Ala o La Oulua Sootaga ma le Atua?,” Liahona, Iuni 2023.
Autalavou Matutua
O Faalavefau Ea le Fefe i le Ala o La Oulua Sootaga ma le Atua?
E mafai faapefea ona ou tapunia lena āva lea ou te lagonaina i nisi taimi i le va o a’u ma lo’u Tama Faalelagi?
Ata na tusia e Alex Nabaum
O le a le mea e tupu pe afai e matuai saogalemu la oulua sootaga ma le Atua lea e mafai ai ona e faatuatuaina o Ia i le 100 pasene? Atonu o le a ia te oe le faatuatua e aveesea ai mauga (tagai Mataio 17:20) pe fai atu ai i vaitafe, “Ia liu eleele oe” (1 Nifae 17:50).
Ou te talitonu e mafai lenei ituaiga o sootaga ma le Atua. Ae ou te fesiligia lava i taimi uma, pe e mafai ea mo a’u?
Ou te faatauaina la’u sootaga ma le Tama Faalelagi. Ou te tuuto atu le taimi, taumafaiga, ma le alofa ia te Ia i aso uma. Ae o nisi taimi ou te lagonaina pea se āva tele e taofia ai a’u mai le lagonaina o le latalata atili atu ia te Ia. O se āva lea, na lata mai nei lava, ou te le’i iloa pe faapefea ona puluti.
O le Fefe e Faatiga ai Sootaga
Sa ou faaaluina le tele o lo’u olaga e ola ai i se taumamao faalelagona mai tagata ou te alofa i ai. Ou te fiafia e fai ni uo, ae ou te le’i aoaoina moni lava pe faapefea ona avea tagata ma se vaega moni o lo’u olaga—lea e manaomia ai le talanoa lē mataofiofia ma le sili atu ona patino nai lo le mea e logolelei mo au.
I le āluga o tausaga sa ou tiga i sootaga vaivai, malepelepe, ma lē manuia. O lea la, o le tulaga lamatia o le tuu i lalo o o’u puipui e fesootai ai ma tagata e masani lava ona lagonaina le matautia. Sa umi se taimi ou te ioeina ai lenei mea, ae o se tasi o o’u popolega loloto o le lē lava lea [o lo’u lelei] mo se tasi e tāua ia te au ma ua tuulafoaiina.
Talu ai nei sa ou iloaina ai o nisi taimi ou te oo ai i lenei lava fefe e tasi i le tuulafoaiina o a’u i la’u sootaga ma le Atua.
Pe a ou faitau i tusitusiga paia e uiga i le ala e faatuatuaina ai le Atua, ou te talitonu i ai. Ae i le taimi lava e tatau ai ona ou faalagolago ia te Ia, o se vaega o le fefe o loo pipiimau pea ma taofia ai a’u mai le faatuatuaina atoatoa. Ua faapupula mai e Peresitene Thomas S. Monson (1927–2018) lenei lagona: “Atonu e i ai taimi e te lagona ai le vavaeeseina—e oo lava i le tuuesea—mai le Tagata Foai o meaalofa lelei uma. E te popole ua tuua na o oe. E suitulaga ai e le fefe le faatuatua.”1
A o ou suesue i le ala e aafia ai a’u sootaga i le fefe, ua ou iloa ai ni nai upumoni na fesoasoani ia te a’u e tali lelei atu ai i le fefe ina ia mafai ona ou maua le faamoemoe ma faaauau pea ona faamalosia la’u sootaga ma Ia ma isi.
O Le Tāua o le Talitonuina
Tatou te mananao uma lava i ni sootaga saogalemu ma talitonuina i le olaga, aemaise lava i le Tama Faalelagi. Ae o nisi taimi o le fefe e mafai ona faasalavei mai i le ala o le faatagaina o i tatou lava e talanoa atu i faauoga faaolioli, soa e faavavau, e oo lava i le Tama Faalelagi. E mafai ona tatou lagonaina le taufaamatau i soo se ituaiga o mea, ae o le tele lava o taimi o le fefe tele e sau mai le vaaiga faapea o isi o loo o ese mai ia i tatou—pe o le a latou faia [o ese ma tatou] i le lumanai.
Ua ou vaai ia te a’u lava ua ou soona matele e faatalitali mo se tasi ou te fiafia i ai e toe tesi mai ia te a’u. Ou te siakiina e lē aunoa la’u telefoni, ma le faamoemoe ua latou tali mai—ma lagona le popole pe afai latou te le’i faia! O isi taimi ou te filifili ai ma le lē mautonu o se mafutaga o tafaoga faamasani e lē aogā ai le tulaga lamatia faalelagona o le tiga po o le lē fiafia, o lea ou te faamutaina ai. O nei tali uma e lua ua faaalia ai le tele o tali e faatatau i le fefe nai lo le talitonuina.
I le mafaufau ai i lenei mea, e foliga mai o le a ou tali atu i le Atua i ni auala talitutusa pe a ou le tuuina atu lo’u talitonuga atoa ia te Ia ae o le faatagaina o le fefe ma le masalosalo e iloa ai a’u amioga. Ae a o tatou aoao i le Faataoto, e mafai ona tatou “faalagolago pea i le Alii ma o tatou loto atoa; a e aua le faalagolago i lo tatou lava atamai” (Faataoto 3:5).
Faatulaga ni Faamoemoega Maloloina
E mafai e i tatou uma ona atiina ae ni sootaga saogalemu, maloloina, ma o le mea e tasi e fesoasoani ia te a’u o le setiina o faamoemoega moni. Pe a i ai i tagata uma e toalua i se mafutaga ni faamoemoega moni ma faamaoni, e foliga mai la te tau lē lagonaina e pei o faatinoga a le isi tagata (po o le lē mafai ona faia) ua lamatia ai le sootaga.
O nisi taimi e i ai o tatou faamoemoega sese mo le ala o le a aofia ai le Atua i o tatou olaga. Ma o na faamoemoega e masani lava o le mafuaaga lea tatou te lagona ai e lē mafai ona tatou faatuatuaina o Ia—auā e le o faaalia mai e Ia le ala tatou te faamoemoeina ai o Ia pe mananao foi ia te Ia. Atonu e amata ona tatou lagonaina le lē fiafia, lē mausali, po o le fefe faapea e le o i ai o Ia iina, e lē alofa o Ia ia i tatou, pe Na te lē tausia Ana folafolaga.
Atonu tatou te tali atu ma le popolevale. Pe amata ona taofiofi lo tatou faatuatua i le faataunuuina o faamanuiaga tatou te manatu tatou te manaomia po o taunuuga tatou te manatu o le a sili ona lelei mo i tatou. Pe atonu foi tatou te galulue taumamao—tatou te lē toe faitauina a tatou tusitusiga paia pe tatalo mo Lana taitaiga auā e sili ai lo tatou faalagolago i lo tatou lava malosi.
O nei faananauga uma o ni papupuni ia e taofia ai i tatou mai le lagonaina moni ma le toe mamanuina o le alofa atoatoa o le Tama Faalelagi.
I tulaga faapenei, o i tatou ia e manaomia ona toe iloiloina o tatou faamoemoega ma amioga. Nai lo le ta’u atu i le Atua le ala e tatau ona Ia faaali mai ai mo i tatou, e sili atu ona aoga le aoao pe faapefea ona galue o Ia. E pei ona aoao mai Elder D. Todd Christofferson o le Korama a Aposetolo e Toasefululua, “E moni lava e valea mo i tatou i lo tatou olaga faitino le manatu e faamasino le Atua, ia mafaufau, mo se faataitaiga, ‘Ou te le o fiafia, ai o fai e le Atua se mea sese,’”2
O Feagaiga e Fausia ai le Faatuatuaina
Ina ia atiina ae le faatuatuaina o la tatou sootaga ma le Tama Faalelagi, e mafai ona tatou liliu atu i a tatou feagaiga. Ua faamalamalama manino mai e feagaiga mea ua Ia faamoemoeina mai ia i tatou. A o tatou taumafai ma le filiga e lagolago lo tatou iuga, ua tatou faia la tatou vaega e atiina a’e le faatuatua i lenei sootaga paia.
O feagaiga o ni faamaoniga e alofa le Atua ma ua tuuto mai ia i tatou—e leai se mea e mafai ona vavaeeseina i tatou mai ia te Ia po o Lona alofa (tagai Roma 8:38–39) a o tatou faaauau pea ona saili atu ia te Ia ma salamo i aso taitasi. A tatou vaai mo i tatou lava o loo Ia tausia Ana folafolaga ia i tatou a o tatou tausia a tatou folafolaga ia te Ia, ua faamautinoa mai ia i tatou e mafai ona tatou faatuatuaina atoatoa o Ia.
O le iloaina o le faataunuuina e le Atua o feagaiga e manaomia ai le maitau, manatunatu, ma le faatuatua. Afai e te tauivi e vaai ia te Ia i lou olaga, mafaufau i auala nei ua Ia folafola mai e faamanuia ai oe a o e osia ma tausia feagaiga:
-
Toomaga mai le toilalo, lē fiafia, po o le faanoanoa3
-
“Malamalama sili atu i faamoemoega ma a’oa’oga a le Alii”4
-
Malosi faasaga i faaosoosoga5
-
“Faateleina le faamoemoe, mafanafana, ma le filemu”6
-
O se sootaga vavalalata ma sili atu ona mamana ma le Faaola7
-
Malosiaga e tulai ae ai i o tatou gafatia atoatoa8
-
Olioli ma uunaiga faaleagaga9
-
“Musumusuga ma uunaiga e lē faatapulaaina”10
A o o’u vaavaai ma le loto i ai mo nei faamanuiaga, ua manino mai ia te au o loo taialaina pea a’u e le Atua ma tausia Ana folafolaga e pei ona Ia folafola mai i taimi uma. Ma ou te maua ai le puipuiga e talitonu ai o le a i ai o Ia iina mo a’u pe a ou manaomia o Ia. “Ona o le a ia faataunuuina ana folafolaga uma ia o le a ia faia ia te oe, ona ua ia faataunuuina ana folafolaga ia na ia faia i o tatou tamā” (Alema 37:17).
I lo’u olaga, e le o sootaga uma na lelei. Ma o sootaga malepelepe ua ou fefe ai e toe taumafai. Ae ou te talitonu e mafai e i tatou uma ona faatoilaloina lo tatou fefefe a o tatou faataitaia le fausiaina o le talitonuina ma taumafai ia malamalama i le mana faaleagaga lea e sau mai la tatou sootaga faalefeagaiga ma le Atua.
Ou te faamoemoe mo le sailia o se soa e faavavau i se tasi aso ma faaauau ona fausia ni sootaga matagofie ma isi e ala i mea o loo o’u aoaoina e uiga i le tausia o a’u feagaiga ma Ia. E pei ona aoao mai Elder Christofferson: “I le faaiuga, o le faamanuiaga o se sootaga vavalalata ma le mausali ma le Tama ma le Alo tatou te sailia. E faia ai le eseesega uma, ma e taua e faavavau le tau. … Po o a lava mea e ono aofia ai i o tatou aafiaga faaleolaga nei, e mafai lava ona tatou faalagolago i le Atua ma maua ai le olioli ia te Ia.”11
A o faaauau pea ona tatou pipiimau i a tatou feagaiga, e mafai ona tatou lagonaina le saogalemu gafatia o le faatuatuaina o le tasi ma le isi ma le alofa atoatoa i la tatou sootaga ma le Tama Faalelagi.