Sailia o le Meaalofa o le Tautala i Gagana

Saunia e Arthur O. Lono, Kasai-Oriental, Ripapelika Temokarasi o Congo

Sa ou galue malosi i le taimi o la’u misiona e aoao le Igilisi, ae sa lei vave oo mai le meaalofa o le tautala i gagana.

Ata

kelope o le lalolagi ma upu i le Igilisi ma le faa-Farani

Ina ua ou tatalaina lo’u valaauga o le misiona, sa ou fiafia lava o le a ou alu i le Misiona a Kana Accra. O le a ou auauna atu i le Alii e ala i le aoaoina atu o le talalelei i le faa-Peretania. Ou te sau mai le Ripapelika Temokarasi o Congo, o la’u lava gagana o le faa-Farani.

Ina ua ou taunuu atu i le galuega faamisiona, sa mafai ona ou faafeiloaia tagata i le faa-Peretania ae lē tele nisi tala e fai atu. Sa ou iloa e lē lava lena mo au e faataunuu ai lo’u tiute o se faifeautalai.

Sa ou mafaufau i le Perofeta o Iosefa Samita, o lē na faaliliuina le Tusi a Mamona e “ala i le meaalofa ma le mana o le Atua.”¹ Sa ou mafaufau foi i aoaoga a le Aposetolo o Paulo e uiga i “eseesega o meaalofa,” e aofia ai “ituaiga eseese o gagana” ma “le faaliliuga o gagana” (1 Korinito 12:4, 10; tagai foi Mamona 9:7, 24).

Sa oo mai se lagona faaosofia ia te a’u lea na ou lagona ai e mafai ona ou sailia le meaalofa o le tautala i gagana ma mauaina. Ina ia maua lena meaalofa, sa ou filifili ai e faatutū ni sini o aso taitasi:

Tatalo mo le meaalofa o le tautala i gagana.
Suesue ma le filiga i tusitusiga paia ma aoaoga faavae ma mataupu faavae o le talalelei.
Saili le taitaiga mai le Agaga.
Faalogologo i lauga o le konafesi aoao i le faa-Peretania.
Suesue le kalama faa-Peretania ma le vaogagana autu a faifeautalai.
Tautala i taimi uma i le Igilisi.
Usu viiga i le Igilisi.

Sa ou galue malosi i a’u sini. Peitai, o le meaalofa o le tautala i gagana, sa lei vave oo mai. Ae ina ua mavae ni nai masina, a o ma aoaoina ma la’u soa se tasi o a ma uo, sa ou lagona le mautinoa i upu sa ou tautala ai. O le matou feiloaiga muamua ma le ma uo sa faigata. Ou te lei lagonaina se talitonuga mautinoa i lo’u tomai e tautala faa-Peretania, ae o le aso lenei sa faateia ai la matou uo.

“Elder Lono, o fea e te sau ai?” na ia fesili mai ai ia te a’u

“Ou te sau mai DR Congo,” sa ou tali atu ai.

“E te mo’i?” o lana fesili lea.

“Ioe!” Sa ou tali atu ai.

Ou te le’i iloaina, ae sa ou lelei i le faa-Peretania o lea na manatu ai le ma uo o la’u gagana moni lea. Ou te faafetai ona sa faamanuiaina a’u e le Alii i le meaalofa o le tautala i gagana ina ia mafai ona ou tautala lelei i le faa-Peretania.

Ou te iloa e alofa le Atua i Ana fanau ma o le a faamanuia i tatou i meaalofa a le Agaga a o tatou sailia i latou ma le filiga faapea ma le faatuatua ia Iesu Keriso.