“O A’u Tupe o le Meli,” Liahona, Iuni 2023.
O Leo o le Au Paia o Aso e Gata Ai
O A’u Tupe o le Meli
Pe na faamoemoe moni mai le Alii ia te a’u e totogi le sefuluai i sina tupe itiiti sa ou maua i le faatauina atu o le meli?
Ata pu’e mai faaaloaloga a le tusitala
Mo se mea e fiafia i ai, sa ou aoaoina ai le tausiga o lagomeli. E le’i umi, ae amata ona fesili mai tagata pe mafai ona latou faatauina nisi o a’u meli.
Ina ua uma ona faatau atu sina meli laitiiti, sa ou mafaufau e totogi le sefuluai i a’u “mea faaopoopo” (Mataupu Faavae ma Feagaiga 119:4). Ae peitai, ou te le’i mafaufau moni lava i le tupe na ou mauaina, o se faatelega. Sa ou faaaluina le tele o mea i meafaigaluega e tausi ai lagomeli nai lo [tupe] na ou maua i le faatauina atu o le meli.
Ae sa ou manatua o sefuluai e paia i le Alii. I le avea ai ma tagata o Le Ekalesia a Iesu Keriso o le Au Paia o Aso e Gata Ai, tatou te faamamaluina o Ia e ala i le totogi o le sefuluai. O le totogi o le sefuluai o se faailoaga lenei o le faatuatua i le Atua ma Ana folafolaga.
Ou te manatua o i latou e totogi sefuluai latou te mauaina le folafolaga lenei mai le Alii: “Ia outou tofotofo mai ia te au i lenei mea, ua fetalai mai ai Ieova o ‘au, pe ou te le toina pupuni o le lagi mo outou, ma sasaa atu le manuia mo outou ina seia silisili ona tele” (Malaki 3:10).
Sa ou taliaina le lu’i a le Alii ma totogi le sefuluai i [tupe] o a’u faatauga meli. I luga o lisiti o le sefuluai, sa ou tusia ai, “Mai tupe o le meli.”
I se taimi puupuu mulimuli ane, sa sau ai se uo i lo’u fale ma fai mai sa ia iloaina se tasi ua maliu lana tane sa tausia ni lagomeli. Sa manao le fafine ua oti lana tane e aveese uma meafaigaluega a lana tane e tausi ai lagomeli ma sa mafaufau e tia’i ese. Nai lo lena, sa ave a’u e la’u uo e piki mai meafaigaluega.
O meafaigaluega uma mo le tausiga o lagomeli sa ou manao ma moomoo i ai—ma isi mea e tele—sa i ai iina, e aofia ai ituaiga uma o masini e sali ai le meli.
E leai se tasi e foai ese ni meafaigaluega tausi lagomeli. Ae i totonu o le vaiaso talu ona uma ona ou faia le filifiliga e totogi le sefuluai, sa tatalaina e le Tama Faalelagi pupuni o le lagi ma tauia a’u. Ou te talitonu ua lē na’o se laki na tupu ai lea mea. E i ai sa’u molimau e silafia a’u e le Tama Faalelagi ma o’u manaoga. O la’u molimau i le tāua o le totogiina o le sefuluai ua mautinoa lava le tuputupu ae.