Sau, Mulimuli Mai ia te A’u

Mataio 27; Mareko 15; Luka 23; Ioane 19

O Le Mea E Sa’o po o Le Mea E Lauiloa?

faailoga laupapa ma aū o loo faasino i itu eseese

Ina ua suesueina e Ponotio Pilato ia Iesu Keriso, sa ia “le iloa se mea e sala ai” o Ia (Luka 23:4). Sa “fia tatalaina atu [e Pilato] Iesu,” ae o le motu o tagata sa “faatauanau mai ma leo tetele, o fai mai ia faasatauroina ia” (Luka 23:20, 23). O le manao “e faalotomalie i le motu o tagata,” na faalogo ai Pilato i le motu o tagata (tagai Mareko 15:15).

“E le ni ō le Lalolagi”

I le avea ai ma soo o Iesu Keriso, tatou te faaauau pea ona feagai ma filifiliga i le va o le faia o le mea sa’o ma le faia o mea e lauiloa. Sa fetalai atu Iesu Keriso i Ona soo, “Afai o ni tagata o le lalolagi outou, po ua alofa mai le lalolagi i ona tagata; ae le ni ō le lalolagi outou, a ua ou filifilia outou nai le lalolagi, o le mea lea e inoino ai le lalolagi ia te outou” (Ioane 15:19).

O a ni tulaga e te ono feagai ai ma uunaiga a tupulaga?

O le a se mea e mafai ona e faia pe fai atu i na tulaga e filifili ai le mea sa’o? Afai e i ai sau fanau, atonu e te iloa e aogā le faatino o le auala o le a latou tali atu ai i uunaiga a tupulaga. Faamanatu atu ia i latou o le filifilia o le mea sa’o e ono faauigaina o le lē faia o mea o loo faia e a latou uo, ae o le filifilia o le mea sa’o e aumaia faalatalata atili ai i tatou i le Tama Faalelagi.

“Filifili le Sa’o Faigata Atu”

“Ia tatou faatumauina le lototele e aloese ai mai manatu lautele. Ia tatou matuā filifili i le mea faigata e sa’o, nai lo le mea faigofie e sese.

“A o tatou mafaufau i faaiuga tatou te faia i o tatou olaga i aso taitasi—pe faia ea lenei filifiliga po o lena filifiliga—afai tatou te filifilia Keriso, o le a tatou faia le filifiliga sa’o.”

Peresitene Thomas S. Monson (1927–2018), “O Filifiliga,” Liahona, Me 2016, 86.

Talanoaga

E faapefea ona e maua le lototele e filifili ai le mea sa’o e tusa lava pe faigata?