“Faatino i le Faatuatua A o Faamoemoe mo le Faaipoipoga—8 Manatu mo Tagata Matutua O E Nofofua,” Liahona, Iuni 2023.
Faatino i le Faatuatua A o Faamoemoe mo le Faaipoipoga—8 Manatu mo Tagata Matutua O E Nofofua
E mafai faapefea ona tatou faatumauina le faamoemoe mo se faaipoipoga ma se fanau i le lumanai ae o loo faavauvau pea foi i le lei oo mai o nei faamanuiaga?
Mo tagata matutua o le Ekalesia o e nofofua, o le folafolaga o le faaipoipoga faaselesitila—a lē o le taimi nei po o le faavavau—e aumaia ai le faamoemoe tele ma le mafanafana. Ae o lena folafolaga e lē faapea e taofia ai foi lagona o le ita, popole, po o le fenumiai.
E toatele perofeta ua saunoa e uiga i faamanuiaga folafolaina o le faaipoipoga mo tagata matutua o e nofofua ma e o loo tumau pea le agavaa mo lena feagaiga.1 Mo se faataitaiga, na aoao mai Peresitene Russell M. Nelson: “E le o so latou lava faaletonu, latou te taulimaina ai na o i latou ia tofotofoga o le olaga. Ia manatua e i tatou uma, i le ala ma le taimi a le Alii lava ia, e leai se faamanuiaga o le a taofia mai Lana Au Paia faamaoni.”2
Ua faamanatu mai foi ia i tatou e Peresitene M. Russell Ballard, le Peresitene o le Korama a Aposetolo e Toasefululua e faapea, e ui ina faamautinoa mai faamanuiaga o le faaipoipoga faaselesitila i e faamaoni, “ae o le taimi ma le ala tonu lava e faaee mai ai faamanuiaga o le faaeaga e lei faaalia uma mai.”3 O lea la, o se fesili faifai pea e mafai ona tumau mo i latou o e nofofua: pe o le a oo mai ea le folafolaga o le faaipoipoga i le olaga nei pe leai? Ma faatasi ai ma lena fesili, atonu e oo i nisi tagata i lagona o le lē mautonu, tiga, ma e oo lava i se lagona o le leiloa e lē mavaaia—o le leiloa o le avea ma se toalua po o se matua i le taimi na latou faamoemoe i ai.
E ala i le faatuatua ma faamanuiaga mai le Tama Faalelagi ma Iesu Keriso, o i latou o e nofofua e mafai ona faaauau pea ona maua le faamoemoe, malosi, ma le olioli a o latou faatalitali i le Alii mo faamanuiaga folafolaina o le faaipoipoga faaselesitila.
Agai i Luma i le lotolotoi o se Aveesea e Lē Vaaia
I le olaga faitino, tatou te mafatia uma lava i le tele o ituaiga o aveesea ma le lē fiafia. Ae peitai o le aveesea o ni faamoemoe ma faamoemoega lea e mafai pe lē mafai lava ona oo mai i o tatou olaga, e aumaia ai se tulaga o le lē mautonu e ese mai mea e aveesea e manino atu. Mo se faataitaiga, o maliu o e pele, e ui i le luitauina e i ai, e manino; e fesoasoani tatou te faavauvau ai ma i’u ai ina faamaloloina i le āluga o taimi. Ae o isi mea e aveesea e tau lē manino, iloagofie, pe noatia i le taimi. E mafai ona tupu lenei mea mo i latou o loo aafia i le lē mafai ona maua ni fanau po o le vaai atu i le alualu i luma o le mafaufau galogalo a se tagata o le aiga, mo se faataitaiga. E mafai foi ona tupu lenei mea mo tagata matutua o e nofofua i le taimi nei pe a latou faamoemoe pe faamoemoe e faaipoipo, aemaise lava i latou e le’i faaipoipo lava pe leai foi ni fanau mo soo se mafuaaga. O tagata tomai faapitoa o le soifua maloloina faalemafaufau e faasino i lenei ituaiga o aveesea e lē vaaia o se aveesea lē mautonu ona o lona natura lē manino.4
I le avea ai ma se tagata sa le’i faaipoipo seia oo i le 30 ma ona tupu o o’u tausaga ma o se fomai faapitoa o lē sa fautuaina le toatele o tagata nofofua (e aofia ai tagata o le Ekalesia), ou te masani i le faigata o lenei ituaiga o lē mautonu ma le aveesea, aemaise lava i se Ekalesia o loo faamamafa tonu mai ai le aoaoga faavae toefuataiina o faaipoipoga ma aiga e faavavau.
E toatele tagata o le ekalesia latou te ta’u maia ia te a’u e moomoo maimau pe ana latou iloa pe o le a latou faaipoipo i lenei olaga—e tusa lava pe latou te iloaina o le a latou lē faaipoipo i le olaga faaletino, e mafai lava ona latou feagai ma ia agai i luma a o faatalitali mo nā faamanuiaga i le lumanai. O le lē mautonu o lenei aveesea lea e fatuina ai se lē mailoa e uiga i le pe sili atu le pipiimau po o le agai i luma.5 O tali masani i lenei ituaiga o aveesea e aofia ai lagona o le feteenai, fenumiai, lē mautonu, faanoanoa, popole, atuatuvale, tiga, tuuatoatasi, maasiasi, lototiga, ita, faalii, ma le faavauvau.
E oo lava i tagata e sili ona maufetuunai o e nofofua e ono tauivi ma le lē mautonu o loo siomia ai se faaipoipoga ma se aiga o loo faamoemoe i ai i le olaga nei. I le saunoa atu ai i tagata o le Ekalesia o e sa nofofua, sa fautua mai ai Peresitene Gordon B. Hinckley (1910–2008): “Ou te faamautinoa atu ia te outou ua matou nofouta i le tuuatoatasi lea e lagona e le toatele o outou. O le tuuatoatasi o se mea oona ma tiga. … Ae o loo i ai foi le mea e sau mai ia te Ia o lē na fetalai mai, ‘O a‘u, o A‘u lava, lē faamafanafana ia te outou.’ (Isa. 51:12.)”6 O Keriso o lo tatou punavai o le faamafanafanaga ma le faamoemoe i le lotolotoi o le lē mautonu.
O lenei “faatalitali atu i le Alii,” na aoao mai ai Peresitene Ballard, “e aofia ai le usiusitai faifaipea ma le agaigai i luma faaleagaga ia te Ia. O le faatalitali i le Alii e lē aofia ai le faatalitali e aunoa ma se mea e fai. E lē tatau lava ona e lagona faapei o la e te i totonu o se potu faatalitali. O le faatalitali i le Alii e aofia ai le faatinoga.”7
O lea la, e mafai faapefea e i latou o e nofofua ona faia se faatinoga o le a fesoasoani ia i latou e agai ai i luma ma le faatuatua ia Keriso i le lotolotoi o tiga o le faatalitali mo se faaipoipoga lea e mafai pe lē mafai foi ona tupu i le olaga nei? O auala nei e valu e mafai ona fesoasoani e faateleina ai lou maufetuunai ia lē na o le ola nofofua ae ia ola foi ma ola i se olaga faamalieina.
1. Ia Iloa o Loo E Oo i se Aveesea e Tele ni Ona Faauigaga
E aogā le iloa o loo e oo i se ituaiga o aveesea e tele ni ona faauigaga ma atonu e lē faigofie ona e foiaina le fenumiai e aumaia ai. O lenei nofouta i ai e mafai ona fesoasoani ia te oe e faatulaga masani ai mea o loo feagai ma oe, pe o le lagonaina o le lē mautonu o le nofofua, faamoemoe pea mo se faaipoipoga, manao e togi le solo i le sailia o se tasi e faaipoipo i ai, faanoanoa i le lē faaipoipo i se tasi, po o le mafaufau pe o i ai se mea o faaletonu ia te oe po o ni paaga faaolioli. O le malamalama o loo e feagai ma se aveesea e tele ni ona faauigaga e mafai ona maua ai se toomaga.
2. FaailoaIna o ni Vaaiga se Tele o se Mea Aogā
E tāua le faataga mo ni vaaiga se tele o lou aafiaga ina ia moni ai i le taimi lava lea. Mo se faataitaiga:
-
“E mafai ona ou pipiimau i le faamoemoe e faaipoipo ma agai i luma i le ola ai i lo’u olaga i ni auala anoa ma fiafia.”
-
“E mafai ona ou faanoanoa i le leai o se toalua i le taimi nei ma i ai le faamoemoe ia mafai ona ou maua i le lumanai.”
-
“E mafai ona ou faatauaina uma sootaga ua ou maua faatasi ma uo ma aiga ma moomoo mo se mafutaga ma se toalua.”
-
“E mafai ona ou faia uma ni taumafaiga e feiloai ai i lou toalua i le lumanai ma talitonu e mafai ona faalagolago i le taimi a le Alii ma le faitalia a isi.”
3. Taulai Atu i Mea e Mafai Ona E Puleaina
Ia nofouta i mea e te mafaia ma e lē mafai ona e puleaina. Mo se faataitaiga, e mafai ona e pulea le nofo latalata i le Tama Faalelagi ma Iesu Keriso ma maua le malosi e ala ia i La’ua. E mafai ona e saunia ma ola agavaa mo se faaipoipoga i le malumalu, ma e mafai ona e saili mo le ituaiga tagata e te manao e faaipoipo i ai. E lē mafai ona e pulea le sailia o lena tagata po o le filifili o lena tagata e faaipoipo ia te oe. A e malamalama i mea e mafai ona e puleaina ma e taliaina mea e lē mafai ona e puleaina, e mafai ona e faaitiitia mafatiaga faalelagona ma faateleina lou tomai e onosaia ai le faanoanoa. O tiga e lē maalofia, ae o le faanoanoa ma le puapuaga e masani ona oo mai pe a tatou taumafai e pulea mea e lē mafai ona tatou pulea nai lo le faatuatuaina o fuafuaga a le Atua.8
Faataitai le faalagolago i le Atua, aemaise lava i mea e lē mafai ona e pulea (tagai Faataoto 3:5–7). Mafaufau pe mafai faapefea e le nofofua a o moomoo e faaipoipo ona maua ai avanoa e tuputupu ae ai. Sa aoao mai Elder Bruce C. Hafen, o se Fitugafulu o le Pulega Aoao ua malolo faamamaluina, i se tasi taimi: “O faafitauli o le olaga e foliga mai e lē muta lava, ae o le taumafai malosi e taulima faafitauli atonu e te eli loloto ai e te aoaoina ai mea e te lē malamalama lava i ai e aunoa ma le eliina. O se olaga fiafia e lē faatatau i le mauaina o le mea e te manao ai; e faatatau i uiga faaalia e te atiaeina agai i soo se mea e tupu ia te oe, o se uiga faaalia e mafai ai ona e tuputupu ae.”9
4. Faafailele le Manao Paia mo le Faaipoipoga
O le manao e faaipoipo e mafai ona avea ma se punavai mamana o le faamoemoe, musumusuga, ma le uunaiga. Filifili e faafailele le manaoga paia mo le faaipoipoga, e ui lava o le naunau mo se faaipoipoga pe a e nofofua e mafai ona luitauina ma tiga. Atonu e faaosoosoina oe e taofiofi le manao mo se faaipoipoga e faafaigofie ai luitau faalelagona na te aumaia; o lenei mea e mafai ona aofia ai le mafaufau lē lelei e uiga i le faaipoipoga ma isi (o tagata na e tafao faamasani i ai, o le isi itupa, ma isi mea faapena) po o le faamavae mai o oe lava i le nofo toatasi.
O le faaaogaina ma le loto i ai o lou faitalia na tuuina mai e le Atua e faafailele ai lenei manao paia mo le faaipoipoga—e ui lava e mafai ona avea o se puna autu o le lototiga a o e nofofua—e mafai ona lagonaina le mamana. O faataitaiga o auala e mafai ona e faia ai lenei mea e aofia ai:
-
I le mafaufau ai i laina o le “Ona o le faaipoipoga o se manao amiotonu lea ou te faatauaina, ua ou filifili ai e taofimau i le faamoemoe o le a ou faaipoipo i le olaga faitino, e ui lava o le faia o lena mea o le filifili foi lea e faaauau pea ona lagona le lē fiafia ma le lototiga o le nofofua.”
-
O le filifili e fai le mea e mafai ona e faia e faaipoipo ai, e pei o le feiloai atu i tagata ma tafaoga faamasani, e ui lava o le faia o lena mea o lona uiga atonu e te lagonaina le teenaina, lotovaivai, ma le vaivai i nisi taimi.
O le faamamaluina o le manao ina ia faaipoipoina ae e te le o mafaia i le tami nei ona faamamalu le poloaiga ina ia faaipoipoina o se auala anoa lea e faaali atu ai lou tuuto e mulimuli i le Faaola i le ala o feagaiga.
5. Tumau le Auai Punouai i Lou Alualu i Luma e Faavavau
Pe a e nofofua, e faigofie ona matuā taulai atu i le matafaioi o loo faia e le faaipoipoga i lo tatou alualu i luma e faavavau. Ae e mafai lava ona e tuputupu ae ma alualu i luma i le tele o auala. O lo tatou faamoemoega autu i le olaga o le avea atili e faapei o le Tama Faalelagi ma Iesu Keriso.
O le faamaoni i le Faatuatua ua aoaoina ai i latou o e nofofua ma mananao ina ia faaipoipo ia “le lafoaia le faamoemoe. I le taimi lava e tasi, aua nei faatagaina oe lava e faasalāveia lau sini. Nai lo lena, ia auai ma le naunautai i gaoioiga tauaogaina. Vaavaai mo ni auala e auauna atu ai i lou aiga lautele ma i lou nuu. Talia ma faalautele ia valaauga o le Ekalesia. Ia tausisia lou mamā, i le faaletino ma le faaleagaga. Faaauau pea ona aoao ma tuputupu ae ma alualu i luma i lou olaga patino.”10 Atiina a’e uiga faa-Keriso. Osia ma tausia feagaiga paia e mafai ona e faia a o e nofofua. Faaaoga mea ua ofo atu e ou tulaga o i ai nei ia te oe. Maua le olioli i lau faigamalaga. “O mea laiti ma faatauvaa e faataunuu ai mea tetele” (Alema 37:6).
6. Faamalosia Ou Sootaga
O sootaga anoa o se vaega tutotonu o le olaga nei ma le faavavau. Atiina ae au sootaga ma le Atua ma isi.11 Faataitai le faia o ni talanoaga anoa. Faasoa atu e uiga i ou aafiaga. Faalogo atu i isi. Taulima feteenaiga. Auai i gaoioiga faagaeetia. Ia iloa o au sootaga o se punavai mamana o le olioli ma e maua ai auala e avea atili ai e faapei o Iesu Keriso.
2. Malamalama i Lou Faasinomaga Moni
O le nofofua atonu e foliga mai o se vaega aupito sili ona tāua o lou olaga, ae e le o lou faasinomaga lea; ua na o se vaega o lou tulaga o i ai nei. Taulai atu i lou faasinomaga moni o se atalii/afafine o le Atua. Ua aoao mai Peresitene Nelson: “O outou moni lava o fanau agaga a le Atua. … Ou te popole lava i lo outou faafofoga soo i lenei upumoni ua foliga mai ua na o se faaupuga nai lo o se upumoni paia. Ae, o le auala e te mafaufau ai po o ai moni oe e aafia ai toetoe o faaiuga uma e te faia.”12 Ia tausisia lou faasinomaga paia i le totonugalemu o le auala e te faamatalaina ai oe lava ia.
8. Pipiimau Pea i le Faamoemoe
O le faamoemoe e maua ia Iesu Keriso ma Lana Togiola (tagai Mataio 11:28–30; Mosaea 24:13–15).13 O se faatinoga o le faatuatua e tumau ai le faamoemoe e ui lava i le lē mautonu. Na aoao mai Peresitene Ballard o lena faamoemoe ia Keriso “e tatau ai mo le faatoilaloina o mafatiaga, e siitia ai le maufetuuna’i mausali ma le malosiaga, ma oo ai ina iloa e alofagia i tatou e lo tatou Tama Faavavau ma o i tatou o Ana fanau o ni ō Lona aiga.”14
Ia tausisia se vaaiga e faavavau lea e tumau pea le nofofua i se vaaiga. Na aoao mai Peresitene Dallin H. Oaks, Fesoasoani Muamua i le Au Peresitene Sili: “O le nofofua, leai o se fanau, maliu, ma le tatalaina o faaipoipoga e faaleaga ai faataitaiga ma tolopo ai le faataunuuina o faamanuiaga folafolaina. … Ae o nei faaleaga mea e lē tumau. Ua folafola mai e le Alii e faapea i le faavavau, e leai se faamanuiaga o le a taofia mai i ona atalii ma afafine o ē tausia poloaiga, e faamaoni i a latou feagaiga, ma naunau i mea e tonu.”15
E pei lava o le talitonu i aoaoga faavae toefuataiina o le ata o le faaolataga e mafai ona atili faateleina ai luitau o le nofofua, e mafai foi ona e maua le faamautinoaga ma le faamoemoe e ala i le talitonu i le fuafuaga a le Atua, i lou natura paia, ma i faaipoipoga e faavavau mo i latou uma o e ola agavaa mo lenei faamanuiaga sili.