Ierusalema i le Taimi o Iesu

Saunia e Matthew J. Grey

Polofesa o Tusitusiga Paia Anamua, Iunivesite a Polika Iaga

Aoao atili e uiga i le aai na i ai se matafaioi taua i le galuega a le Faaola.

Ata

O Iesu Keriso o loo tilotilo atu i Ierusalema

Ua Tagitui Keriso mo Ierusalema, saunia e Gary Smith

O le aai o Ierusalema sa totonugalemu i le olaga faa-Iutaia i le seneturi muamua ma o le nofoaga lea o nisi o mea aupito sili ona taua na tutupu mai le soifuaga ma le galuega a Iesu Keriso.

Mo se faataitaiga, o loo tusia i Evagelia o le Feagaiga Fou e faapea, sa masani ona asiasi atu Iesu i Ierusalema e faamanatu tausamiga a tagata malaga mai Iutaia i le malumalu (lea e masani ona Ia aoao atu ai i le lotoa i fafo)¹ ma sa Ia faaaluina le toe vaiaso o Lona soifua i le olaga nei i le aai a o sauniuni ai mo se faamanatuina o le Paseka.² I lena nofoaga, na tuuina atu ai e Iesu Ana lauga mulimuli faalauaitele, na feteenai ma taitai o le lotoifale, na faia Lana Tausamaaga Mulimuli faatasi ma le au soo, mafatia ma tatalo i Ketesemane, ma mafatia i faamasinoga, sauaga faatautala, ma le faasatauroga lea na iu ina oo atu ai i Lona maliu, tanuga, ma le toetu.

Ona o Ierusalema o le nofoaga lea o nei mea taua na tutupu i le soifuaga ma le misiona a Iesu, o le malamalama i le laufanua o le aai i le vaitaimi o le popofou o Roma e mafai ona faapupula tele ai lo tatou faitauina o tala o le Evagelia.

O Le Aai i lalo o Herota le Sili ma e Na Suitulaga ia te Ia

O le Ierusalema na silafia e Iesu e itiiti lava sina faatusatusaga i le aai o loo asia e tagata tafafao maimoa i ona po nei, ae o tusitusiga faatusi paia, punaoa o talafaasolopito, ma eliga o le eleele mo suesuega ua mafai ai ona faia se toe fausaga mataina o Ierusalema i ona foliga i le seneturi muamua.³

E le pei o le nofoaga o le nuu o Kalilaia lea na faaalu ai e Iesu le tele o Lana galuega,⁴ o Ierusalema o se aai mauoa ma le matagofie lea sa toefaafouina talu ai nei e Herota le Sili ma e na suitulaga ia te ia e atagia mai ai tulaga aupito sili ona lata mai i fausaga faa-Roma, tekinolosi, ma tulaga lelei. O lea ua aofia ai:

Le Mauga matagofie o le Malumalu, lea e mafai ai e tagata malaga mai Iutaia mai le salafa o le lalolagi Meititirane ona tapuai i le Atua o Isaraelu i le malumalu. Ioe, sa alu foi Iesu i le malumalu ina ua Ia asiasi atu i Ierusalema.⁵
Se faasologa o pa puipui ma olo (e pei o le Olo o Anetonia) lea na puipuia le aai.
Faalapotopotoga o faafiafiaga, e pei o se fale faafiafia ma se fale matamata.
O se alavai lea na tafe atu ai le vai i totonu o le aai e sapalai ai manaoga faateteleina o e o nonofo ai ma le lolofi masani mai o tagata asiasi.
Le tele o vaitaele—e pei o le Taelega o Petesa i le itu i matu ma le Taelega o Seloa i le itu i saute—mo le faatofuina aloaia o tagata malaga mai Iutaia o e masani ona o mai i le aai e faamanatu ia tausamiga o loo otooto mai i le Tora. Sa asiasi atu Iesu lava Ia i nei vaitaele.⁶

Le Aai Pito i Lalo ma le Aai Pito i Luga

Le vaega aupito leva ma le sili ona fesuisuiai o Ierusalema i lenei vaitaimi o le Aai i Lalo, i le itu i saute o le Mauga o le Malumalu. O loo i ai maketi pisi, auala tumutumu i tagata, fale talimalo o tagata malaga mai, ma fuifui putuputu o fale e le mo ni tagata maualuluga, faapea foi ma fale tetele atu mo nisi o tagata sili ona iloga o le aai.

I sisifo o le Aai Pito i Luga—o le vaega aupito maualuga ma sili ona tamaoaiga o Ierusalema. O i na fausia ai e Herota lona fale tele (ma ona apaau e lua e mo le nonofo ai, o togalaau faafiafia, ma vaitaele), ma sa saili tagata o le vasega maualuga a Iutaia e faataitai i faiga faatupu a Roma.

O nei aiga maualuluga, ia sa aofia ai ositaulaga o e sa faatautaia le malumalu o Ierusalema, sa nonofo i nofoaga o le taulaga na teuteuina i puipui e tusi ai ata e sitaili faa-Pomupei, o fola o maa faatafafa laiti ua mamanu i fuagalaau ma isi teuga, faapea togalaau matagofie. Sa latou aai foi i le potu o tausamiga sitaili Faa-Roma (potu malolo ai i luga o nofoa momi i taimi o taumafataga) faatasi ai ma meaai mananaia ma mea meaai mai fafo.

O Aso Mulimuli o Iesu i Ierusalema

Ona o le tele o lenei ituaiga o olaga mamalu sa lagolagoina e sefuluai sa nofo aitalafu ai i aiga o faitaulaga ma mai le tamaoaiga o le malumalu i Ierusalema, sa tausalaina faalauaitele ai e Iesu Keriso ia tagata maualuluga o le aai mo lo latou sauaina o tagata matitiva, o a latou faaaliga vaaia o le tamaoaiga ma le malosi, ma lo latou taulimaina o tagata faatauvaa i totonu o le sosaiete a Iutaia.⁷

O lenei feteenaiga ma taitai o le atunuu na taitai atu ai i le taualuga o mea na tutupu i le soifuaga o Iesu, lea na tutupu i le laufanua o Ierusalema.

I le taimi o Lona po mulimuli, sa faasoa atu ai e Iesu Lana Talisuaga Mulimuli i Ona soo i se mea i le nofoaga e nonofo ai tagata i le aai (lea, e ui lava i le tulaga masani i le Mauga i Sisifo, ae atonu na tupu i se fale faatauvaa e latalata i le Aai i Lalo). Ona ia malolo atu lea i se fale faifaatoaga i fafo atu o puipui o le aai i luga o le Mauga o Olive e ta’ua o Ketesemane, po o le “nofoaga o le masini e tatau ai le suauu,” lea na Ia mafatia ai i le tiga ma sa puefaapagotaina ai. Ona faamasinoina ai lea o ia mo le upuleaga e pulega o ositaulaga i le lotoifale i se tasi o fale mauoa o le Aai Pito i Luga.

O le taeao na sosoo ai, sa toe faamasinoina ai Iesu e le taitai Roma, o Ponotio Pilato (lea atonu na tupu i le maota sa nofoia e Herota le Sili). Ona faamalosia ai lea o Iesu e amoina Lona satauro i fafo atu o pa o le aai ma sa faasatauroina faalauaitele i se nofoaga o faasalaga e ta’ua o Kolokota, po o le “nofoaga o le ulupoo” (atonu e latalata i se eli maa tuufua i le itu i matusisifo o le aai).⁸ Ina ua mavae Lona maliu, sa tanumia Iesu e Ona soo i se tuugamau lata ane, lea na taoto ai Lona tino seia oo i Lona Toetu mamalu i le aso tolu.⁹

E ui atonu tatou te le iloa ma le mautinoa i aso nei ia nofoaga tonu e fesootai ma le vaiaso faaiu o Iesu, o le malamalama i vaega autu ma le faataatiaga faaletaulaga o Ierusalema i le seneturi muamua e mafai ona ofoina mai ni malamalamaaga taua i la tatou faitauga o tala o le Talalelei, aumaia i le olaga mea na tutupu i aso e gata ai o Iesu, ma fesoasoani ia i tatou ia latalata atili atu ia te Ia a o tatou lagonaina le mana o le Togiola na Ia tuuina mai i le Aai Paia.