Ua Na’o Tusiga Faaeletonika
O Le Olioli ma le Meaalofa o le Salamo—Savali Lata Mai Nei mai Perofeta ma Aposetolo
Tagai i mea na aoao mai talu ai nei e perofeta soifua i luga o ala o faasalalauga faaagafesootai e uiga i le salamo.
I le konafesi aoao ia Aperila 2022, sa valaaulia ai i tatou e Russell M. Nelson ia “iloa le olioli o le salamo i aso taitasi.”1 Sa ia faaopoopo mai:
“O le salamō o lekilea i le alualu i luma. O le faatuatua mama e faatumauina ai lo tatou agai i luma i luga o le ala o feagaiga.
“Faamolemole, aua ne’i fefe pe faatuai ona salamō. E fiafia tele Satani i lou pagatia. Ia vave momotu. Lafoai ese ana faatosinaga mai lou olaga! Amata i le asō ona lagonaina le olioli o le tuueseina o le tagata natura. E alofa le Faaola ia i tatou e le aunoa aeaemaiselava pe a tatou salamo.”2
Na saunoa uso o le Au Peresitene Sili ma le Korama a Aposetolo e Toasefululua i le konafesi aoao e uiga i le olioli o le salamo. Na latou faasoa mai foi ni savali e uiga i lenei autu i luga o ala o faasalalauga faaleagafesootai, e aofia ai mea nei:
Salamo ma le Faamafanafanaga e ala ia Keriso
“E tumu le Atua i lagona o’oo’o. Na te tausia i tatou ma lagona mu’amu’a uma o se matua agaalofa. Ou te vaai faalemafaufau i le olioli na Ia lagonaina i le iloaina o [Lona Alo Pele] o le a iu ina manumalo i se manumalo mamalu i le agasala ma le oti—o le tatalaina o faitotoa o avanoa faalelagi ina ia mafai ai e oe ma au i se aso ona toe ola faatasi ma e pele ia i tatou.
“Ae ou te talitonu foi sa mamanuina Lona olioli i le malamalama atoatoa o le mea o loo faatalitali mai i Lona Alo Pele. … O le Alo lava lea e tasi o le a puapuagatia aua e leai se isi tagata, e le mafai foi ona mafatia ai.
“Ae ona e alofa tele lo tatou Tama Faalelagi ia i tatou, na Ia faatagaina ai nei mea fiafia ma tiga e tutupu e uia ai lo latou ala e tatau ai. Ona sa manaomia e le lalolagi le laveaiina, ma ona e manaomia e oe ma au le laveaiina, na Ia auina mai ai ia i tatou se Faaola.
“… Ia tatou taliaina le meaalofa atoatoa ma le taua a le Atua. Ia tatou lafoai a tatou avega ma agasala i aao o le Faaola ma lagonaina le olioli lea e sau mai le salamo ma le suiga. Ia tatou mulimuli ia Iesu Keriso ma faataitai i Lona soifuaga.”
Peresitene Russell M. Nelson, Facebook, Tes. 24, 2021, facebook.com/russell.m.nelson.
O Lagona o le Atua Pe a Tatou Faia ni Mea Sese
“Sa fesili mai se tagata talavou ia te au i se tasi taimi, ‘Peresitene Ballard, o le a se lagona o le Atua ia te au pe a ou faia ni mea sese?’ Atonu sa e tuufesili foi i lenei mea.
“E alofa le Atua i Ana fanau uma, ma e malamalama o Ia o le olaga o se aafiaga mo i tatou uma. Tatou te le atoatoa. O le a tatou faia ni mea sese. Ua Ia tuuina mai ia i tatou Lona Alo, o Iesu Keriso, e fesoasoani ia i tatou ia suia ma vaai ia i tatou i le aluga o le olaga nei.
“I le iuga, e tatau ona tatou aoao e ola i le ala e finagalo o Ia tatou te ola ai, ae tusa lava po o le a le saoasaoa tatou te suia ai ma alualu i luma, o Lona alofa mo i tatou e le masuia aua o i tatou o Ana fanau.
“E mafai e le Alii o Iesu Keriso ona fesoasoani ia i tatou e faaleleia soo se mea e manaomia ona faaleleia i o tatou olaga e ala i Lana taulaga togiola.”
Peresitene M. Russell Ballard, Facebook, Set. 16, 2021, facebook.com/mrussell.ballard.
Vavega o le Salamo ma le Faamagaloga
“E tatau ona tatou taumafai ia manuia mai se vaaiga o mea na muamua atu. Ou te aioi atu ia te outou ia manatua o le taimi ua tuanai e ao ona aoaoina mai ai, ae e le o le ola ai. Tatou te vaai i tua e pue mai aloiafi mai aafiaga susulu ae le o lefulefu.
“Ma afai ua tatou aoaoina mea e manaomia ona tatou aoaoina ma ua tatou aumaia ma i tatou mea sili atu na tatou aafia ai, ona tatou vaavaai lea i luma ma tatou manatua o le faatuatua e masani lava ona faasino atu i le lumanai. O le faatuatua e masani lava ona aafia ai faamanuiaga ma upumoni ma gaoioiga na o le a aumaia ai taunuuga manaomia o le a oo mai i o tatou olaga.
“Atonu e taumanatunatu nisi o outou—aemaise lava a o tatou ola ai i le vevesi i aso taitasi i le lalolagi o loo siomia ai i tatou i aso nei—‘O i ai ea se lumanai mo a’u?’ O le a se mea o i ai i se tausaga fou mo au? Pe o le a ou saogalemu ea? Pe o le a manuia ea le olaga? Pe mafai ea ona ou faatuatuaina le Alii ma i le lumanai?
“Faamolemole ia manatua le mea lenei: e talitonu le faatuatua o le Atua o loo i ai ni mea se tele o loo fuafuaina mo i tatou taitoatasi ma o Keriso e moni lava o le ‘faitaulaga sili i mea lelei atali’ (Eperu 9:11).
“Ia tulimatai atu ia outou miti, e tusa lava po o le a le va ma le mamao ese atu. Ola ia vaai i vavega o le salamo ma le faamagaloga, o le faatuatuaina ma le alofa paia lea o le a suia ai lou olaga i le aso nei, taeao, ma le faavavau. O se tautinoga lena o le Tausaga Fou ou te talosaga atu ia te outou ina ia tausisia.”
Elder Jeffrey R. Holland, Facebook, Ian, 9, 2022, facebook.com/jeffreyr.holland.
O Se Meaalofa Faamama
“O le Togiola e le i’u a le Faaola ua suia atoa ai le ala e mafai ona tatou vaavaai atu ai i a tatou solitulafono ma ni lē atoatoa. Nai lo le nofoa’i i na mea ma lagonaina le lē togiolaina, e mafai ona tatou a’oa’o mai ai ma lagonaina le faamoemoe. O le meaalofa faamamā o le salamo e mafai ai ona tatou tuua i tua a tatou agasala ma tutula’i a’e o ni tagata fou.”
Elder Dieter F. Uchtdorf, Facebook, June 5, 2021, facebook.com/dieterf.uchtdorf.
O Se Suiga o le Loto
“Ua suia o tatou loto i upumoni tatou te aoaoina i le malumalu e uiga i le Atua ma Iesu Keriso—ma e ala i folafolaga tatou te faia e alolofa ma auauna atu ai. E itiiti lo tatou taulai atu i mea tatou te mananao i ai ae tele i le faaogatusa o o tatou loto ma le finagalo o le Atua. … O le uluai matafaioi o le maota o le Alii e mo i tatou ina ia liua ma avea ma tagata fou ia Keriso.
“E masani lava i le lalolagi, o suiga e taumafai mai fafo i totonu. E toatele e talitonu o le suia o tulaga o se tagata o le auala sili lea e suia ai se tagata.
“Peitai, o le Atua, e masani lava ona galue mai totonu i fafo. Afai tatou te faatagaina o Ia, e mafai e le Atua ona suia o tatou loto— ona faamanuiaina lea o i tatou i le gafatia ma le malosi e suia ai o tatou tulaga.
“I totonu o malumalu paia, o mea tatou te aoaoina ma folafola atu e fai e suia ai i tatou mai totonu, ma mafai ai ona avea atili i tatou ma soo tuuto o Iesu Keriso.”
Elder David A. Bednar, Facebook, Ape. 19, 2022, facebook.com/davida.bednar.
O Le O’o Ina Iloaina o le Faaola
“Atonu e talitonu nisi o outou o Iesu Keriso o le Alo o le Atua ma sa Ia ofoina mai se taulaga togiola e le iu ma faavavau. Ae atonu foi e te talitonu o Lana Togiola e aoga mo isi tagata uma—ae le o oe. E te faatinoina le faatuatua i le Faaola ae atonu e le talitonu o Ana faamanuiaga folafolaina uma o loo avanoa mo oe pe e mafai foi ona faagaoioia i lou olaga. Ou te valaaulia oe ia le gata ina e iloa e uiga i le Alii, ae ia e iloa foi o Ia.
“Sa apoapoai mai le Faaola ia i tatou ina ia avea e faapei o Ia. E oo ina tatou iloa le Alii pe a tatou saili atu e ala i le mana o Lana Togiola ia avea ai e pei o Ia. E oo ina tatou iloa le Alii pe a tatou auauna atu ma galulue i Lona malo. E oo ina tatou iloa atili le Alii pe a le gata ina tatou talitonu ia te Ia ae talitonu foi ia te Ia ma Ana faamautinoaga.
“O le talitonu ia te Ia—taliaina o le moni o Lona mana ma folafolaga—e valaaulia ai se vaaiga, filemu, ma le olioli i o tatou olaga. O Lana Togiola e maioio; e patino lava. Ma e mo i tatou foi taitoatasi.”
Elder David A. Bednar, Facebook, Mat. 14, 2021, facebook.com/davida.bednar.
Tiutetauave Patino
“O le Faaola, i le totogiina o le sala mo a tatou agasala, sa lei tuumamaina ai i tatou mai le tiutetauave patino mo le ala tatou te ola ai i o tatou olaga. O le taua o le galue, toaaga, galulue ma lo tatou malosi, faaleleia atili o a tatou taleni, ma le sauniaina o aiga ua uma ona folafola mai i tusitusiga paia mai lava i le amataga.
“O la’u lu’i ia te outou o le suesue lea o a outou sini ma fuafua po o a mea o le a faatagaina oe e faataunuu ai matafaioi faaleaiga, tausia oe i luga o lou ala o feagaiga, ma faataga oe ia maua le olioli e finagalo ai le Alii mo oe. Manatua, o le i ai o se sini e mafai ai ona e sefeina le taimi ma taumafaiga e ala i le fuafuaina i luma atu ma le le misia o mea taua e manaomia ma aso e faagata ai.
“E le tatau ona e fefe e ui i tulaga matautia ma luitau o le a oulua fetaia’i. O le a faamanuiaina ma puipuia oe pe a e sailia ni sini amiotonu, ma aoga; fuafua ma galulue ma le faamaoni ma le naunautai; ma faalagolago ma taulai atu i le faatuatua, salamo, sauniga faaola, ma le taulaga togiola a le Faaola a o e tumau e oo i le iuga. O le taulai atu i le malumalu o le a fesoasoani ia te oe e ausia ai nei sini.
“Ou te molimau atu ma le mamalu i le paia o Iesu Keriso. Ona o Ia e le tatau ai ona tatou fefefe, aua e atoatoa ia te Ia lo tatou olioli.”
Elder Quentin L. Cook, Facebook, Tes. 8, 2021, facebook.com/quentin.lcook.
Tatalo Faamaoni, Loto Atoa a le Tagata Lava Ia
“Ua ou maua i lo’u lava olaga, pe a fautua mai e se tasi e pele po o se uo ni mea e manaomia ona ou suia, e tusa lava pe moni, o le tagata natura i totonu o a’u e i ai nisi taimi e pu‘e ai ma fai mai, ‘E te le o vaai mai i ai mai lo‘u manatu,’ po o le ‘O ai oe e te faamasino ai?’ Pe atonu foi ou te mafaufau, ‘Atonu e tatau ona e galue ia te oe lava.’ Peitai, pe a ou tootuli ma le lotomaualalo i luma o lou Tama Faalelagi, ma ole atu i le loloto o le faamaoni, ‘Tama, o le a le mea e tatau ona ou suia?’ “O Gafea o Manaomia ai ona Ou Salamo? “O le a se mea ou te le’i faia? E oo mai se lagona toafimalie ia te au, ma i le taimi talafeagai, ou te faalogo ai ia te Ia. Ma o Lana upumoni, o Lana upumoni e faavavau, e tuia ai lo’u loto.
“O le tatalo faamaoni, ma le loto atoa a le tagata lava ia i na taimi filemu e tatala ai le faamalama i faaaliga mai lo tatou Tama Faalelagi. Tatou te faalogo ia te Ia. E fetalai mai o Ia ia i tatou. O le taumafai e faalogo i uunaiga filemu a le Agaga ma folafola atu i lo‘u Tama Faalelagi o le a sili atu ona ou gauai atu i na mea e mafai ona ou faaleleia e foliga mai ia te a’u e aumaia ai se tomai sili atu mo a’u e faalogo ai ia te Ia.
“O suiga moni e seasea tupu i se aso. Ou te iloa e le tupu mo au. Ae i le aluga o taimi, ua avea atili ai i tatou ma tagata sili atu nai lo le mea sa tatou i ai. A o tatou faalogo ia te Ia ma faatino le taitaiga faaleagaga tatou te maua mai ia te Ia, Na te faaalia Lona agaga ma Lana faamaoniga i o tatou luga. E leai se isi mea e sili atu nai lo lena—lagonaina o Lana faamaoniga, lagonaina o Lona Agaga. E faamautu mai e le Agaga Paia le alofa o lo tatou Tama Faalelagi mo i tatou. Ma ou te iloa i lou tulaga, na Ia faamautinoa mai ia te au e oo lava i nei laasaga laiti o le alualu i luma o loo fesoasoani ia te au e latalata atili atu ai ia te Ia.”
Elder Neil L. Andersen, “How I Hear Him,” Tes. 27, 2021, facebook.com/neill.andersen.
Ma Le Manatu Tonu I Ai
“Talu ai nei sa fesili mai ai se faifeautalai ia te au, ‘Pe o tatou pepelo ea pe afai tatou te le tausia poloaiga uma tatou te aoao atu i tagata?’ O se fesili maoae lenei. Sa ou manatu o le a ou faasoa atu la‘u tali iinei. Ou te iloa e le faapea e tatau ona ou atoatoa ina ia valaauina ai au e avea ma se uso o le Korama a Aposetolo e Toasefululua. E sili atu lo‘u iloa nai lo se isi lava tagata ou te le atoatoa. E tatau ea la ona tatou atoatoa e auauna atu ai i le Alii? E leai. E le faatatau i lena mea.
“E i ai se eseesega tele i le va o le fouvale ma vaivaiga. O le pepelo la le aoao atu o se poloaiga e te le o faamoemoe e tausia. O se pepelo lena mea. Ae o le aoao atu o poloaiga ona tautevateva lea ma salamo—e le pepelo lena mea, aua o loo e faamoemoe e tausi le poloaiga. A tatou faia mea ma le manatu moni i ai, o lona uiga ua tatou faamoemoe e tausi poloaiga. E leai la se mea e pepelo ai le aoao atu e uiga i le ala o feagaiga pe e uiga i le aoao atu e uiga i poloaiga a le Atua pe a e faamoemoe moni e tausia uma na poloaiga. E te iloa ma e mafai ona molimau atu o le tausia o na poloaiga o le a aumaia ai faamanuiaga.
“I le Tusi a Mamona, fai mai le Moronae 6:8 ‘Ae o soo se taimi sa latou salamo ai ma saili le faamagaloga, ma le faamoemoe faamaoni, sa faamagaloina i latou.’ E oo mai le vaega pepelo pe afai tatou te faia se mea sese ma aua le salamo ma aua le faamoemoe e salamo. O le amiosa’o e faapea o a tatou faatinoga ma talitonuga e ogatusa atoatoa—o le auala lea tatou te taumafai ai e ola i o tatou olaga. Ae pe o se pepelo ea pe afai e le mafai ona tatou faia i taimi uma lena mea? Leai, o le vaega atoa lena o le salamo, a ea? E mafai ona tatou salamo mai na mea e ui lava i a tatou taumafaiga lelei tatou te le faia. Ona o le Togiola a Iesu Keriso, e moni le faamagaloga.”
Elder Dale G. Renlund, Facebook, Fep. 15, 2022, facebook.com/DaleGRenlund.
O Le Agalelei ma le Mana Le Mafaatusalia o le Atua
“A’u uo pele, ou te molimau atu ia te outou, a tatou salamo faamaoni i a tatou agasala, ua tatou faatagaina le taulaga togiola a Keriso ia aoga atoatoa i o tatou olaga. O le meaalofa o le salamo o se faaaliaga lea o le agalelei o le Atua i Ana fanau ma o le faapupulaga foi lea o Lona mana e lē mafaatusalia e fesoasoani ia tatou manumalo ai mai solitulafono tatou te faia.
Elder Ulisses Soares, Facebook, 2 Iuni, 2021, facebook.com/soares.u.