Tatalo mo i Latou

Saunia e Meg Daines, Alapama, ISA

O tapuniga o le malumalu na mafai ai ona ou fatuina ni auala fou e auai ai i le galuega a le Atua e ala i le fesoasoani atu i isi i lenei itu o le veli.

Ata

tamaitai faapolofesa i le soifua maloloina o loo talanoa ma se tamaitai ma’i

I ni nai tausaga ua mavae, sa ou filifili ai e auai i le malumalu i vaiaso taitasi. I lena taimi, sa matou nonofo latalata i se malumalu. O lenei faiga na avea ma se punavai faatuatuaina o le malamalama ma le mana lea na ou faalagolago i ai.

I se tausaga mulimuli ane, ina ua siitia atu lo matou aiga i le isi itu o le atunuu, sa matou le toe nonofo latalata i se malumalu. Sa lei faigata le auai atu i le malumalu, ae sa feagai ma le taimi umi o femalagaaiga ma manaoga o lo’u aiga talavou, sa na o le faalua i le masina na ou auai ai.

O le taimi lava na amata ai le faama’i pipisi o le KOVITI-19, sa le mafai ona ou auai i le malumalu, lea sa foliga mai o se faasalaga ina ua uma ona toefaatulagaina lo’u olaga ia auai soo. Sa ou mafaufau pe mafai faapefea ona faaauau pea ona ou tuputupu ae faaleagaga, ma sa ou lagona le mamafatu i le foliga le talafeagai o mea.

I le taimi o se faamamaina masani o nifo, sa ou tauivi ai e faatoafilemu lo’u mafaufau. Ina ua fesili mai le tagata tausimai ia te a’u po o le a le mea sa ou manao e faalogo i ai i le taimi o la’u faamama, sa ou tali atu, “O le a ou fiafia lava i ni leo manatunatu loloto faamalolo.”

Sa ia fai mai e leai se tasi na talosagaina lena mea, ae sa ia usitaia. I le sefululima minute talu ona amata le ma taimi faatulagaina, sa ia faailoa mai ai le tele o lona fiafia i le ma “faamamaina mafaufau loloto.” Ona ia faamatala mai lea ia te a’u e uiga i le popolega i lona lava olaga, lea na aofia ai le manuaga talu ai nei o lana tama tama e 13 tausaga. I le siomia ai i le pisapisao o se ofisa pisi, sa ia faasoa mai ai lana avega ia te a’u, ma sa ma mauaina faatasi le filemu.

I lo’u tulaga toafimalie o le mafaufau, sa oo atu ai o’u mafaufauga i le malumalu. Sa oo ina ou agaigai i luma e ala i se sauniga amata, o upu o a’u feagaiga o le malumalu o loo tufa atu ma le lē mafaagaloina i lo’u mafaufau. Ona sosoo ai lea ma uunaiga tulaga ese e tolu mai le Agaga:

Fesili atu i le tagata tausi tumama i le igoa o lana tama tama.
Ta’u atu ia te ia o le a e tatalo mo ia.
Tatalo mo i laua ma ta’u o laua igoa.

E ala i lenei fesuiaiga faigofie, sa ou lagonaina ai le liua o la’u avega i se faamanuiaga. Sa ou maua sina vaaiga i le ala na fesoasoani ai a’u feagaiga ia te a’u e alofa i le Tama Faalelagi ma lo’u tuaoi. Na aoaoina a’u e le Agaga e faapea o le auai atu i le malumalu e tutusa lava le faatatau i le fesoasoani atu i isi i lenei itu o le veli e pei ona i ai i le faamanaina faaleagaga o a’u lava ma o’u tuaa.

O tapuniga o le malumalu e lei suia ai lo’u tuputupu ae faaleagaga. Ae, sa latou faatagaina a’u e fatufatu ni auala fou e punouai ai i le galuega a le Atua ma maua ai le alofa faalelagi, malamalama, ma le poto.