Manuia i le Faasoaina atu o le Talalelei

Saunia e Molly Ogden Welch

O Mekasini a le Ekalesia

O le galuega faafaifeautalai e mafai ona faigofie e pei o le “alofa, faasoa atu, valaaulia.”

Na avea Eddie ma Christina (agavale) ma uo ia Brent ma Jessica (ogatotonu) ma lo la aiga ina ua la siitia atu i le uarota. Na papatisoina mulimuli ane Brent e Eddie.

Ina ua siitia atu se aiga fou i le latou uarota, sa tonu ia Eddie ma Christina Brouse e faamasani ia i latou. Ina ua tuua le lotu, sa alu atu Christina ia Brent Vickers ma amata se talanoaga. E lei leva, ae faatasi atu i ai ma i laua le uo teine a Brent, o Jessica Espinoza. Ona o i laua uma e iai ni la atalii faatoa fananau mai, na vave lava ona masani ia Christina ma Jessica.

Sa fai mai Eddie, “O Brent o se alii maualuga atonu e ono taufaafefe i nisi o tagata, ae sa ou lagonaina o ia o se alii lelei tele. Ou te manatua sa ou mafaufau o se tasi lea ou te manaʻo lava ia ou masani i ai.”

A o avea aiga o Brouse ma Espinoza/Vickers ma uo, sa masani ona latou valaaulia le tasi ma le isi mo taumafataga i afiafi. I se tasi afiafi, sa faamatala ai e Brent ma Jessica le talafaasolopito o Brent i le talalelei. Na maua e Brent lesona a faifeautalai i ni nai tausaga na muamua atu ona o Jessica ua uma ona avea ma se tagata o le Ekalesia, ma e ui sa fiafia o ia e feiloai ma faifeautalai, ae sa tonu ia te ia e le papatiso i lena taimi.

Faatasi ai ma le faamalosiauga a Jessica ma le aiga o Brouse, sa tonu ai ia Brent e toe feiloai ma faifeautalai. Sa lava lona alualu i luma i lesona a faifeautalai lea na tonu ai ia i laua ma Jessica e tatau ona la faaipoipo. Sa lagolagoina e le aiga o Brouse lenei faaiuga ma faaauau pea ona lagolagoina Brent a o ia feiloai atu i faifeautalai. Sa faaipoipo Brent ma Jessica ia Iulai 2019 e lo la epikopo, o Eddie Brouse.

O le faia o lapataiga mo le saogalemu i le taimi o le faama’i pipisi o le KOVITI-19, sa mafai ai e aiga ona toe faatasia. Sa ta’ua e Jessica i le au Brouses sa manatu Brent ua saunia o ia e papatiso. O le ataata a Brent na faamaonia ai lenei faamatalaga.

Na fai mai Christina, “Sa vave ona matou valaau atu i tamaitai faifeautalai ma ta’u atu ia i laua ua manao Brent e papatiso. O le Aso Lulu lena, ma e oo atu i le Aso Toonai, ua papatisoina o ia.”

Sa ia faaauau, “I le aso o lona papatisoga, sa tuuina mai ai e Brent ia i matou se opo sili ona tele. Ou te manatua lo’u matuai faafetai lava ona sa la faatagaina i ma’ua e avea ma se vaega o lenei malaga faatasi ma lo la aiga.”

E lei leva ona papatisoina Brent, ae faaalia e Jessica le fia alu i le malumalu. Ina ua uma ona talanoa ma taitai o le uarota ma auai i le vasega sauniuni mo le malumalu a le latou uarota, sa mafai e Jessica ona maua ona faaeega paia i le Malumalu o Orlando Florida ina ua mavae le aveesea o tapu o le KOVITI-19.

Sa mafai foi e matua o Jessica ona faafou a laua pepa faataga o le malumalu ma i ai i totonu o le malumalu faatasi ma Jessica. Sa mafai foi e Eli le atalii matua o Jessica ma Brent ona maua le Perisitua Arona.

A o amata ona fai e Brent ia lesona a tagata fou ma auai i le galuega o talafaasolopito o aiga, sa mafai ona ia maua igoa o tagata o lona aiga e ave i le malumalu. Na maliu talu ai nei le tama o Brent, o lea ua saunia ai Brent e faia galuega faalemalumalu a lona tama.

Na saunia e Jessica le galuega o talafaasolopito o aiga mo lona tama moni ma isi tagata o le aiga ina ia mautinoa ua latou mauaina o latou sauniga o le malumalu. O le atalii o Jessica o Eli sa sui papatiso mo lona tamamatua.

Sa faataitai mai e le aiga o Brouse le natura o le faasoa atu o le talalelei. Fai mai le afafine o le au Brouses o Abbie, “O le avea muamua ma uo ia i latou o le mea lea na fesoasoani ia i matou e faasoa atu ai le talalelei ia i latou.” Na ioe Christina, “O le talanoa atu ia i latou e uiga i le talalelei sa matuai faigofie lava aua matou te alolofa tele ia i latou, ma sa matou le mananao i se isi mea e sili atu nai lo le vaai atu ia i latou o latalata atili atu i le Alii.”