Na o le Faaeletonika: Tamā o Aso e Gata Ai
Faatoilaloina o le Fefe i le Avea ma se Matua
Na oo mai faamanuiaga maoae ina ua ou filifili e taulai atu i le olioli o le tulaga faatamā.
E alala le tusitala i Idaho, ISA.
Ou te lei iloa le mea e faamoemoe i ai ina ua valaau mai Susie, lo’u toalua, ma le popole ia te au i le faletaele i se tasi afiafi. Sa ma faaipoipo mo na o sina taimi puupuu lava, sa ma nonofo ai i le fale mautotogi o lo’u tina faaletulafono, ma o i ma’ua uma sa faigaluega i ni galuega e sefe ai se tupe mo le kolisi.
O lea ina ua ta’u mai e lo’u toalua ua maitaga o ia, sa ou te’i. Sa foliga mai e le o toe mamao ona maua lea o se ma pepe. Sa ma lagonaina le matuai le saunia lava. I lena taimi, sa ou iloaina ua tatau ona ou laa i luga ma fesoasoani i lo’u toalua e saunia mo se pepe. O lea sa ou taulai atu ai i le lagona e tasi sa sili ona lelei i lena taimi: o lo’u sagisagi i le manatu o le avea ma se tama.
O Se Suiga i le Vaaiga
E masani lava ona faalavelaveina au i le ala o le tulaga faatamā—ma le tulaga faamatua i se tulaga lautele—e masani ona faaalia i ala o faasalalauga. E foliga mai e le o nofouta tamā i manaoga ma lagona o o latou taitoalua ma fanau. Ua faaalia i latou o ni tagata e le mafai ona tausia isi ma e oo lava ia i latou lava. Ma le isi, o le avea ma se matua ua faamatalaina i ala o faasalalauga ma i le olaga moni o le mutaaga o le vaega “malie” o le faaipoipoga. E masani ona ou faalogo o le a sili atu ona faigata le olaga, e te le maua se moe, e te le maua se taimi mo oe lava, ma isi mea faapena.
Ua ou iloa nei o nei ata o ni meafaigaluega mamana a Satani e faalotovaivaia ai i tatou mai le fausiaina o aiga. E ui o loo i ai luitau pe a mavae le mauaina o se tamaitiiti, ae o loo i ai foi le olioli ma le faamalieina e le pei o se isi lava.
Sa ou filifili e teena mea leaga uma na ta’u mai ia te au e uiga i le tulaga faaletama. Nai lo lena, sa ou taliaina mea lelei uma e uiga i ai ma sa tuuto atu e galue i vaega faigata. O le tulaga faamatua e le faigofie mo le toatele o tagata, ma ou te le faapea atu, sa o se fasi keke mo au. O nisi o uiga faaletama e lei oo fua mai. Ae a o lei fanau mai le ma pepe, sa ou faia le mea na mafai ona ou faia e saunia ai au lava ma fesoasoani i lo’u toalua e saunia a o ma laa atu i le ma matafaioi fou o ni matua.
Sa ou suesue i tusitusiga paia ia iloa ai pe faapefea ona saunia. Sa ou faitau i isi tusi e uiga i le avea foi ma se tamā. Sa ou suesue i le auala e sui ai napekini. Sa ou faia taumafaiga uma ina ia malamalama ma tigaalofa i tiga o le maitaga o le a oo i ai lo’u toalua. Ma sa ou faia le mea sili ou te mafaia e tumau ai le vaai i itu lelei. O le liliu atu i le Tama Faalelagi i le tatalo na fesoasoani ou te lagona ai le filemu sa ou manaomia e faate’a ai le fefe i le avea ai ma se matua.
O Le Alofa e Aumaia e Aiga
Ou te le manatu ia te au lava o se tagata e ootia gofie le loto, ae a o ou vaai atu i lo’u toalua o siiina la’u pepe teine i le aso na fanau ai o ia, sa ou tagi i le olioli. I lena taimi, sa ou iloaina ai o lenei pepe teine o le a faatasi ma i matou e faavavau, ma sa ou faafetai i le Tama Faalelagi ua saogalemu iinei o ia ma i ma’ua.
O le toe tepa i tua i lena aafiaga, sa ou manatua ai se vitio e uiga i aiga sa masani ona ou faasoaina i le taimi o la’u misiona. O le vitio, “Earthly Father, Heavenly Father,” na faaalia ai se tama o loo feagai ma ana faiga masani i aso taitasi. O le mea na matua faaleagaga ai le vitio mo au o le auala na faamatala ai le faiga masani o aso taitasi o le aiga i lo tatou sootaga ma lo tatou Tama Faalelagi. Sa faaiu i le faamatalaga lenei: “Mai faalagiga uma o le faaaloalo ma le mamalu ma le faaaloalogia ua tuuina atu i le Atua, ua ia faatonuina i tatou e faalagi o Ia o le Tama.”1
O lena upusii sa sili atu ona taua ia te au i le taimi lava na avea ai au ma se tama. I le taimi muamua, sa na ona ou mafaufau i ai o se sootaga i le va o le Atua ma au; E popole o Ia mo au ma taialaina au i aso uma o lo’u Tama oi le Lagi. Ae o le avea ai o au lava ia ma se tamā ma lagona le alofa lemafaamatalaina ua ia te a’u mo lo’u afafine na ou iloa ai le tele o le alofa o lo’u Tama Faalelagi mo a’u. O le talalelei o se faataitaiga mo aiga, ma o le taimi lava e i ai so tatou lava aiga, e mafai ona tatou malamalama atili ai i le alofa o le Tama Faalelagi mo i tatou i o tatou lava olaga.
Aga’i i Luma
O le asō ua silia ma le tausaga le matua o lo’u afafine ma ua vave lona tuputupu a’e. O le avea ai ma se tama ua ou tuputupu ae ai foi, i auala ou te lei iloa e mafai. O le tulaga faatamā e aumaia ia te au le olioli sili atu nai lo soo se taimi avanoa ma se moe semanu ou te maua. E ui lava i le lagonaina o le le saunia mo le tulaga faaletama, ae o le alofa o le Tama Faalelagi na faaosofia ai au e saunia i le tele ou te mafaia ai. O le alofa lena sa uunaia ai lo’u agaigai i luma. E pei ona fai mai i le Luka 12:31, “Ia outou saili le malo o le Atua; ma o nei mea uma o le a faaopoopo atu ia te outou.” Sa ou saili muamua e faia mea uma o le a saunia ai au e avea ma se matua, ona oo mai ai lea o le filemu ma le olioli lea e omai faatasi ma le tulaga faatamā. O le le lelei e le mafai lava ona sili atu i mea lelei o seamatafaioi paia. O le tulaga faatamā e tatau ona taliaina ma fiafia i ai, ma o le lesona aupito sili lena ua ou aoaoina ma faaauau pea ona aoaoina i lenei matafaioi o se tama.