Mataupu Faavae o le Auaunaga

E Mafai Ona Tatou Fesoasoani i Isi e Lagona Latou te Aofia Ai

E mafai ona fesoasoani le Agaga Paia ia i tatou e faapotopoto mai isi pe afai o le a tatou faia le taumafaiga e aapa atu.

Ina ua auai Ioana Schifirnet i le Ekalesia a o talavou i Romania, sa faafeiloaia o ia e talavou matutua i lana paranesi ma faaaofia ai o ia i a latou vasega ma gaoioiga. “Sa avea i latou ma a’u uo mamae,” o lana tala lea. “Sa latou faia ia ou lagona lou aofia ai.”

A o avea o ia ma se talavou matua, sa manao Ioana e faia lea lava mea e tasi ma fesoasoani i isi ia lagona le taliaina i le Ekalesia a le Faaola. E ui ina sa ia lagona le popole e uiga i le aapa atu i tagata na te lei iloaina, ae sa ia aoao e faalogo i le Agaga Paia ma talitonu i uunaiga sa ia mauaina.

Ina ua auai se isi tamaitai talavou, sa maua e Ioana le lototele e talanoa atu ai ia te ia. Sa laua mauaina se fiafia tutusa i musika, ma sa ofo atu Ioana e aoao o ia e taitai le pese. E lei umi ae faaalu faatasi o laua faatasi, e auauna atu o se ta piano a le paranesi ma se taitai musika.

“A o ou saunia a’u lava e maua le taitaiga a le Agaga Paia, sa amata ona ou matauina o loo Ia tuu ni mafaufauga i lo’u ulu, ma taliina a’u fesili, ma uunaia a’u,” o le tala lea a Ioana. “Sa i ai taimi sa ou le iloa ai se tala e fai atu, ona oo mai lea o se mea. Sa sa’o le faalogona ina ua ou fai atu. O loo ou aoao e faalagolago i le Agaga Paia.”

Sa ia aoaoina e masani lava o mea e fesoasoani i isi ia lagona le aofia e le tetelē. Mo ia, o le aofia ai i le Aoga Sa po o gaoioiga, taaalo i taaloga po o taaloga faavalevalea malie, tao kuki, ma faia ni po siva. “Sa le’i papanu tele. Sa nao le fiafia lava po o le mafai ona talatalanoa. Ma pe a fesootai i se mea faaleagaga, e mafai ona faapitoa atili ai.”

Na faaiuina e Ioana, “O le toe tepa i tua, semanu ou te auai i le Ekalesia a Iesu Keriso e aunoa ma na talavou nofofua matutua. Ae o le iai o i latou na fesoasoani e faamalosia a’u i auala ou te manaomia ai.”

E Mafai Ona Tatou Fesoasoani i le Atua e Faapotopoto Ana Fanau

O le aapa atu i isi e mafai ona faigata, ae maise lava pe afai o se tasi tatou te le iloa lelei pe atonu e eseese o latou talitonuga nai lo i tatou.

Mo le silia ma le 40 tausaga, sa taumafai ai Ieremia e fesoasoani i tagata e o mai i le Faaola, o le toatele o i latou sa le fiafia i lana fesoasoani. Sa latou le amanaiaina perofeta. O o latou loto sa tamau i mea e ese mai le Alii. (Tagai Ieremia 2–3; 5; 7; 11.)

Na iloa e Ieremia o le a faataapeapeina le aiga o Isaraelu. Ae sa ia valoia se faapotopotoga tele i o tatou aso, lea o le a faapotopotoina ai e le Alii Isaraelu i Siona, ma auina atu faifaiva ma le au tulimanu e sue i latou (tagai Ieremia 16:16).

Na tali e Peresitene Russell M. Nelson lenei fesili ina ua ia faapea mai: “Pe a tatou talanoa e uiga i le faapotopotoina o Isaraelu i itu uma e lua o le veli, o le mea moni o loo tatou faasino atu i le galuega faafaifeautalai, malumalu, ma talafaasolopito o aiga. O loo tatou faasino atu foi i le fausiaina o le faatuatua ma le molimau i loto o i latou o loo tatou ola faatasi, galulue, ma auauna i ai. Soo se taimi tatou te faia ai soo se mea e fesoasoani ai i soo se tasi—po o le fea lava itu o le veli—i le osia ma le tausia o feagaiga ma le Atua, ua tatou fesoasoani i le faapotopotoina o Isaraelu.”¹

Mataupu Faavae e Mafaufau i Ai

A o e mafaufau pe mafai faapefea ona e aapa atu ma faafeiloai isi i totonu, mafaufau i manatu nei mai le aafiaga o Ioana:

• E mafai e le Agaga Paia ona taialaina a tatou upu ma faatinoga, faapea foi ma le liliuina o a tatou taumafaiga silisili i se mea anoa (tagai Mose 6:32–34).

• Saili mea masani e fiafia i ai.²

• Valaaulia isi e auai faatasi ma oe i gaoioiga ua uma ona e fuafua e auai.³

• Ua valaaulia i tatou e Peresitene Nelson e faapotopoto mai isi e ala i le avea ma se malamalama ma faatuina se tulaga faatonuina e atagia ai le ala e ola ai soo moni.⁴

O Le a se Mea e Mafai ona Tatou Faia?

Talitonu o le a taialaina e le Agaga a’u taumafaiga ia iloa se tasi pe valaaulia i latou e auai faatasi ma oe.

Suesue Ia Iloa Atili

Saili pe mafai faapefea ona tatou faapotopoto i le Faaola ma aumai isi faatasi ma i tatou i le “O Le Feagaiga e Faavavau,” saunia e Peresitene Russell M. Nelson, o loo maua i lenei lomiga o le Liahona.

Faamatalaga

1. Russell M. Nelson, “Ia Faamuamua le Atua,” Liahona, Nov. 2020, 92–93.

2. Tagai Russell M. Nelson, “Auauna Atu i le Mana ma le Pule a le Atua,” Liahona, Me 2018, 68–75.

3. Tagai Richard Neitzel Holzapfel, “Auauna Atu i Tagata Uma,” Liahona, Tes. 2020, 21.

4. Tagai ia Russell M. Nelson “Faamoemoe o Isaraelu” (faigalotu a le autalavou i le lalolagi atoa, Iuni 3, 2018), HopeofIsrael.ChurchofJesusChrist.org.