“Aisea Tatou te Anapogi Ai,” Liahona, Oke. 2022.
Aoaoga Autu o le Talalelei
Aisea Tatou te Anapogi Ai
Ata na pueina e Scott Law
O le anapogi o lona uiga o le alu e aunoa ma se meaai ma se vaiinu ina ia mafai ai ona latalata atili atu i le Atua. Afai e faatagaina e lo latou soifua maloloina, e mafai e tagata O Le Ekalesia a Iesu Keriso o le Au Paia o Aso e Gata Ai ona anapopogi i le Aso Sa muamua o masina taitasi. Ae e mafai foi ona tatou anapopogi i isi taimi, e pei o le taimi e ma’i tigaina ai se tagata o le aiga po o se tagata o le uarota po o le paranesi.
Aoaoga a Keriso
I taimi o le Feagaiga Tuai, sa anapopogi ai Mose ma Elia (tagai i le Esoto 34:28; 1 Tupu 19:8). I taimi o le Feagaiga Fou, sa anapogi ai Iesu Keriso mo le 40 ao ma le 40 po e sauniuni ai mo Lana auaunaga (tagai i le Mataio 4:1–4). Sa Ia aoaoina Ona soo i le mana ma le taua o le anapogi. O loo faaauau pea le poloaiga ia anapopogi i aso nei.
Faamoemoega
O le anapogi o se auala lea mo i tatou e latalata atili atu ai i le Atua. Atonu tatou te mananao e anapopogi pe a tatou sailia faaaliga po o se faamanuiaga faapitoa. E mafai ona tatou anapopogi e faailoa atu le faafetai i le Atua. O le anapogi e maua ai foi se auala mo i tatou e auauna atu ai i isi e ala i taulaga anapogi.
Anapogi ma le Tatalo
Ua aoao mai perofeta o le anapogi e aunoa ma le tatalo o le a na o le fiaai lava. E mafai ona tatou amata ma faaiu la tatou anapogi i se tatalo, ma e mafai ona faia se tatalo i o tatou loto a o tatou anapopogi. E mafai ona tatou tatalo mo le malosi ma musumusuga ma ia malamalama i le finagalo o le Atua. E mafai foi ona tatou ole atu i le Atua mo faamanuiaga mo i tatou lava po o e pele ia i tatou.
Aso Sa anapogi
O le Sapati muamua o le masina e masani lava o se aso anapogi. I lena aso, tatou te anapopogi mo se vaitau e 24-itula pe afai e mafai ona tatou faia. Tatou te tatalo foi, auai i a tatou sauniga Lotu, ma tuuina atu se taulaga anapogi i le Ekalesia.
Ata na pueina e Shirlene Stoddard
Taulaga Anapogi
O se taulaga anapogi o se foai lea e fesoasoani e tausi ai i latou e manaomia. O se vaega lea o le tulafono o le anapogi. A tatou anapopogi i le Aso Sa anapogi, e valaaulia i tatou e tuuina atu se taulaga ia le itiiti ifo ma le tau e tutusa ma le aofa’i o ‘aiga e lua tatou te le’i taumafaina. Tatou te tuuina atu le foai, e pei o le sefuluai, i se tasi o la tatou au epikopo po o le au peresitene o le paranesi pe auina atu i luga o le uepisaite a le Ekalesia.
Sauniga Anapogi ma Molimau
I le Aso Sa anapogi, o le lotu faamanatuga o se sauniga anapogi ma molimau. I le taimi o lenei sauniga, tatou te pepese, tatalo, ma aai ma feinu i le faamanatuga e pei ona tatou faia i Aso Sa uma. Ona valaaulia lea o tagata o le potopotoga e tuuina atu a latou molimau ia Iesu Keriso ma lana talalelei.
Faamanuiaga o le Anapogi ma le Tatalo
A tatou anapopogi ma tatalo, tatou te latalata atili atu i le Alii ma faateleina lo tatou malosi faaleagaga. Tatou te faamalosia foi lo tatou ola tutoatasi, maua le agaalofa sili atu, ma ia lotomaualalo atili.